Omulumentu ngoka a kanitha omeho moSouth Africa okuli moshipangelo

Omulumentu ngoka a longelwa oshilonga shi nyanyaleka moSouth Africa, oshiwike sha zi ko, ota mono uuhaku moshipangelo shaWindhoek Central Hospital, mOvenduka konima sho taku hokololwa a ponokelwa nokudhengagulwa koombudhi, nokwa kanitha wo omeho.

Omuhingi gwombesa Sam Shilongo, ita mono ko we sha landula sho a longelwa uuhwapindi moJohannesburg moSouth Africa oshiwike sha zi ko, nonkundana ndjoka oya kolekwa komupopiliko gwiipambele yopaigwana nelongelokumwe, Bertha Amakali.
“Ombelewakalelipo yetu oya tseyithilwa oshiningwanima shoka mEtine,” osho a popi ngaaka.

Otaku hokololwa kutya oshiningwanima shoka osha ningwa ongulohi yEtitatu, nombelewakalelipo yaNamibia moSouth Africa oya tseyithilwa oshingwanima shoka mEtine, nopolisi oya tumwa koshingwanima shoka mEtitano ashike oya adha Shilongo a za mo nale moSouth Africa sho taku hokololwa kutya okwa galukile kegumbo nondhila ongula yEtitano.

Onzonkundaneki ndjika oya ningi onkambadhala okukonga uuyelele wothaathaa kombinga yaashoka she ende po, ashike omupopiliko gwopolisi Elifas Kuwinga okwa yamukula uunambo kutya ita vulu okugandja ehokololo lyomuule kombinga yoshiningwanima shoka.

“Ombili itandi vulu okugandja uuyelele kombinga yoshiningwanima shoka. Katu na natango olopota yoshiningwanima shoka ishewe katu na olopota yopambelewa ndjoka tayi koleke ngele osha ningilwa moSouth Africa,” osho a popi ngaaka.

Ashike uuyelele mboka wa zi kaapopepi yaShilongo, owa yelitha kutya [Shilongo] okwa kala ha hingi ombesa okuya koJohannesburg nolundji okwa li ha fala Aanamibia mboka haya ka landa iinima yawo koSouth Africa opo ye yi landithulule moshilongo.

Sho a ponokelwa otaku hokololwa a kuthaa ongodhi ye yopeke noshimaliwa.Omunashipundi gwehanganokalelipo lyaahingi yootaxi noombesa lyedhina Namibia Bus and Taxi Association, Pendapala Nakathingo okwa popi kutya ombelewa yawo oya lopotelwa oshiningwanima shoka, notaye shi ningile omakonakono.

“Otwa gumwa lela koshiningwanima shoka ongehanganokalelipo, notwe shi tala ko ongoshinima oshinene. Otuli pamwe nomuhingi ngoka Shilongo, e li oshilyo shetu,” osho a popi ngaaka.

“Tse ongehangano otatu londodha owala aahingi yalwe ya tale ko oshiningwanima shoka ongoshinima oshinene, nosha ningilwa mukwetu,” osho a popi ngaaka.

Okwa gwedha po kutya Shilongo okwa li owala ta kambadhala okwiilongela kuyemwene opo i imonene shomboloto, sho a ningilwa omuyonena ngoka. Shilongo onkene e li moshipangelo nonkalo ye inayi tseyika kutya oyi li ngiini.

Oshiningwanima shoka oshi ingaana kiikundaneki yopankalathano komalungula mehuliloshiwike lya piti sho kwa tulwa omathano nuuvidio tawu ulike nkene a monithwa oshiponga, nokwa kanitha omeho ge.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.