Omulilo posikola yomOshana gwa tilitha omukuluntusikola naalongi

SHA landula omulilo ngoka gwa hanagula po iipundi, iitaafula nomambo gaanona moongulusikola dhimwe posikola yUukwiiyongwe Combined Schoool moshitopolwa shaShana mOlyomakaya, natango ogwa galuka ongulohi yOsoondaha.

MOlyomakaya, omulilo ngoka ogwa yonagula oongulu mwa kwatelwa ndjoka yokupungulila, iipundi niifaafula, omambo osho wo iinima yilwe ngaashi oombiga, uutoololi nomandini gomeya.

Sigo oompaka inaku tseyika kutya oshe etithi shomulilo ngoka gwa holoka posikola, omasiku ga landulathana.

Moonkundathana noThe Namibian uunambo, omukuluntusikola ta kwathele, Tronella Shivute okwa popi kutya omulilo ngoka ogwa tameke koongulasha lwopotundi 03h00.

Shivute okwa hokolola kutya omulilo ngoka ogwa dhimbululwa kusekuliti ngoka a lala miilonga esiku ndyoka.

“Omulilo ngoka okwa li owala tagu fike omambo nomafayela ngoka ge li moosikopa dhomambo. Sigo oompaka, katu shi kutya oshe etithi shomulilo ngoka oshike. Ongulusikola ndjoka ya pi okwa li ya pata nomakende okwa li ga patwa. Ongulusikola ndjoka oyi li metungo lyi ilile nonkene oyo hatu longitha ongombelewa yetu yokutula omambo osho wo iikwathitholongo yilwe,” osho Shivute a popi ngaaka.

Okwa popi kutya omvula okwa li tayi loko pethimbo omulilo ngoka gwa tukuka.

“Pauyelele wasekuliti, okwa li mongulusikola yi li popepi naandjoka mwa li tamu pi ashike ina mona po sha nenge u uve ezimo lyomulilo.

Kakwa li olusheno esiku ndyoka nokwa li omilema noonkondo. Anuwa konima sho omvula ya sheka, sekuliti okwa yi pondje, nokwa longitha otoshe yokongodhi ye nokwa mono olwithi talu zi mongulusikola,” osho a popi ngaaka.

“Okuza mpoka okwa temeke okwi igidha nokukuga ta kongo ekwatho komagumbo ngoka ge li popepi naakwashigwana oye ya. Otwa tseyithila nale oshikondo shelongo kombinga yoshiningwanima shoka okupitila momutaleli gwetu notwa lombwelwa tu shange olopota yaashoka sha pya,” osho Shivute a gwedha po ngaaka.

OTASHI TILITHA

Shivute okwa tongonona oshiningwanima shoka ongoshinima tashi tilitha molwashoka osha ningwa omasiku ga landulathana. “Otashi halutha nokutilitha molwashoka otashi ende ngiini omulilo tagu tsikile nokugaluka? Katushi nokuli kutya oshike sha landula ko. Omulilo otagu ka fika ngiini omambo ngoka ge li moosikopa?”

Omunambelewa omukuluntu mombelewa yelongo moshitopolwa shaShana, Teopolina Hamutumua okwa popi kutya olopota ndjoka inayi thika natango mombelewa ye, ashike nando ongaaka okwa popi kutya okwe yi uvu okupitila miikundaneki.