Omulumentu gwomimvo 30 ngoka e li mondjeedhililo yopolisi yaMungwelume moshitopolwa shaHangwena okwa popi kutya otasile mo ondjala molwashoka anuwa aapolisi ihaye mu pe iikulya mbyoka ndohotola gwe a ti na kale ha pewa.
Erastus Shimooshili, ngoka ngashingeyi a hala okumangululwa mo mondjeedhililo, okwa kala mondholongo uule woomvula dha konda puheyali sho a petelwa konima yekumba mo2016, ta tamanekelwa eyugo lya kwatela mo oshimaliwa shooN$4 000.
Pauyelele wehokolo lye ndyoka a gandja mompangu yamangestrata gwaShakati, Shimooshili okwa li te ehama pokati komasiku 22 Januali nomasiku 6 Febuluali numvo.
Muule wethimbo ndyoka, okwa popi kutya, hahende gwe okwa ningi omalongekidho nopolisi yoshitaasi shaShakati opo a tulwe moshipangelo shaShakati.
“Onda falwa koshipangelo shepangelo shaShakati momasiku 9 Febuluali 2023 molwashoka onda li nuunkundi wokufudha, tandi ehama konima nondi na ombato. Manga inaandi taambelwa moshipangelo okwa li nda ningi omasiku gatatu itaandi yi kokandjugo,” osho a popi ngaaka. Shimooshili okwa popi kutya okwa li a kanitha oonkondo pethimbo ndyoka nuundjolowele we onkene tawu nayipala.
Okwa popi kutya okwa kala tasi ondjala okuza momasiku 1 Maalitsa, nonande opolisi okwa li ye mu uvanekele iikulya ta pumbwa, momasiku 1 Maalitsa osho wo momasiku 16 Mei.
“Ashike, inandi pewa iikulya mbyoka sigo onena, okuza tuu nkene kwa li nda lundululwa okuza kondholongo yopolisi yoshitaasi shaShakati,” osho a popi ngaaka.
Shimooshili okwa popi kutya okwa li a lundululwa okuza kondholongo yaShakati nokufalwa kondolongo yaMungwelume. Okwa popi kutya oompangu odha pumbwa okutala eindilo lye meendelelo opo a pewe oboloha.
Shimooshili okwa popi kutya tate gwe, ngoka omukwiita noha longele kOkahandja, osho wo aapambele ye yalwe itaya vulu we okukala taye mu pe iikulya sho e li mondholongo molwashoka iilya mbyoka u uthilwa kundohotola oyi na ondilo. Okwa popi kuta he oha kwata ondjambi yooN$8 225.
Odokumente ndjoka ya yelitha iikulya mbyoka Shimooshili e na okupewa, oyu ulike kutya oku na okulya omayi, iihakautu, iikwamboga ya lumbakanithwa, iikapa, opainata osho wo onyama ya kweywa. Iikulya mbyoka oyo a hogololelwa kundohotola molwashoka oku na uupyakadhi womepunda ano momandjandja. Omolwonkalo ye ndjoka, Shimooshili okwi indile a pewe oboloha yooN$1 000, kwa gwedhwa oompango ndhoka ta kala ti iyutha kudho.
Hahende gwe, Nicky Ngula, oshiwike shika okwa popi kutya okwa li a landele Shimooshili iikulya yongushu yooN$750.
“Opolisi oyu uvaneke oku mu pa iikulya mbyoka u uthilwa kundohotola, ashike oya ndopa oku shi ninga,” osho Ngula a popi ngaaka. He yaShimooshili, Enos Haipumbu, momukandapopilo ngoka gwa gandjwa kompangu, okwa popi kutya ita vulu okukala ta gandja iikulya komwana molwashoka oku na nale oshinakugwanithwa komapepe shokusila oshimpwiyu aanona ye yalwe yahetatu.
“Paufupi, itandi vulu okulanda iikulya ye lutatu mesiku, omasiku agehe 30 gomwedhi. Oshinima shoka kashi li pauyuuki, sho oshina ondilo ishewe oshidhigu okugwanitha po,” osho a popi ngaaka.
Shimooshili okwa popi wo kutya okwa pumbwa ekwatho lyopashimaliwa opo a patululile opolisi oshipotha sho ya kala tayi mu sitha ondjala omanga e li mondholongo nokwi indile oshnimaliwa shoka shi futwe moshiketha sha hahende gwe, kwaamboka taya vulu oku mu kwatha. Komanda gwopolisi yaMungwelume, inspekta Orsmund Mbeha, okwa li a shangele komanda gwopolisi yoshitopolwa shaHangwena, Elizabeth Sibolile, momasiku 16 Mei, kutya oshitaasi shopolisi yawo osha yakula owala uunakandesha nomboga, niikulya mbyoka kaya li ya gwanena omwedhi aguhe. Iikulya mbyoka okwa li ya pulwa momasiku 10 Maalitsa.
Mbeha okwa popi kutya opolisi yoshitaasi shaMungwelume ihayi pewa omaludhi giikulya ngoka Shimooshili e na okupewa ngaashi sha zi kundohotola.
Sibolile okwa li a gandja omaindilo ga Mbeha kOmbelewa yOndjayi yetanga lyopolisi okupitila montumwafo yomasiku 15 Maalitsa 2023.
Moonkundathana noThe Namiban, Mbeha okwa popi kutya ita vulu okutya ko sha kombinga yiikulya yomunandholongo ngoka molwashoka Shimooshili oye mwene a pula a lundulilwe kondholongo yopolisi yaMungwelume okuza kondholongo yaShakati.
“Oye mwene a tokola okuya kOmungwelume, molwashoka aakwanezimo ye otaye mu pe iikulya. Oshikumungu shika kashi shi nande shaMungwelume, oshopolisi yaShakati. Oyo naya tye ko sha kombinga yiikulya,” osho a popi ngaaka.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
