Omundilo wa lya okanona kOkongo

Kauna Shikwambi

Okaana keedula mbali kokamati, Nicolas Abraham, okaxulifa konima eshi ka li moshiponga shomundilo.

Omukulunhu wopolifi e na sha nokukonaanakona oimbuluma omupedu komufala Zacharias Amakali, okwa ti oshiningwanima osha ningilwa komukunda Ondeumane moshikandjohoololo shaKongo moshitukulwa shaHangwena.

Amakali okwa hokolola ta ti Nicolas okwa li a fiwa ta danauka meumbo navakwao vavali umwe oku na eedula nhano omanga umwe e na hamanho.

Ota kufeekelwa nokutya ounona okwa li tava danene omundilo osho sha eta eenduda mbali di teme.

Okwa lopotwa kutya Nicolas okwa pya olutu alishe.

Nande nee okwa li kwa ningwa onghendabala yomeendelelo opo a twalwe a ka mone ouhaku koshipangelo sha kula shaKongo, Nicolas okwa xulifila mondjila eshi kwa li ta twalwa koshipangelo kOnandjokwe okudja mOkongo.

Monghundana ikwao, ounona vavali veedula nhano ovafya omeva moshikandjohoololo Ogogo moshitukulwa shaMusati konima eshi va fiwa tava lifa oikombo kuvakwao vavali veedula dopokati.

Omupopiliko wopolifi moNamibia omupedu komufala Kauna Shikwambi, molopota yoimbuluma yopolifi mexuliloshivike, okwa ti ounona vavali veedula dopokati ova fiya vakwao ve li vatatu kondje yekove tava tale oikombo omanga tava ka lima mepya. Shikwambi okwa ti okwa dja okaana ke ya okulopota kwaava tava limi kutya vakwao ve li vavali ova ya momeva.

Pefimbo olo eshi ounona ava kwa li tava limi va fika poshiningwanima vakwao ava va ya momeva ova fya nale omeva. Shikwambi, okwa ti pefimbo eshi sha holoka ovatekuli vounona ava kava li po, okwa li va ya keefya domukwapata wavo umwe oo naye opo ashike a xulifa komukunda umwe. Omidimba dounona oda twalwa nale kokila yopolifi kOkahao opo di ka konaakonwe. Ovakwapata vavo ova shiivifilwa nale.

Monghundana ikwao, Shikwambi okwa koleka omadipao avali molopota yopolifi oo a ningilwa omukainhu nomulumenhu kookaume kavo kopaihole mexuliloshivike.

Omulumenhu weedula 33 okwa li a mangwa po komukunda wedina Cancana moshitukulwa shaKavango Uuninginino konima eshi a ponokela omukulukadi waye weedula 31. Otaku feekelwa nokutya okwe mu ponokela noshiti nokumufanga olutu alishe, osho sha eta fiyo efyo. Omakonaakono opolifi otaa twikile.

Monghundana ikwao, moshitukulwa shaVenduka kofaalama yedina Josephine Farm, otaku lopotwa kutya omukainhu weedula o32 okwa li a tulwa moipandeko konima eshi a twa kaume kaye kopaihole omunamido o41 fiyo omefyo, mOlomakaya.

“Omufeekelwa nanakufya aveshe okwa li ovanailonga mofaalama omo” osho Shikwambi ta ti ngaho.

Ota kufeekelwa nokutya okwa li tava nu ndele tava tameke okutanguna omanga ine mu twa fiyo ota fi.

Pokati opo, ovakwashiwana vomomukunda Otunganga moshitukulwa shaHangwena ovakwata omulumenhu weedula o37 oo taku feekelwa nokutya okwa li ta kwata keenghono omukainhu weedula o22 e na oupyakadi wopamadilaadilo mEtitano. Shikwambi okupitila molopota yoimbuluma yopolifi mexuliloshivike okwa ti ovanamukunda ove ya okuvatela eshi va uda nakuningwa oshihakanwa ta kuwu ta pula evatelo. Omufeekelwa okwa mangwa po nale nokwa holoka onghela momangu yaMagesitrata, mEenhana. Moshiningwa nima shikwao, omulumenhu weedula o43 okwa li a mangwa po momukunda Otjerunda mOpuwo eshi taku tiwa okwa kwata keenghono omukainhu weedula o40 womuAngola oo taku hokololwa kutya okwa li a kofa pondje yonduda yaye pefimbo oshiningwanima sha ningwa. Omakonaakono opolifi otaa twikile.

Monghundana i lili, omunaudu omulumenhu weedula o38 okwa li a mangwa po popepi nOtjiwarongo mEtitano, konima eshi a hangika e na oingangamwifi yedina Cannabbis yongushu yoN$25 250 omanga kwa li e li moAmbulasa. Opolifi oya lopota mOshoondaxa kutya okwa li ta di kOvenduka a yuka kOutjo e li moAmbulasa nokwa li a mangwa po konima eshi oAmbulasa ya fikamekwa kopolifi opo iha dwe. Okwa hangwa noCannabis yoshivixa shi fike peehalama 505 i na ongushu yoN$25 250.

Omufeekelwa okwa holoka momangu yaMagesitrata mOmaandaxa.

Moshiningwanima sha faafana, ounona vavali veedula 16 no18 ova mangwa po mEtitano konima eshi va hangwa ve na oshingangamwifi she dina Cannabis pefimbo loshikonga shopolifi koAranos.

“Ongushu nondjudo yoCannabis opo tai talika,” opolifi osho ya lopota ngaho

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!