Presidnte Netumbo Nandi-Ndaitwah okwa ti eelopota tadi popi kutya moipangelo yepangelo kamu na omiti itadi mu “kofifa”.
Okwa li ta popi efimbo kwa li a talela po ehangano lokulonga oikwamiti ledina Fabupharm kOtjiwarongo Etitatu.
Pefimbo letalelepo eli okwa li a kundafana newiliko lehangano novanambelewa vopaunamiti kombinga yokulonga omiti moshilongo.
“Ngee opu na oshinima ihashi kofifa nge, ongee ndi udite taku ti moipangelo yetu kamu na omiti,” Nandi-Ndaitwah ta ti.
Oshinima eshi oshe ya mokati komanyenyeto eendokotola, odo tadi ti omumbwe yomiti da fimana otai twikile, nande eelopota depangelo otadi popi kutya ondodo yomiti moshilongo oi li peepelesenda o-60.
Eendokotola odo da popya paholamo shaashi oda tila okuningwa nai, oshivike eshi oda lombwela oThe Namibian kutya ovanaudu natango otava shunifwa ko inava mona epango koipangelo ihapu.
Presidente okwa ti epangelo natango ole lipaka mo mokukwashilipaleke kutya Ovanamibia aveshe ova mona omayakulo opaundjolowele e na ongushu.
“Epangelo letu, koshi yelelo lange, otwe litula mo hatu tale kutya Ovanamibia aveshe otava mono omayakulo opaundjolowele e na ongushu ngahelipi,” osho a ti ngaho.
Nandi-Ndaitwah okwa ti elitulemo lepangelo mokuyandja omayakulo opaundjolowele oli kwetelwe komesho keitavelo tali ti “oshiwana shi na oundjolowele, oshiwana tashi dulu okweeta po sha”.
“Ndee oshiwana osho tashi dulu okweeta po sha, osho ashike tashi dulu okweeta eyokomesho,” osho a ti ngaho.
Presidente okwa ti okulonga sha inaku kwatakanifwa ashike neefakitoli ile oilonga yomeefaalama, ashike naku kwatakanifwe yoo nomaduto oinima nomapekapeko.
“Keshe shimwe ohashi tameke nomapekapeko. Momapekapeko, oto longifa ouluvi woye ndee osho osho twa hala lela okumona,” osho a ti ngaho.
Okwa popya yoo omikundu dokumona omayakulo opaundjolowele, da taalelwa koshiwana shokoitopolwa yokoushai.
Nandi-Ndaitwah okwa ti ovakufimbinga aveshe ova pumbwa okulongela kumwe va xwepopeke omayakulo opaundjolowele moshilongo.
Omukulunhuwiliki woundjolowele nomayakulo opanghalafano Penda Ithindi komutumba oko okwa ti Fabupharm ota dulu okuvatela a ninipike efimbo lile nokuteelela omiti da fimana nokunghonopeka oshikondo shokulanda omiti moshilongo.
