Omupedu prima ministaa kufwa moilonga

Presidente Netumbo Nandi-Ndaitwah okwa kufa omupedu prima minista nokwa li yoo minista woikwafaabulika, eemina noikwanghono Natangue Ithete konima ta popilwa omalimbato inaa yuka oikando ya yooloka mombelewa.

Presidente ina yandja nande etomeno kutya omolwashike a ninga etokolo li li ngaha, ashike okwa ti oilonga ei paife otai ka wilikwa kombelewa yaye, osho tashi mu pe eenghono a wilike mangha oikwamina noikwanghono.

Omafeekelo taa popilwa ekufomoilonga laIthete, omwa kwatelwa oukaume waye nomunangeshefa wokukwata eeshi nosho yo oilonga yaye mehangano lomayambulepo oikwafaabuli laNamibia ledina Namibia Industrial Development Agency (Nida), olo tali nyikwaanyika eshi la landifa eehecta dedu di li 200 komunghulofuta koumaliwa ashike vashona.

Ithete moivike ei twa dja okwa li a popila oproyeka youraniuma yaRussia koshitopolahoololo shaMaheke oyo ya patanekwa kovanawino vopaunongononi ve na oumba kutya otai kakeke omeva koshi yedu.

Ekufombinga laye mokuyandja omikanda dokufukula oikwamina nalo ola tumbulwa kutya otashi dulika olo etomeno presidente a kufa onghatu ei.

Nandi-Ndaitwah momukanda wa nyolwa Oshoondaxa okwa shiivifa kutya Ithete okwa kufwa moilonga meendelelo.

“Pakulongela kumwe nekotamhango laNamibia, presidente Netumbo Nandi-Ndaitwah okwa ninga etokolo lakula a kufe Natangue Ithete moilonga yaye youpedu prima minista nouminista woikwafaabulika, oikwamina noikwanghono, meendelelo ngaashi tashi dulika,” omukanda osho wa shangwa ngaho.

Ithete Oshondaxa kakwa li nande a nyamukala omapulo oo a tuminwa. Monakudiwa okwa li a nukila pomutenya kutya ke na nande oshinima sha puka a ninga shi na sha noinima ya kilikita komahangano epangelo oko a longa nale.

Minista mukulu, oo kwa li a talela po Angola omwedi wa dja ko a ya koshoongalele shomahooli noshimoko, ota twikile nokukala oshilyo shopaliamente.

Eedjo di li popepi nombelewa yapresidnte oda ti Nandi-Ndaitwah okwa kala nale ta dilaadila okukufa Ithete moilonga oule weemwedi, ashike okwa kala ta kateke etokolo. Presidente vati okwa li a ninga oshoongalele naIthete oivike ei twa dja.

Ithete omwedi wa dja ko okwa kufa omukulunhuwiliki woNida ta vatele Richwell Lukonga Moilonga.

Omatomeno etokolo eli kakwa li nande a yela, omukulunhuwiliki woNida otaku feekelwa kutya okwa fa a li ominge nongeshefa yedu ei ya kwatela mo ehangano lokoMiddle East.

Okwa li yoo vati pu na omalimbililo kutya edu leeheceta di li 200 laNida ola pewa omunangeshefa Titus Nakuumba nookaume kaye okudja koUnited Arab Emirates ngahelipi.

Nande ongeshefa ei oya ningwa nale momudo 2012, ovanambelewa vamwe vakula vepangelo ova kala ve li ominge nayo shaashi vati edu okwa li landifwa po kokamaliwa kashona neenghono.

Nakuumba oule womido okwa kala nokupopila oshinima eshi. Ovanhu vomeni ova ti, etokolo lapresidente okwa li yo la etwa, mokati kaikwao, konghendabala yaIthete vati yokukufa moilonga ewilikongudu lehangano lomahooli lopashiwana ledina National Petroleum Corporation of Namibia (Namcor), oshinima osho sha talika ko kuvahapu mepangelo kutya onghendabala yokunghonopeka ewiliko laye nexwaxwameko laye mehangano omu.

Ewilikongudu ola kala li li pondodo yaxuuninwa yokuulika omukulunhuwiliki mupe konima kwa li la shiivifa omhito ei muJanuali, ashike omulandu ou okwa li wa kalekwa muMarsa konima Ithete a ya mombelewa.

Eedjo otadi ti Ithete okwa yandja elombwelo konguduwiliki i kaleke mangha okukuta opo a palele omunhu oo a hala ondjila.

Ewilikongudu okwa li yoo vali li li ominge noshinima osho va pulwa opo ehangano lokoGhana li kufe ko oNamcor.

Sha landula eshi Ithete a kufwa moilonga, oshikondo shomahooli noshimoko otashi kala tashi tonatelwa kondje yopaliamente.

Presidente wongudu yoAll People’s Party Ambrosius Kumbwa okwa ti onghatu yapresidente kai li paudemokoli.

Omupopiliko wongudu yoLandless People’s Movement Lifalaza Simataa okwa ti etokolo eli otali kumwifa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.