Omufekelwa gwa hugunina medhipago li nyanyaleka a tulwa miipandeko

Omupopiliko gwopolisi moshitopolwa shaKhomas, Silas Shipandeni, okwa koleke kutya omufekelwa gwa hugunina ngoka a kala ta kongwa kopolisi mekwatathano nedhipago lyaPatrick Hawala Hamupanda ngoka a tseyika nawa nedhina Waka, okwa patelwa mo sho i ifala yemwene kopolisi mOvenduka mOmaandaha, lwopotundi 10h00.

“Inashi yela lela kutya ota ka holoka uunake mompangu. Ashike nando ongaaka, onda tseyithilwa kutya otashi vulika shi ningwe mEtiyali nenge mEtitatu,” osho a popi ngaaka.

Omufekelwa ngoka oye Wilhelm ‘Lavas’ Modestus, nokuli oshitopolwa shongundu yaafekelwa yahamano mboka taya tamanekelwa edhipago lyaWaka momasiku 13 Auguste.

Aafekelwa yalwe yatano oya holoka nale oshiwike sha zi ko mOmpangu yaMangestrata gwaVenduka.
Aafekelwa mboka yatano oyo Lukas ‘Big Show’ Nghishekwa, Festus ‘Vuxxa’ Nehemia, Kleofas Amutenya, Lukas Andreas osho wo Armani Mvuti.

Omutamaneki gwepangelo Tatelo Lusebani okwi indile iihokolola yawo yu undulilwe komasiku 28 Septemba notaya kala manga mondjeedhililo.

Oshiwike sha zi ko onzonkundaneki ndjika oya yi moonkundathana noihontali poshiningwanima shoka ngoka a hokolola kutya oshiningwanima shoka osha ningilwa pehala lyokuthitha oondunda tali adhika mepandaanda lyedhina Mungunda Street moKatutura, nokwa li ta zi mondunda ye sho a mono omulumentu a homata ondjembo ta zi mondunda yokulala moka mwa li Waka.

“Olutu lwandje olwa kukuta molwashoka momukala onda adha mo aalumentu yane, omanga ye li yaali oya adhika ye li mondunda yanakusa – mboka gumwe okwa li nondjembo nomukwawo okwa li nekatana. Oya li taya popi mOshiwambo nonkene kanda li ndi uvite shoka taya ti molwashoka ihandi uvu elaka ndyoka.

Ashike pethimbo ndyoka okwa li ngaa ndu uvite sho ti igidha edhina lyandje, naasho ndayi mondunda moka onda adha i ikwata mothingo nondiwete kutya omo a yahwa nokwa li wo e na iilalo yekatana moshipala nokomaako agehe,” osho oihontali a hokolola ngaaka.

Pauyelele wolopota yopolisi, Waka okwa ponokelwa kaafekelwa kwa li ya homata ombistoli osho wo ekatana. Aafekelwa otaku hokololwa pegumbo ndyoka ye ya po taya kongo mwene gwotuukala yoPolo Vivo ndjoka kwa li ya thikamekwa molugumbo, pethimbo ndyoka.

Otaku hokololwa kutya sho ya yi megumbo ndyoka oya tameke okuhadha oondunda adhihe dhokulala sigo yi itsu Waka e li mu yimwe yomoondunda ndhoka. Okuza mpoka otaku hokololwa oontamanana dha tamake, nolwanima Waka okwa tsuwa nokuyahwa. Opolisi pethimbo ndyoka oya tseyitha kutya aafekelwa oya fadhukapo notuukala ombulawu yedhina Citroën.

Pauyelele wa gandjwa, aalumentu mboka ayehe [mwa kwatelwa Waka] okwa li ookuume noya li ya ningi ompangela yeyugo ashike inashi enda we nawa.

Waka otaku hokololwa a adhika e na nale iikoya mbyoka ya adhika yi li mompangu, noonakudhipaga oye shiwikile iilonga yiimbuluma.

“Waka okwa li ha tilika [naafekelwa] okwa li yeshiwike nawa nomadhina Lovers osho wo Big Show Boys yomoHakahana, naWaka oye kwa li omuhona gwawo,” osho onzonkundandeki ndjika ya lombwela ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.