Omulumenhu (33) okwa li a tulwa moipandeko mOshomeva konima vati a hangika e na ombelela taku feekelwa kutya oya vakwa, yongushu yoshimaliwa shi fike poN$3 500.
She likolelela kolopota yoimbuluma yopolifi yaNamibia yomexuliloshivike, omutamanekwa okwa li a mangwa po Oshoondaxa lwopotundi 11h00 meumbo moSoweto mOshomeva moshitopolwahoololo shaShikoto.
Omupopiliko wopolifi woPashiwana omupedu komisina Kauna Shikwambi okwa ti omutamanekwa okwa dopa okuyandja efatululo la yela kutya ombelela oya dja peni.
“Eedingu dongobe da kukuta, dongushu yoN$3 500, okwa li da kufwa ko,” osho a ti ngaho.
Moshiningwanima sha yooloka shoumbudi woimuna, oshikombo okwa li vati sha vakwa ndee tashi dipawa kOkakoko mOmuthiya Etitano.
Otaku tiwa vati omutamanekwa okwa vaka oshikombo shimwe koshuunda shanakulopota ndee te shi dipaya.
Nakulopota natango okwa mona vali oikombo ivali yoikadi oyo ya dipawa moshuunda shaye.
Ongushu yoikombo ei itatu otai tengenekelwa poN$2 500.
kapu na omunhu a mangwa po nomakonakono opolifi otaa twikile.Moshiningwanima sha yooloka olutu lomukainhu (20) ola hangika komukunda Yinsu moshitopolwahoololo shaKavango Uninginino Etitano.
Oshiningwanima okwa li sha kolekwa komupopiliko wopolifi wopashiwana omupedu Kauna Shikwambi molopota yoimbuluma yopolifi yexuliloshivike Oshoondaxa.
“Olutu laJohanna Joseph, omukainhu Omunamibia womido 20, okwa li la hangika monduda yokunangala kumumwaina,” Shikwambi ta ti.
Okwa ti kaku shiivike osho sha etifa efyo noina pahangika nande omukanda u na ouyelele welikufomwenyo.
Ovakwapata vaJoseph ova shiivifilwa.
Moshiningwanima vali shimwe sholudi eli, olutu laAntonio Platt (45) okwa li langika meumbo lameme waye mOkahandja.
Otaku tiwa vati Platt okwe likufa omwenyo Oshoondaxa potundi 21h30.
“Kapu na nande oshinima inashi yela nawa tashi feekelwa, yee ina fiya po nande omukanda washa.
Olutu okwa li la twalwa kOkila yEpangelo mOkahandja kuteelelike oidjemo yomakonakono omudimba,” Shikwambi ta ti.
