Omulumentu ha hupile mokulanditha oondooha

Ethano: Charlotte Nambandja TAYA NYANYULA OONDOOHA … Methano ndika otamu monika Alfred Gereseb (kolumoho) ta kwathelwa kuhekulu Immanuel Gereseb (kolumoho) okunyanyula oondooha ndhoka ha kongo opo a ka landithe kehala lyiikwatenda, opo i imonene shomboloto.

Omanga oyendji mboka kaaye na iilonga ye li momagumbo netegameno kutya onkalo onayi ka tya po hwepo monakuyiwa, omugundjika Alfred Gereseb (26), ngoka ngashingeyi omunuulema molwashoka okwa kanitha okugulu, oha kwata ondjuhwa komulungu ongula kehe a ka nyange.

Gereseb oye gumwe ta gandja oshiholelwa kuuyuni kutya uulema itawu ti omuntu ita vulu okulonga sha, noha pendula aluhe ongula molukanda lwoombashu lwa8ste Laan mOtjomuise mOvenduka, ta ka konga oondooha opo a landithe.

“Ohandi penduka ongula kehe lwopotundi 04h00 okuya pomatungilo goositola nenge nda landula omagumbo gomondolopa ndi konge oondooha momandoloma giiyagaya uuna omaloli gamuni taga ile po iiyagaya yomomandoloma,” osho a popi ngaaka.

Gereseb okwa popi kutya okukanitha okugulu inaku mu ninga nande oshihakanwa.

“Ondi na okutsikila tandi kongo odola moosenda 15 opo ashike ndi imonene iiyemo.”

Okwa popi kutya okwa kanitha okugulu kwe konima sho a pumwa koshihauto oomvula hamano dha piti mOkahandja, moka a putukila.

Oshihauto shoka she mu pumu osha fadhukapo mbala konima yoshiningwanima.

“Aavali yandje oya hula ko nale, nohandi zi kookuku. Elago oondyoka kutya ondina ombashu yandje yi li nawa nonda pandula okukala kaandi li momapandaanda, moka kwa li handi zi nokwa li handi lala kohi yoontopa,” osho a popi ngaaka.

Gereseb okwa hokolola kutya shampa owala e na mpoka ta zi, e na iikulya osho wo iikutu ya yela, nena okwa nyanyukwa ngaaka noke na nande uupyakadhi wa sha.

Okwa popi kutya okwa pandula okukala e na omwenyo.

“Onda tokola ndi tembukile kOvenduka molwashoka okwa li ndi na uumbanda wokushekwa kwaamboka twa putuka nawo nokupulwa kutya okugulu kwandje onde ku kanithile puni,” osho a popi ngaaka.

Gereseb, ngoka e na okanona kamwe, okwa popi kutya ota nana nondatu okukwathela omwana, ngoka a kala nayina kofaalama tayi adhika popepi nOkahandja.

“Ohashi uvitha ndje nayi okukala ndi na okanona ashike otandi nana nondatu oku ka kwathela. Ondiwete nda fa nda ndopeka ofamili ndjoka nde eta po,” osho a popi ngaaka.

Gereseb omasiku ga zi ko okwa monika a humbanda oplastika yu udha oondooha, ta kwata olefa.

Okwa popi kutya okwa li u uka kegumbo okuza koPionierspark hoka ha ka toola oondooha.

Omanga i ipyakidhila nokuyoga iikutu ye, okwa popi kutya kapu na shoka tashi mu yi moshipala opo kaa ninge oonkambadhala dhokwiinyangela, opamwe naanegumbo lye.

“Ihandi mono mo iimaliwa oyindji, ashike okumona mo shi li pokati koN$50 noN$100, oshihwepo ngaa, shi vule omuntu kuunasha,” osho Gereseb a popi ngaaka.

Okwa popi kutya osikola ineyi mana molwashoka kapwa li ngoka te mu futile.

“Onda taamba ko onkalo yandje, nondi shi kutya ngele inandi ilongela sha, nena kapu na ngoka teshi ningile ndje.”
Gereseb okwa popi kutya okuna ethaneko lyaashoka ta kala ta ningi ethimbo ndika lyomatango omanene.

“Ondi na etegameno lyokutoola oondooha odhindji opo ndi mone oshimaliwa oshindji ngame ndi kale wo ndi ikongela iikulya tayi tungu,” osho a popi ngaaka.

Yinakulu gwaGereseb, kuku Martha Thirases (62) okwa popi kutya omutukulu gwe “okanona okawanawa”, hoka ka li hake mu kwatha nomanga inaa ninga oshilema.

Hekulu, Immanuel Gereseb (66), okwa popi kutya oha kwathele omutekulu gwe mokunyanyula oondooha dhe, omanga ineedhi fala hoka hadhi ka landwa po.

Omushiinda shaGereseb, Geraldine Salon (23), okwa popi tati: “Onde mu tseya pwa pita ngashingeyi omvula, notandi vulu oku shi kalela po kutya oha longo nuudhiginini. Nonande okuna uulema, onkene ha longo kehe shimwe kuyemwene. Shoka nde shi mono sho a dhike po ondunda ye yemwene,” osho a popi ngaaka.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!