Ompangu yoPombanda mOvenduka yi iteyelwa kookalyamupombo

OMATUNGO gaali, lyOmpangu yoPombanda osho wo lyUuministili wIimaliwa ngoka ge li momudhingoloko gumwe, oga yiwa oonyala kookalyamupombo kaayeshiwike ongulohi yEtitano lya zi ko.

Okupitila molopota yopolisi yehuliloshiwike, opolisi oya popi kutya omufekelwa keeshiwike otaku hokololwa i iteyele metungo lyOmpangu yoPombanda sho a pitile pekende tali adhika konima yompangu nokwayi mondunda moka mu na iipungulwa yomompangu.

Omufuthi ngoka otaku hokololwa e shi pondola okuyaka mo okompiyuta yimwe ndjoka ya pungula omauyelele gomOmpangu yoPombanda, nokompiyuta ndjoka otayi tengenekelwa pongushu yoo-N$11 420. Sigo oompaka kapu na ngoka a tulwa miipandeko mekwatathano noshiningwanima shoka ashike omakonakono gopolisi otaga pula komeho.

Ongulohi oyo tuu ndjoka, etungo lyuuministili wIimaliwa mOvenduka, ndyoka tali adhika owala omukaakena omushona okuza pOmpangu yoPombanda, olyi iteyelwa nomwa yakwa okompiyuta yimwe osho wo omitse dhookompiyuta mbali – kumwe yongushu yooN$24 500.

Okamela otaku hokololwa yu ulike nkene omulumentu ngoka a pitile pekende lyomweelo okuya metungo ndyoka.

Kapu na shoka sha monika po sigo oompaka nomakonakono gopolisi otaga pula komeho.

Onkundana ndjoka, oya landula owala ndjoka ya tseyithwa petameko lyomwedhi nguka mOtjiwarongo sho taku hokololwa Ompangu yaMangestrata gwaTjiwarongo yi iteyelwa momasiku 30 Novemba.

Otaku hokololwa kutya sho omufekelwa a mono uupitilo wokuya mompangu ndjoka, okwayi kombelewa yomutamaneki nokwa yaka mo iinima oyindji ya kwatelamo nomapeko gaafekelwa ngoka taga ningilwa omakonakono.

Omutamaneki mpangu ndjoka Joas Neemwatya okwa li a koleke oshiningwanima shoka konzonkundaneki ndjika nopethimbo ndyoka okwa li a popi kutya oshidhigu okupopya kondandalunde kehe shoka sha kuthwa mombelewa. Okwa gwedhapo kutya opo a shilipaleke kutya uuyelele we owuli megameno aluhe ohayi nokompiyuta ye yopeke kegumbo.

“Omweelo otaku hokololwa gwa adhika gwe ekama niinima mwa kwatelwa omapeko giipotha oya yakwa mo. Omakonakono gopolisi otaga pula komeho,” osho omupopiliko gwopolisi moshilongo, Kauna Shikwambi a popi ngaaka, petameko lyomwedhi nguka.

Sigo oompaka inaku lopotwa kwa tulwa nande omuntu miipandeko nomakonakono gopolisi onkene taga tsikile.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!