Omukalelipo woshilongo shedina United Arab Emirates moNamibia Mahash Al Hameli okwe likanyuna kutya ina ula omupedu pelesidente Netumbo Nandi-Ndaitwah kutya omunapolitika akulupa oo ha kofa pefimbo loyoongalele yopaunyuni.
Pelesidente wongudu yoLandless People’s Movement (LPM) Bernadus Swartbooi, pefimbo loshoongalele shokambaina koSchlip, okwa ti vati Al Hameli okwe mu lombwela oshinima eshi koPretoria, koSouth Africa, konima yeedula mbali da pita.
Pefimbo opo, Nandi-Ndaitwah okwa li ominista yomakwatafano opaiwana nosho yo elongelokumwe.
Swartbooi eshi kwa li ta popi moshiKhoekhoegowab noshimbulu, okwa ti Al Hameli okwa li a pula kutya omolwashike Ovanamibia “va hala omukulukadi womukulupe a ninge ominista yoipambele yopondje yoshilongo?”.
“Minista weni woinima yopondje ota kofa nale omanga oshoongalele natango shi li metifa ndee ngee oshoongalele sha pu hatu mu pendula tu ye pokafudo kotee nokonima natango ota kofa vali,” Swartbooi okwa ti Al Hameli osho e mu lombwela ngaho.
‘KASHI FI OSHILI’
Etitano, Al Hameli okwe likanyuna kutya ina lombwela Swartbooi kutya Nandi-Ndaitwah okwa kulupa ile oha kofa moyoongalele yopaunyuni.
Okwa lombwela oThe Namibian kutya okwa shakena naSwartbooi momafiku 22 Marsa 2023 ndee eenghundafana davo okwa li di li kombinga yeemhito deengeshefa kombinga yokuumbuwanhu waNamibia.
“Koneka kutya, eshi osho ashike oshoongalelel nda li ndi na naSwartbooi,” Al Hameli osho a ti ngaho.
Eshi oThe Namibian ya pula omupedu pelesidente woLPM mukulu Henny Seibeb, kombinga yoshinima eshi oo naye kwa li a kufa ombinga moshoongalele osho sha li koSouth Africa, okwa ti omapopyo a Swartbooi okwa li a totwa.
“Aa omapopyo a totwa aSwartbooi nomadilaadilo aye okuhena omikalo.”
Seibeb okwa ti omalundilo aSwartbooi otaa dulu okudanena ekwatafano pokati kaNamibia naUnited Arab Emirates.
“Unene ngaa eshi ta longifa ekwatafano lomukalelipo opo a tote omahokololo nota kondjifa neenghono okweeta omananafano pokati koilongo ei ivali,” Seibeb osho a ti ngaho.
Seibeb okwa koleka kutya oshoongalele osho kwa li sha ningwa naAl Hameli okwa li shi na sha nokukonga eemhito deengeshefa moshikondo shomandjebele koshitopolwahoololo sha//Kharas, nokwa koleka vali kutya osho ashike oshoongalele ongudu yoLPM kwa li sha ninga naAl Hameli.
Nandi-Ndaitwah okwa li ominista yomakwatafano nelongelokumwe lopaiwana okudja momudo 2015 fiyo omuFebuluali 2024, eshi kwa li a ulikwa a ninge omupedu pelesidente woshilongo sha landula efyo lapelesidente Hage Geingob.
Omupopiliko wongudu yoLPM Lifalaza Simataa naye okwaanya omapopyo aSwartbooi.
“Omukalelipo ina popya nande ngaho,” Simataa osho a ti ngaho.
‘MEDINA LAJESUS’
Eshi kwa li ta popi pengungo lokambaina oshivike sha dja ko, Swartbooi okwa ti ngee ovaleli vakulupa va aluka momalweendo okondje yoshilongo ndee tava ti okwa li va kalela po oshilongo nawa, otava fundju.
“Ngee va i kondje yoshilongo, ohava i va ka kofe” Osho a ti ngaho.
“Itandi ti Netumbo ota ningi pelesidente, paushili, ohandi shaanye medina laJesus. Ashike osho handi ti osheshi kutya okwa kulupa neenghono.”
“Ngee otwa hoolola Netumbo, nena katu na efimaneko lovakulunhu vetu. Oko okuhepeka ovakulunhu. Nande odila oya kakama, otashi dulika a denge omutima.”
Omaponokelo aSwartbooi kombinga yaNetumbo okwe ya konima Seibeb a shuna kongudu tai pangele konima yomwedi paife.
MuSeptemba momudo 2022, Nandi-Ndaitwah okwa li a tya ke nande oupyakadi novamati vongudu ovo va kanene, ngaashi omuleleli mukulu wevava lovanyasha loSwapo Job Amupanda naBernadus Swartbooi, tava alukile kongudu.
“Otava tambulwa ko. Otava dulu okutameka eenghalamwenyo davo nongudu ndee tava kala oilyo yongudu oyo tai twala ongudu komesho,” Nandi-Nditwah osho kwa li a popya ngaho pefimbo opo.
Omundjadjukununi woikwapolika Henning Melber okwa ti Swartbooi nongudu aishe yoLPM oi na sha unene novahoololi vokoitopolwa yonumba.
“Ashike eshi oshi li yoo meengudu adishe daNamibia , osho osho nee omapopyo apuka ile inaa yuka natango keena oilanduli ngee tashi ya peyambidido lomahoololo,” Melber osho a ti ngaho.
Okwa weda po vali ta ti ngee oLPM oye lihange ya ninga ongudu yakula nomuleli wayo e li pelesidente woshilongo, oshinima shi li ngaho otashi kala shi na oilanduli pamakwatafano opaiwana.
“Ashike shaashi eshi otashi monika sha fa itashi shiva, otashi ulike nghee ovakufimbinga vahapu mopolika inava kula natango pamukalo wopolitika.”
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
