Omudipai wokoNimt e wete oihokolola yaye inai yela

Omulumenhu oo ta tamanekelwa edipao lovanambelewa vavali va kula vokoshiputudilo shoikwamina noungoba shedina Nimt koArandis koshitukulwa shErongo muApilili 2019, ota ti okwe lilongekida okupula omangu yopombada i didilike kutya oihokolola yaye ka ya li paveta.

Omunamido o62 Ernst Lichtenstrasser, eshi okwe shi popya kwa li a holoka komesho yomupedu panguli omupresitente Hosea Angula mOmangu Yopombada yaVenduka Omaandaxa.

Lichtenstrasser okwa alukila komangu konima yeemwedi mbali eshi kwa li ta kendambala okulidipaa modolongo yeyvulonghalo yaVenduka, omo a idililwa. Onghendabala yelidipao modolongo okwa li ya ya moshipala oihokolola yaye yomomangu komesho yomupanguli Christie Liebenberg.

Pefimbo a holoka komesho yomupanguli Angula, Lichtenstrasser okwa li a pulwa ngeenge okwe lilongekida okutwikila noihokolola yaye ehe na haende.

Okwa nyamukula kutya okwe lilongekida okuya komesho neehelo leindilo lowina she likolelela komulandu woveta yoimbuluma opo a ninge eindilo lowina.

Oveta otai ti endilo nee li li ngaha itali shiva nokali li paveta ashike otali dulu okuningwa komangulilo nongeenge oya nyengwa, omunhu ota dulu okutwala oshibofa shaye shi ka talululwe komangu ei ya shiya ko.

Liebenberg okwa mona kutya Lichtenstrasser oku na ondjo moibofa ivali yedipao nai kwao i li ihamanho muNovemba odula ya dja ko.
Oibofa itanho oi na ekwatafano nedipao lomukulunhuwiliki Eckhart Muller weedula o72 nomupedu wiliki waye, Heimo Hellwig weedula 60, ovo kwa li va yashwa mombelewa yavo ya kula moArandis mo15 Apilili 2019.

Lichtenstrasser okwa li vali ta tamanekelwa oibofa itatu inasha noumbudi wondjebo (Obistoli) mofitola yeendjebo yedina Gunsmith moGrootfontein mo2016, ndele te i twala komunailonga waye e li koshitukulwa shaWambo.

Pefimbo loihokolola oyo ya tameka muFebrualia 2021, Lichtenstrasser, okwa patana kutya ke na ondjo moibofa i li ihetatu oyo ta tamanekelwa. Okwa ti nokutya ke na mo sha medipao lovalumenhu ovo ve li vavali, eshi okwe shi popya pefimbo loihokolola yaye yopetameko yehandukilo laye konima yoivike ivali eshi a monika ondjo.

Liebenberg okwe mu nona ondjo moibofa ivali oyo ta tamanekelwa she likolelela komakonaakona oo e na sha noumbangi oo wa dja kondjebo oyo ya longifwa medipao olo. Natango Lichtenstrasser okwa hepulula kovanambelewa vopolifi konima yomwedi eshi edipao olo la ningwa.

Pefimbo loihokolola yaye omangu oya uda kutya Lichtenstrasser, oo kwa li omunailonga koshiputundilo shaNimt koshitai shokoTsumeb, okwa li pu na okuhaudafana pokati kaye nelelo loshiputudilo kombinga nghee oshiputudilo tashi wilikwa, sha landula eshi kwa li a tumwa okudja koTsumeb, opo pe li popepi neumbo laye kOtavi, a ye a ka longele koshitai shokoKeetmashop omanga Muller naHellwig inava dipawa.

Lichtenstrasser okwa ekelashi haende waye oo kwa li a pewa okudja kehangano lEpangelo lokukalela po ovanhu paveta opo e mu kalele po, konima yoshivike eshi a monika ondjo.

Angula okwa undulila komesho oshibofa shaye fiyo oko mafiku o12 Maalisa, omo Lichtenstrasser ta ka alukila komangu oko ta ka pangulwa kuLiebenberg, ashike natango oku li dolongo.