Omufekelwa gwekwatonkonga a yahwa momutse kusekuliti

Omulumentu ngoka a adhikilila ta kwatonkonga kakadhona gwomimvo 17 moshilandopangelo, okwa yahwa momutse kusekuliti, sha ningwa koongulasha dhOsoondaha, momulamba gu li pokati kaNampost noNational Housing Enterprises, moKatutura.

Otaku hokololwa kutya omufekelwa keeshiwike okwa yahwa momutse kusekuliti ngoka ha longele ehangano lyedhina Vicmac Security Service sho kwa li ta kambadhala okuhupitha kakadhona kaakwatwonkonga. Otaku hokololwa kutya kakadhona ngoka okwa helulwa motaxi nokwa ponokelwa komulumentu ngoka e mu hilile miihwa nokwe mu kwatonkonga.

Pethimbo ta longo uushadha mboka okwa adhikila kusekuliti. Omufekelwa okwa kutha mo ombele ye yOkapi nokuponokela sekuliti, shoka she eta [sekuliti] u umbe ko iikuti itatu yelondodho mewangandjo nolwanima okwe mu yaha momutse.

Iikutu yimwe ya kakadhona ngoka otaku hokololwa ya adhika pehala lyoshiningwanima. Sekuliti ngoka otaku hokololwa i ifala yemwene koshitaasi shopolisi yaKatutura. Omakonakono gopolisi otaga pula komeho.

Pokati mpoka, omulumentu gwontumba okwa tulwa miipandeko mEtine lya zi ko moshitopolwa shaMusati, sho taku hokolwa a kwatonkonga kakadhona gwomimvo heyali, momukunda Ontanda A.

Pauyelele wa komanda gwopolisi yoshitopolwa shaMusati, Ismael Basson, omufekelwa ngoka gwomimvo 57, okwa li a mangululwa mondjeedhililo koboloha mekwatathano nekwatonkonga e li ningile omimvo dha zi ko.

“Otaku hokololwa kutya omufekelwa, ngoka kwa li ha longo megumbo lyopuushiinda, okwa kutha kakadhona ngoka kegumbo lyaavali ye nokwe ka kwatele onkonga mondunda ye,” osho a popi ngaaka.

Yina ya kakadhona ngoka otaku hokololwa oye a lopota oshiningwanima shoka kopolisi.
Omufekelwa okwa holoka mompangu yamangestrata gwaKahao, ohela.

OMADHIPAGO

Monkundana yilwe, opolisi yoshitopolwa shaShana otayi konakona oshiningwanima shedhipago lyaashi lyoshiningilawina sha landula sho okanona koomwedhi 11 taku hokololwa ka mana oondjenda sho ka lyatwa koshihauto, sha ningilwa momukunda Oshandumbala. Nakusa okwa hololwa kutya oye Isac Linus.

Omunambelewa gwiipambele yoshigwana mopolisi yaShana, Thomas Aiyambo okwa popi kutya oshiningwanima shoka osha ningwa komatango gEtine lwopotundi 19h00. Aiyambo okwa popi kutya omulumentu gwomimvo 48 okwa li ta shunitha oshihauto she oshaanima, sho omwanamati gwomimvo 12 a kugu noku mu lombwela kutya konima yoshihauto okuna okanona.
“Otaku hokololwa a thikameke oshihauto she mbala nokwa kutha po okanona hoka. Okwe ka fala mbala koshipangelo shaShakati, ashike okanona hoka okwa kolekwa ka hulitha,” osho a popi ngaaka.

Pokati mpoka, omulumentu gwomimvo 25 okwa tulwa miipandeko mEtitano sho taku hokololwa a dhipaga mukwawo sho e mu ponokele nekatana sha ningilwa mofaalama yedhina Lat Sak moTsintsabis.

Aalumentu mboka otaku hokololwa kutya ayehe Aangola.

“Otaku hokololwa kutya omufekelwa okwa tete nakusa nekatana momutse kombinga yokolulyo, naashoka oshe eta a hulithe mbala,” osho opolisi ya popi ngaaka.

Otaku hokololwa kutya ookuume mboka okwa li ya tamanana naashoka osha hulile molugodhi.

Nakusa opamwe nomufekelwa okwa li haya longele komakala mofaalama ya tumbulwa pombanda, nopethimbo olugodhi lwa tukuka oya adhika ye li kohi yondhungo.