Opolisi yaNdangwa oshiwike sha zi ko oya tula miipandeko omulumentu gwomimvo 35 ta tamanekelwa olunyala mefuto lyoshimaliwa shooN$385 000 shoka shi li oshitopolwa shoshipotha shuukengeledhi shoomiliyona N$2.1 shoka taku hokololwa sha yakwa moSanlam Namibia.
Vitalis Nepembe, a tseyika nawa nedhina “Dax”, okwa tulwa miipandeko ta tamanekelwa olunyala muukengeleledhi weyako lyoshimaliwa shoka, nota fekelwa kutya okwa longa uulingingili.
Onzonkundaneki yina uuyelele kombinga yoshinima shoka oya popi kutya Nepembe okwa taamba oshimaliwa shooN$385 000 okuza kuClaudia Martin, ngoka wo ta tamanekewa uukengeleledhi woshimaliwa shi li poomiliyona 1.2 okuza moSanlam Namibia.
Oshimaliwa shoka okwa li sha futwa konima sho iizemo yolabora yaElizabeth Elifas taku hokololwa kwa li ya gandjwa paifundja okuulika kutya Martin ote ehama opo ya vule okukutha oshimaliwa moSanlam okupitila mekwashilipaleko sha ningwa muDesemba 2024.
Nepembe, ngoka e li oshitopolwa shongundu yaafekelwa 21 moshipotha shoka, okwa holoka lwotango mOmpangu yaMangestrata gwaNdangwa mEtitatu.
Okwa kalekwa mondjeedhililo nokwa tegelelwa a galukile mompangu nena a tale ngele ta pewa oboloha.
Gumwe gwomaafekelwa moshipotha shoka oye Abner Mateus ngoka ta ku hokololwa a kala ta dhana oongeshefa dhuukengeleledhi dha yooloka omanga e li mondholongo.
Matues otaku hokololwa wo kutya oye omudhaninkandangala meponokelo lyomutamaneki gwomOndangwa, Justine Shiweda, moshiningwanima shoka sha ningwa muKotoba omumvo gwa zi ko.
Poshiponokela shoka otaku hokololwa Shiweda(32) a yahwa lwiikando iheyali nokwa tilwa uuzigo.
Okwa mana oondjenda numvo muFebuluali.
