Omulongi ngoka a dhipagwa a tongononwa ongomupenda

Aapopi ya yooloka pethimbo lyoshituthidhimbuluko shaNathanael Nghihalwa (39), oye mu tongonona kutya okwa li omukwatheli, omupenda nokwa li ha longo nuudhiginini.

Nghihalwa, ngoka a li omulongisikola posikola yedhina Oshali West Combined School moshitopolwa shaHangwena, okwa dhipagwa komuntu nenge kaantu kaayeshiwike ongulohi yomasiku 11 Novemba momukunda Oshikuyu. Sigo oompaka oonakumudhipaga inaya tulwa miipandeko.

Oshituthidhimbuluko shaNghihalwa osha ningwa poshigumbo she mEtitano, nokwa fumvikwa mOlyomakaya. Omuniilonga pamwe naye, Immanuel Sheehama, okwa tongonona Nghihalwa ongomulongi ngoka a li ha longo nuudhiginini.

“Okwa li ha longo oshilongwa sho-Physical Science noLife Science mondondo ontihetatu sigo onti-10. Okwa li omulongi omwaanawa, ha longo neitulemo nokwa li aluhe ha thiki pethimbo. Okwa li ehole lela iilonga ye,” osho Sheehama a popi ngaaka.

Sheehama okwa popi kutya Nghihalwa okwa li ha kwathele aanasikola ayehe posikola. “Okwa li ha landele aanona mboka ye li mompumbwe omizalo dhosikola, iikwathitho yelongo osho wo iikulya.” Okwa popi kutya ka kale kokukala omulongisikola, Nghihalwa okwa li omudhani-tanga omwaanawa nokwa li omuholi gwomaudhano ga kwalukehe.
“Nathanael okwa li omuntu gwombili, omumweni nokwa li kuume ka kehe gumwe.

Otu na omaipulo ngele onatu ka mona we ngaa omuntu e mu fa,” osho a popi ngaaka, nokwa gwedha po kutya pethimbo lyiigongi yawo yomombelewa, Nghihalwa okwa li aluhe ha gandja omayele nomakumagidho omawanawa.

Okwa popi kutya Nghihalwa okwa tameke okulonga posikola yOshali West Combined School mo2009 sho kwa li owala omulongi gwopakathimbo nolwanima okwa tsikile ongomwiiyambi naashoka oshe eta a pewe onkatu tayi kalelele.

Omutaleli gwoshikandjolongo shEndola, Simon Vaeta, okupitila metumwalaka lye ndyoka lya leshwa peha lye komukuluntusikola gwOshali West, Simulya Kingsley, okwa tongonona Nghihalwa ongomulongi omupenda ngoka a kwathela noonkondo mehumokomeho lyaanona Aanamibia. “Ezepo lye olya thiga omwaka ngoka tatu ka nyengwa okuthitika,” osho Vaeta a popi ngaaka.

Gumwe gwomaalongwa yanakusa Nghihalwa, Ndapandula Titus, okwa popi kutya nakusa okwa li he ya ihumbatele ongoyana naaluhe oheya pe omukumo yi ilonge neitulemo.

Okwa popi kutya omulongi gwawo Nghihalwa okwa li he ya dhenge uuna ya ndopa iilongwa ye.

“Shoka okwe shi ningi molwashoka okwa li a hala twi ilonge twa mana mo. Okwa li omulongi hetu pe omakumagidho omawanawa, noha landele aalongwa omizalo dhosikola kwaamboka ye li mompumbwe, nokwa wo e na olukeno natse. Okwa li e tu hole,” osho a popi ngaaka.

Tangeni Nghidulika, ngoka a gandja etumwalaka peha lyaahikingalo, okwa popi kutya eso lyaNghihalwa olye ya guma noonkondo moshigwana shaahikingalo.

Okwa popi kutya Nghihalwa okwa kala ha hiya aahikingako okuza kOmungwelume opo yu ulike iipewa yawo moongalo, pondingosho ye. “Thabo[Nghihalwa] otwe mu tseya ongomuntu ihaa kwatakwata nokwa li ha longo nuudhiginini okwa adha shoka ta lalakanene.

Okwe tu kwatha pashimaliwa nokwa li a hala oku tu mona tatu yambuka po. Eso lye olye tu dhenga pevi. Olya hulitha po uukume ketu noondjodhi dhetu. Mboka ye mu dhipaga naya tulwe miipandeko,” osho a popi ngaaka.
Nghihalwa okwa thigi ko omukulukadhi gwe Emilia, aanona ye yatatu naamwayina yaali.