Omulumentu i imangelekele mondholongo

OMULUMENTU gwomimvo 20 okwi imangeleke mondhololongo yaShomeya, sha ningwa mEtine lwopethimbo lyomwiha.

Omupopiliko gwopolisi, Elifas Kuwinga, okwa popi kutya nakusa George Kativa okwa kala mondholongo okuza muNovemba 2021, moshipotha shedhengo nelalakano lyokweehameka omuntu, nolwanima okwa pewa egeelo lyofuto yooN$7 000.

“Okwa pewa egeelo lyooN$5 000 nenge oomwedhi 24 mondholongo, osho wo egeelo lya gwedhwa po lyooN$1 000 sho a yonagula omaliko nenge egeelo lyoomwedhi hamano konima yekumba. Okwa pewa wo egeelo lyooN$1 000 sho a adhika niingangamithi omanga li mondholongo nenge a kale mondholongo oomwedhi hamano moshikoya shoka.

“Omulumentu ngoka kali ta vulu okufuta egeelo lyoshimaliwa shoka a pewa, onkene okwa shunwa mondholongo. Lwanima aanandholongo aakwawo oye mu itsu i imangeleka,” osho Kuwinga a popi ngaaka.

Monkundana onkawo yoluhodhi, omulumentu gwomimvo 37 okwiimangeleke mOlyomakaya sha ningilwa momukunda Ondjondjo moshitopolwa shaShana. Otaku hokololwa kutya Abiasi Ihalwa ngoka ha longo metanga lyegameno, okwa mana oondjenda sho imangeleke. Pethimbo lyoshiningwanima okwa adhika e li mefudho nokwa li ha longele kokamba yaakwiita koGrootfontein. Ina thiga ko ombapila yeikuthomwenyo naapambele ye oya tseyithilwa nale onkundana yoluhodhi.

Pokati mpoka, Kuwinga okwa popi kutya opu na uumbanda opo kakadhona gwomimvo ntano ngoka a kana mEtine lwopotundi 16h00, a kale a lika po nale koongandu.

Kakadhona ngoka otaku hokololwa a li a yi nayina ye kiiyoge momulonga pethimbo lyoshiningwanima.

“Omanga ta yogo omwana, yina okwa zi mo kashona momulonga a ka tale iikutu mbyoka ya li koontuni, nomokugaluka okwa mono okanona ke ka yakulwa po kongandu nokuningina,” osho Kuwinga a popi ngaaka.

Olukongo lwokanona hoka olwa tameke konima yoshiningwanima shoka, ashike sigo onena ina ka monika.

Pokati mpoka, omulumentu gwomimvo 21 okwa mana oondjenda mEtitano sho a dhengwa kolusheno sha ningilwa momukunda Ou-Cordon moshitopolwa shaKavango Uuninginino.

Omukwatakanithi gwomakonakono giimbuluma moshitopolwa shoka, komufala Josephat Abel okwa koleke oshiningwanima shoka.

Abel okwa popi kutya Ncame Mise, ngoka a li omusita gwoongombe momukunda gwawo okwa li a londo kopaala yolusheno nokwa kwatwa kolusheno nokwiidhenga pevi. Lwanima okwa mana oondjenda.

“Omudhimba ogwa falwa nale kokila yaRundu opo gu ka ningilwe omakonakono,” osho Abel a popi ngaaka.

OMUKOKELE A DHENGAGULWA

Pokati mpoka, opolisi yoshitopolwa shaKunene oya tula miipandeko aakwashigwana yahetatu yomomukunda Otjakati Tjovahimba sho taku hokololwa ya dhengagula omukokele gwomimvo 61 ngoka ya popi kutya omulodhi.

Omukiintu ngoka okwa dhengagulwa mOlyomakaya naafekelwa oye li pokati komimvo 15 sigo 30.

Pauyelele wepeko lyopolisi omukiintu ngoka okwa dhengagulwa nomamanya noondhimbo komutse, kombunda nokomagulu.

“Nakuninga oshihakanwa okwa monithwa oshiponga noonkondo. Aafekelwa yahetatu oya tulwa miipandeko noya holoka mompangu yamangestrata gwaPuwo ohela. Omakonakono gopolisi otaga pula komeho,” osho opolisi ya popi ngaaka, uunambo.

Moshiningwanima sha yooloka, omukiintu gwomimvo 19 omvalele ya Angola otaku hokololwa a hahala omukiintu nekatana momutse, sha ningilwa molukanda lwEkolola mondolopa yEenhana. Olugodhi pokati kaakiintu mboka yaali otaku hokololwa lwa holoka sho ya li taya tamanana kombinga yomulumentu. Omufekelwa ngoka okwa tulwa nale miipandeko nomakonakono gopolisi ogeli metifa.

Monkundana onkwawo, molukanda lwaKahenge 2 momukunda Ohengobe moshitopolwa shaHangwena otamu hokololwa aafekelwa yatatu ya ponokele omukiintu gwomimvo 29 sho ya tete ombashu moka a li noshinima inaa shi tseyika, sha ningwa mEtitano. Aafekelwa mboka otaku hokololwa ya li ya homata oombele, oya kwata pothingo nakuninga oshihakanwa noye mu ningile omatilitho omanga ye mu ulika ombele momutse. Oya tameke oku mu pula oshimaliwa nagumwe gomaafekelwa okwa li nokuli a ningi onkambadhala yoku mu kwatonkonga.

“Oye mu shata nombele noku mu pula iipatululo yondingosho. Aafekelwa mboka oya patulula ondingosho nokukutha mo iimaliwa ayihe mbyoka ya li mompungulilo yiimaliwa, noya yaka mo wo natango oodhewa dha li mo dhoProtex,” osho mukanda gwopolisi gwa popi ngaaka.

Aafekelwa mboka kaaye shiwike, oya fadhuka po niimaliwa, oothewa 27 dhoProtex, osho wo oongodhi dhopeke mbali (oSamsung A2 osho wo oHisense).

Omufekelwa gumwe okwa tulwa nale miipandeko nayalwe oye li we mokashoko.

EKWATONKONGA

Kamatyona gwomimvo 15 okwa tulwa miipandeko mEtitano sho a kwatonkonga okakadhona komimvo ntano sha ningilwa momukunda Oshilunga moshitopolwa shaShikoto. Otaku hokololwa kutya kakadhona ngoka okwa li a thigwa megumbo namumwayina sho yinakulu a zi mo.

Omufekelwa otaku hokololwa e ya megumbo ndyoka nokwa adha nakuninga oshihakanwa a kotha. Sho a yi mondunda okwa kwata kakadhona ngoka koonkondo. Nakuninga oshihakanwa okwa li a falwa koshipangelo shaNandjokwe a ka mone uuhaku.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.