Sandy Katjimune, omonakadona wamumwaina womukalimo womoKatutura John Katjimune, okwa ti xekulu oku na efupa yee ota kendabala okulandifa po eumbo lofamili ta fiye ovanhu vahapu vofamili vehe na apa tava di.
Sandy eshi a popya noThe Namibian Etine la dja ko okwa ti tatekulu waye John okwa kala nale ta kendabala okulandifa po eumbo okudja ngaa eshi inakulu Alberdine Katjimune a xula ko momudo 2000 muKotomba.
Alberdine omeme waJohn.
The Namibian okwa li a lopota oshivike sha dja ko kutya mumwaina Utoni Nujoma nomumwainakadona Usata Imbili otava ti eumbo laAlberdine olavo.
John okwa ti vati okwa hala okulandifa po eumbo ndee tava topola oshimaliwa navamwaina vavali.
John vati okwa ti vali Utoni okwa teya po eumbo muJanuali 2020 ndee tali longululwa ina pula epitikilo kuye. Okwa ti vali Utoni oo e li ominista yoinima yapamba oilonga nokweeta eemhito doilonga, okwa pula opo a lande po eumbo olo.
“Meekulu wange okwa li a pewa eumbo kumumwaina, Kovambo, eshi kwa li a ya kombada (Kovambo) kakwa li a hala mumwaina a dje mepandaanda.”
Sandy okwa ti eumbo kali li mefiloshisho laJohn. Pefimbo opo eumbo kwa li tali longululwa kuNujoma, Sandy okwa ti xekulu John okwa li eshi shi ndee ta efa elongululo leumbo li ye komesho.
“Ina kelela tatekulu Utoni opo aha longulule eumbo. Ashike nee, okwa ti okwa lombwela ovanhu molukanda kutya okwa teelela ashike eumbo li pwe okulonga opo li kale li na ongushu i li pombada a dule okulilandifa po,” Sandy osho a ti ngaho.
Sandy okwa ti omananafano oinima yofamili ashike inai kwatela mUtoni naImbili. “Kashi na naUtoni ile naUsuta. Omananafano okuli pokati kange naNdeshi (John),” Osho a ti ngaho. Sandy okwa holola kutya yee ita yambidida edilaadilo laxekulu lokulandifa po eumbo lofamili, olo la idilila ovanhu vahapu vofamili. “Omo hatu di omu.
Omulumenhu ou oku na efupa. Oku na eengunga odo e na okufuta ndee paife ota kendabala okulandifa po eumbo opo a fute eengunga daye ndee ke wete kutya ota teya po eenghalamwenyo dovanhu vahapu ngee okwa ningi oshinima shi li ngaho,” Osho a ti ngaho.
Sandy okwa ti xekulu iha futu oiniwe yaMuni oyo ya eta opo olusheno nomeva a tetwe ko.
Natango Sandy okwa ti xekulu John kakwa li nande a fininikwa opo a fiye po eumbo, ashike eumbo okwe li fiya po shi li pahalo laye opo a ka dje nakakadona waye, oo konima yefimbo a ka ninga omukulukadi waye. “Omunhu iha pandula molwefupa laye,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
