Omulumenhu a dipaya omukulukadi waye mOvenduka

OMUKULUKADI oo a tuwa fiyo omefyo oshivike sha dja ko koRocky Crest mOvenduka komushamane waye, okwa li e na oitwa ya kola kombinga yomahepeko opaukakwashikekookanhu nokwa ti ovalumenhu ove shi ninga omukalo ndjiikilile okuhepeka oomeme.

Ovakwapata vaHelen Onesmus (43), oo a ningilwa omahepeko omafiku aa ova ulika omushangwa oo kwa li a shanga kepandja laye lomalungula mo2019, omo kwa li ta denge omufindo kombinga yomahepeko.

“Osha ninga omukalo ndjiikilile kovalumenhu vamwe, ngee a mane okudenga, oha dipaya, ohandi ku lombwele eshi inashi ifanwa vali edipayo medina lohole, shaashi kamu na ohole moshinima shili ngaho,” Oshipambu she tumwalaka laOnesmus osho sha ti ngaho.

Omupopiliko wopolifi inspekta Elifas Kuwinga, okwa ti omushamane waOnesmus oo taku tiwa oku li meedula dayuka po50, okwe mu twa nokakonde oikando ihapu, osho sha eta efyo laye nosha ningilwa konima yeumbo lavo.

Kuwinga okwa ti ovalihomboli ava okwa li ve li meendjidikila dokuteya ohombo, okwa li tave lidenge meumbo eshi omufeekelwa a twa Onesmus, osho sha eta efyo laye. Kuwinga okwa ti omufeekelwa okwa li ta kendabala okulikufa omwenyo noku li ta mono ouhaku moshipangelo shepangelo shaKatutura mOvenduka omanga e li koshi yetonatelo lopolifi.

Opolifi oya hanga po okakonde, eengodi dopeke mbali neembele di li nhatu da hangika opo pa ningilwa oshiningwanima.
Omufeekelwa otaku tiwa okuli monghalo i li xwepo.

Oshifo shoThe Namibia itashi holola natango oukwatya womufeekelwa shaashi ina holoka komhangu natango.

OKWA KENDABALA OKUPOPYA

Umwe womovakwapata vaOnesmus, Shekupe Onesmus, okwa lombwela oThe Namibian Oshoondaxa ta ti nakufya okwa kendabala okupopya naapopepi vaye ta ti ovapumbwa okushakena.

“Mokatumwalaka kaye ka xupi ka xuuninwa, okwa ti natu ye komusha,” Shekupe Onesmus osho a ti ngaho.

Okwa itavela kutya okatumwalaka ka mumwaina ka xuuninwa okwa li ta pula ekwafo.

“Omushamane wa ye ka li nande muhau fiyo efiku olo oshiningwanima osho shi tilifa sha ningwa, ka kwa li tu shi ngee ota dulu okumweehameka kolutu,” Osho a ti ngaho.

Shekupe Onesmus okwa ti, okwa li ookaume nonghee okwe mu hokololela nghee e na omutima tau luluma. Okwe mu hokololela ta ti okwa li omunhu ou ha fimaneke oitya yaye yee iha shuna monima ngee ta ningi omatokolo aye opo a xulife po oshinima shonhumba.

Shekupe Onesmus, okwa pula opo keshe umwe e li monghalo ya faafana opo a manguluke ndee ta popi, okwa pila vali ovanhu opo va ninge ehokololo lamumwani oshilongwa opo va fiye po eenghalo di li ngaho omanga oinima inai naipala.

“Sha Helen osha dja pu0 fiyo 100, ashike kovanhu vamwe otashi dulika sha tameka nale. Ninga omatokolo oye ino tila okupopya, ndele tava kongo omahekeleko kovakwapata vavo,” Osho a weda po ngaho.

Onesmus okwa li oye mu shona kuvakwao ve li vaheyali, yee okwa li omeme wokaana kokamati keedula 14 oko kwa li ka kofa pefimbo a li ta dipawa.

Ovakwapata vaye ova ti yee nomushamane waye okwa li ovaholike kosekondele ndee tava shakene konima yeedula di shona ndele tava hombola.

Omupopiliko wopolifi moNamibia komufala Kauna Shikwambi, okwa lombwela oThe Namibian kutya oibofa yomahepeko opaukakwashikekookanhu i li lwopo380 okwa li ya lopotwa moitopolwahoololo i li ihamano pefimbo loivilo yomatango manene.

Oitopolwahoololo oyo nee, Zambezi, Oshikoto, Kavango, Otjozondjupa, Omusati naKunene.

“Omahepeko a hapu otaa ningwa momaumbo notaa ningilwa unene oomeme nounona, omanga oonakuninga omahepeko oludi eli ovanailonga vomomaumbo novakwapata ovo hava di meumbo,” Shikwambi osho a ti ngaho.

Oibofa 100 ohai lopotwa keshe omwedi. Omunawino moikumungu youkakwashikekookanhu nomaameno ounona, Veronica Theron okwa ti oshinima shimwe osho tashi eta oimbuluma yopaukakwashikekookanhu omalukalwa oo itaa longo moshilongo. The Namibian okwa lopota odula yadja ko ta ti omalukalwa epangelo e nasha nomahepeko oludi eli aeshe e li ahetatu moshilongo kape na eli tali longo.

“Ovanhu ovo ve na okuyandja omayakulo ngee va lopotelwa ihava fiki diva unene tuu shi nasha noyeendifo,” Theron osho a ti ngaho.

Okwa ti vali ovayakuli ihava kala po poilonga pefimbo ovanhu tave ya okulopota oibofa yavo, eshi okwa ti osha etwa unene kefimbo eli oiningwanima ei hai ningwa, ihapu ohai ningwa konima yo17h00 ile momaxuliloshivike.

Threon okwa twa omukumo ovo hava kala va hala evatelo shi nasha noimbuluma yoludi eli opo va kale hava ka lopota koungudu vokwaamena ovanhu koimbuluma yoludi eli.