Omukithi golwaga onkene tagu indjipala mOhangwena

Omukithi golwaga onkene tagu indjipala moshitopolwa shaHangwena, sho taku hokololwa kutya sigo oompaka omwa ndhindhilikwa aantu ya konda po5 000 ya monika omukithi ngoka.

Omukithi ngoka gwolwaga ogu na omukwawu, nomandhindhiliko geshiwike nawa omwa kwatela olutu talu nyu noonkondo.

Omumvo gwa zi ko, moshitopolwa shaHangwena omwa ndhindhilikwa iiningwanima yaantu ye li pokati ko400 no800 mboka ya pangwa miipangelo yepangelo moshitopolwa shoka.

Ngoloneya gwoshitopolwa shaHangwena, Walde Ndevashiya omasiku ga zi ko okwa popi kutya omwaalu gwaantu ya kwatwa kolwaga okwa li gwa londo noonkondo mo2022 sho gwa thiki paantu ye li 10 780, ashike nonumvo omwaalu gwaantu taya kwatwa onkene tagu indjipala, sigo oompaka moshitopolwa shawo omwa ndhindhilikwa aantu ye li 5 484 ya monika olwaga.

“Omukithi ngoka otagu pumbwa uuyogoki lela maakalimo yomoshitopolwa shetu. Iikutu, omalapi nomakumbatha oya pumbwa okukala tayi yogwa ethimbo kehe. Omakumbatha naga kale wo haga yanekwa pomutenya, opo oombahiteli ndhoka hadhi eta olwaga dhi se. Aakalimo mboka taya dhimbulula ye na oombulwa naya talele po mbala oshipangelo shi li popepi opo ya pangwe yo ya pewe omauyelele,” osho a popi ngaaka.

Ndevashiya okwa popi kutya oopelesenda 51 dhaantu mboka ya ninga oshihakanwa sholwaga, aanona mboka ye li pokati koomvula hamano sigo 10, omamga oopelesenda 26 odhaanona mboka ye li kohi yoomvula ntano.

“Oyendji yomaantu mboka oomboka ye li miikandjohogololo tayi landula ngaashi: shEngela, shaNdobe, shEndola, shEenhana osho wo shaKongo. Iikonga yokuyelithila aakwashigwana oya kala tayi ningilwa aaleli osho wo aakwashigwana momudhingoloko, nokwa li wo ya ningilwa aakuluntusikola osho wo aataleli yiikandjolongo. Uuyelele natango [kombinga yolwaga] owa gandjwa koshigwana okupitila moradio, noombapila dhomauyelele odha andjaganekwa maakwashigwana,” osho Ndevashiya a popi ngaaka.

Okwa gwedha po kutya onkalo yomukithi gwolwaga tagu indjipala oye ya pethimbo oshitopolwa shawo opo sha adhika tashi hwepopala kombuto yocorona ndjoka kwa li ya dhenge oshitopolwa shawo nayi.

Oonkambadhala okumona omukuluntuwiliki gwoshikondo shuundjolowele moshitopolwa shaHangwena, John Hango, odha hulile muunyengwi.

Ashike moonkundathana nonzonkundaneki ndjika omumvo gwa zi ko pethimbo omukithi gwolwaga kwa li tagu tyakaleke oshitopolwa shawo, Hango okwa li a londodha aakwashigwana opo ya kaleke omidhingoloko dhawo dha yela.

“Kalekeni omagumbo geni osho wo omalutu geni ga yela, iyoga nothewa osho wo omeya ga gomoka, molwashoka omukithi gwolwaga ohagu taandele mbala momidhingoloko ndhoka dha kaka,” osho Hango a popi ngaaka pethimbo ndyoka.

Olwaga omukithi ngoka gu na omukwawu nohagu taandele meendelelo – unene tuu momangundumano osho wo momidhingoloko dhomahala ngoka inaa ga silwa oshimpwiyu.

Aakalimo yomoshikandjohogololo shEngela, shoka osho shimwe shomiikandjohogololo ya gumwa, oya hokolola kutya etukuko lyolwaga otali tilitha, unene tuu okutala kutya oyendji mboka ya gumwa oomboka ye li momikunda.

Omukwashigwana Amalia Nghiyolwa okwa lombwele onzonkundaneki ndjika kutya oye li momalimbililo ishewe oye na uumbanda wokukwatwa komukithi ngoka gwolwaga.

“Ohatu kala mekwatathano naantu oyendji esiku kehe – noyendji ohaya zi komikunda taye ya okulanda iinima yawo mondolopa. Omathimbo gamwe ohatu landa iinima kuyo ngaashi yomomapya naashoka otashi ulike kutya ohatu kwatathana nayo. Otu na uumbanda molwashoka otashi vulika tu kwatwe kolwaga pethimbo lyomakwatathano getu gesiku kehe,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.