Omunghona a fifile omunailonga eembwa

…okwa li a homata

Umwe womovalumenhu ovaSouth Africa ve li vavali ovo tava tamanekwa va fifila eembwa omutonateli womaliko omuNamibia okwa ti, omutonateli womaliko okwa li a homata shaashi okwa li e na ekatana nomupini wekuva, omanga kwa li ina ponokelwa keembwa.

OmuNamibia Veneruru Kavari weedula o30 okwa lombwela oThe Namibian eshi oshivike eshi sha shi kula eshi sha dja ko kutya okwa li a ningilwa omahepeko okolutu nokwa li a ningilwa yo omahepeko oukwamuhoko komunghona waye omuSouth Africa, Piet Groenwald omunamido o63 nokamonamati kaye Stephen omanga inave mu fifila eembwa.

Oshiningwanima eshi osha ningilwa moshitukulwa shaLimpopo.

Pefimbo opo oshiningwanima sha ningwa, Kavari okwa li ha longo onga omutonateli womaliko wavo.

Oshivike eshi sha landula eshi sha dja ko, opolifi yaSouth Africa oya ti manga oshiningwanima inashi ningwa, omuwiliki waKavari okwa li e mu talela po ndee te mu lundile kutya okwa li a hanga e li koshi yodungo, eshi osha eta opo e mu twale komukunhuwiliki waye koGroblersdal opo va ka kundafane oshikumungu eshi.

Momukandaano oo kwa li wa leshwa momangulilo yaGroblersdal, omutamanekwa okwa ti Kavari oye a kupula tete omupini kuye nokeembwa da li di li pondje yeumbo.

Groenewald okwa ti nande Kavari okwe mu shekuna, okwa pondola okudenga eembwa odo da li di li pondje. Okwa ti vali okwa kufa omupini kuKavari opo ehe u longife e mu denge.

“Kavari natango okwa li e na ekatana a hala okutuponokela, onda kendabala ndi mu lombwele a ha ye komesho ashike manga inandi fika ku ye, okwa li nale a kanghekwa komutonateli womaliko opo ehe tu ponokele,” Osho a ti ngaho.

Okwa ti ina ningila nande Kavari omahepeko. “Ondi na nale oibofa ivali, mo2003 onda li nda tamanekelwa oibofa ivali yedipao nashimwe shonghendabala yedipao. Onda ninga oinima ei shaashi okwa li ndi li moilonga onga omukwaita,” Osho a ti. Okwa ti okwa li a longela ehandukilo laye mondolongo ndele ta kufwa mo kepangelo. Oshifokundaneki shedina South Africa Eyewitness, osha ti kutya omukonakoni woshibofa eshi, Gregory Maleasenya, okwa ti kutya omuyandjimbangi wepangelo ota kala moshiponga ngeenge omutamanekwa okwa pewa epitikilo e lifutile mo mondolongo.

Okwa lombwela omangu kutya omuyandjimbangi, oo ouyelele waye wopaumwene itau popiwa ota ningilwa nale omatilifo edipao okudja komunhu ehe shiivike.

“Eshi osho nda hala okulombwela omangu kutya ombangi yetu eyi i li apa kai li meameno. Onda popya kutya onda li nombangi ashike oya lombwela nge kutya inai hala okukwatelwa mo moshinima eshi, ina hala edina laye la tumbulwa shaashi okwa tila a dipawe,” Maleasenya osho a popya ngaho.
Kavari eshi a popya noThe Namibian, okwa ti omunghona waye okwa lombwela omonamati opo e mu fifile eembwa ta longifa oitya ya puka noyuukwamuhoko “ka#@r”. Konima yeponokelo okwa li a ka lopota kopolifi, osho sha eta fiyo Groenewald nomonamati aveshe va tulwe moipandeko, tava tamanekelwa ehepeko lokolutu nelalakano va ehameke. Kavari okwa popya kutya okwa li e li momake opolifi omafiku atatu shaashi oya tila a ka ningile omaliko ovanhu omunyonena, ashike konima yomafiku oo okwa li a mangululwa. Okwa ti yee ina ningila nande omaliko asha omunyonena konhele oko kwa li ha longele. Okwa ti konima yomafiku atatu omanga kwa li oshinima eshi inashi ningwa, okwa li a pula opo a shaine ombapila yeudafano yoilonga ashike Groenewald ine mu pwilikina. Kavari okwa ti okwa longela ashike Groenwald omafiku a heyali. Okwa ti okwa li a udanekelwa kutya ota kala ta futwa oN$300 mefiku. “Efiku nda ponokelwa, Groenwald okwa pula nge kutya oshike kwa li nda kolwa ndi li moilonga. Onde mu lombwela kutya kakwa li nda kolwa ndele, ta tameke okudenga nge. Konima yefimbo, okwa lombwela omonamati opo a ete eembwa di lye nge. Okwa ti “Eta eembwa opo di lye oka#@r,” Kavari ta ti.

Okwa ti okudja opo okwa efa po oilonga, paife iha longo vali oku li ashike meumbo.