Opolisi oya tula miipandeko omulumentu gwomimvo 40 sho taku hokololwa a fulu ombila yokanona nokwa kutha mo iipongo.
Omupopiliko gwopolisi moshilongo, omupevikomufala Kauna Shikwambi okwa popi mOmaandaha kutya omulumentu ngoka okwayi komawendo nokufula ombila yokanona koomvula mbali hoka kwa li ka fumvikwa muApilili numvo, noshiningwanima shoka osha ningilwa momudhingoloko gwaTsintsabis moshitopolwa shaShikoto.
Shikwambi okwa popi kutya omawendo ngoka oge li owala omukaakena gwookilometa 200 okuza pegumbo lyomufekelwa.
Okwa gwedha po kutya oshiwike sha zi ko aakwanezimo yokanona hoka oya dhimbulula ombila yonona ya yonagulwa, noya ningi onkambadhala yokuninga omakonakono.
Oya landula ompadhi okuza pombila naashoka oshe eta sigo ya thiki megumbo lyomufekelwa. Oya tseyithile opolisi nomegumbo ndyoka omwa hadhwa, shoka she eta yi itse miitopolwa yimwe ngaashi omutse gokanona osho wo iipongo yilwe.
Omufekelwa okwa holoka mOmpangu yaMangestrata gwaTsumeb, ohela. Omakonakono gopolisi otaga pula komeho.
Monkundana yilwe, opolisi yoshitopolwa shaZambezi otayi ningi omakonakono gomudhimba gwomukulupe gwomimvo 62 ngoka gwa adhika momudhingoloko gwaSangwali mehuliloshiwike. Nakusa okwa hololwa kutya oye kuku Voster Maxson Mambo.
Aapambele ye oya tseyithilwa nale onkundana yoluhodhi.
Omupopiliko gwopolisi yaZambezi, inspekta Kisco Sitali okwa koleke onkundana ndjoka koshifonkundaneki shika. Okwa gwedhapo kutya Mambo okwa li a lopotwa a kana mEtiyali lya zi ko.
“Uumbangi owu ulike kutya okwa mana oondjenda sho i imangeleke. Ashike nando ongaaka, omakonakono gopolisi otaga pula komeho,” osho a popi ngaaka.
Pokati mpoka, omudhimba gwokanona koomwedhi ne ogwi itsuwika molukanda lwUutala mOndangwa, mEtine lya zi ko.
Pauyelele wopolisi olutu ndoka olwi itsuwika komulumentu mehala lyoondunda dhokuthithwa mUutala. Opolisi oya gwedha po kutya ina ku tulwa natango omuntu gwa sha miipandeko mekwatathano noshiningwanima shoka. Omakonakono gopolisi otaga pula komeho.
MoRehoboth, aafekelwa yaali, gumwe okuna omimvo 18 omanga gumwe 19, oya tulwa miipandeko sho taku hokololwa ya tsu nokudhipaga omulumentu gwomimvo 20, sha ningwa mOlyomakaya.
Nakusa okwa hololwa kutya oye Brandley Brandon Nuseb.
Opolisi oya popi kutya aafekelwa naNuseb okwa li taya nwine pamwe, sho olugodhi lwa tukuka shoka she eta a tsuwe noshinima sha honga lwokepepe lyokolulyo.
Nakusa otaku hokololwa a zi po te ende nolwanima okwo ongotele nokwa hulitha. Oshe etithi shoontamana dhe eta olugodhi inashi tseyika.
Monkundana yilwe, kamatyona gwoomvula 16 okwa hupu moshiponga sheshina lyokolutenda ashike okwe ehamekwa, sha ningilwa mOkahandja.
Pauyelele wopolisi oshiningwanima shoka osha ningwa komatango gEtine lya zi ko, pehala lyomataagulukilo gondjila yeshina komeho gositola yoMultisave Supermarket mOkahandja.
Kamatyona ngoka otaku hokololwa kwa li ta kambadhala okutaagulula opate yeshina lyokolutenda sho a pumwa. Okwa falwa koshipangelo notaku hokololwa kutya okuli monkalo tayi nuwa omeya.
OMAKWATONKONGA
Kakadhona gwomimvo 15 otaku hokololwa a kwatwonkonga mEtitano pethimbo taku hokololwa a li a ka konga oondongi, sha ningilwa momukunda Onamatende, moshitopolwa shaShikoto.
Opolisi oya popi kutya omufekelwa gomimvo 28 otaku hokololwa kutya petameko sho a yapukile kakadhona ngoka, okwe mu lombwele kutya ote mu kwathele molukongo lwoondongi, ashike lwanima okwe mu kwatonkonga.
Omufekelwa okwa tulwa nale miipandeko nokwa holoka mompangu yamangestrata gwaNdangwa, ohela.
Opolisi natango oya lopota oshiningwanima shekwatonkonga mOngwediva, sha ningwa mEtitano sho taku hokololwa omukiitu gwomimvo 31 a kwatwonkonga kukuume ke gwomimvo 48.
Otaku hokololwa kutya ookuume mboka oya li pamwe taya nu, nolwanima omulumentu okwa kwatonkonga omukiintu ngoka. Omufekelwa okwa tulwa nale miipandeko nomakonakono gopolisi otaga pula komeho.
Moshiningwanima sha yooloka, kakadhona gwomimvo 16 okwa kwatwonkonga kaanona yaali yaamati, sha ningilwa momudhingoloko gwaGrootfontein moshitopolwa shaTjozondjupa.
Aafekelwa otaku hokololwa ya fadhukapo konima yoshiningwanima shoka, ashike oye li we mokashoko komiya dha shinana.
Nakuninga oshihakanwa okwa falwa koshipangelo opo a ka mone uuhaku.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
