Omulumentu ngoka oye gumwe gwomaanandjungu taya kondjitha elongitho lyiingangamithi paveta moshilongo, Brian Jaftha (45) okwa dhengwa egeelo lyoomvula mbali konima yekumba, noshihauto she okwe shi kutha koveta, sho taku hokololwa a monika ondjo moshipotha shelongitho lyompangwe ga tseyika nawa cannabis.
Jaftha, ngoka wo oye omuleli gwehangano lyaalongithi yomapangwe moshilongo lyedhina Ganja Users of Namibia (GUN) okwa pewa egeelo lya tumbulwa pombanda, mOmpangu yaMangestrata gwaVenduka moKatutura mOmaandaha, sha landula sho mangestrata Sally Salionga e mu mono ondjo sho kwa li a adhika noohalama 97 dhepangwe lyocannabis, lyongushu yooN$1 940.
Jaftha okwa li a tulwa miipandeko momudhingoloko gwaKhomasdal mOvenduka momasiku 2 Auguste 2019, sho a kwatwa komupolisi gwomonanguwi ta landitha epangwe.
Otaku hokololwa kutya mesiku lyoshiningwanima, omupolisi ngoka gwomonanguwi okwa kwatathana naJaftha ta pula kutya okwa hala okulanda kuye epangwe, naashoka osha ningwa konima sho opolisi ya yakelwa ko kutya omulumentu ngoka oha landitha epangwe.
Pethimbo lyiihokolola, Jaftha okwa tindi ondjo yokulonga nepangwe, osho wo okukala nepangwe.
Konima yaashoka Jaftha okwa ndopa okuyelitha omakankameno gaashoka a popi kutya ke na ondjo musho, naashoka oshe eta Salionga e mu mone ondjo moshipotha shokulonga niingangamithi.
Jaftha, ngoka wo oye omukuluntu gwehangano lyedhina Rastafari United Front lyaamboka ye na omafufu gorasta, okwa lombwele ompangu kutya okuna aanona yatatu, ye ishewe omulongi gwuudhano woposhitaafula wa tseyika nedhina Chess.
Okwa gandja wo ombili sho a teya oveta, nokwa pula ompangu opo oshikumungu she shi falwe komuhungimwenyo ngele okwa tulwa mondholongo “molwashoka inandi hala okuteta ko omafufu gandje, ishewe ihandi li onyama”.
Salionga okwa mono Jaftha ondjo molwashoka okwa longa oshimbuluma oshinene shoka shi indikwa moshilongo nohashi gumu nayi oshigwana.
Okwa popi kutya egeelo ta pewa itali kala owala kombinga yaashoka a ninga ashike otali kala wo etumwalaka lya yela kutya omikalo dhokulonga nompangwe itadhi idhidhimikilwa.
Jaftha okwa pewa egeelo lyoomvula mbali, okugwedha kwaashoka, Sailonga okwa gandja wo elombwelo opo oshihauto shaJaftha moka kwa li mwa holekwa epangwe lyoohalama 97, shi gandjwe po kepangelo, nokwa gandja wo elombwelo epangwe ndyoka li hanagulwe po.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
