Omikunda koZambezi odi li koshi yomeva

Omikunda dihapu moshitopolwahoololo shaZambezi odi li koshi yomeva efundja, osho tashi fininike eefamili di fiye po omaumbo ado di ka konge omalukalwa peenhele opo pwa fa pa londa kashona.

Eenhele odo da kumwa unene kefudja eli ongaashi Namiyundu, Luhonono, Malindi naLisikili.

Kamusela woshikandjohoololo shaKabbe North, Bernard Sisamu okwa ti efundja ola naipala moule womafiku a pita, nomeva paife otaa piti ashike momikunda moshikandjohoololo shaye.

“Otwa tamake okutembula ovakalimo ovo va kumwa koshinima eshi twe va yukifa keefikola odo di li popepi nopeenhele odo da londa. Ashike nee, otu na omumbwe yeetenda noikulya yeefamili edi da tembulwa,” osho a ti ngaho.

Oshitopolwahoololo shaZambezi oshi li mo nai kefundja olo la piyaaneka eefamili noimuna, tali teyaula omaliko, oikunonwa momapya neepate, nokeefikola neekilinika paife otaku iwa ashike taku longifwa ouwato.

Ondodo yomeva momulonga waZambezi okwa li i li peemita 6.82 Etitano.

Sisamu okwa ti oshitopolwahoololo osha pumbwa eetenda meendelelo nomayambidido oikulya, shaashi omavatelo oo a yandjwa fiyo opapa inaa wana natango.

Ombelewa yomuprima minista oya yandja eetenda di li 60, omatalashe e li 50, omakumbafa e li 50, omakende omaadi okulya e li 104, eeshi domeedooxa di li 663 neeshako dolwishi deekilohalama o-40 di li 4 974.

Ashike nee, Sisamu okwa ti kapu na nande ofamili ya sha ya temblwa moshikandjohoololo shaye ya mona eetenda.

“Paife, moshikandjohoololo shange, kamu na nande ofamili ya tembulwa ya mona eetenda shaashi eetenda odo da yandjwa kombelewa yomuprima minista okwa li da pewa eefamili dimwe moikandjohoololo ikwao.

Onghee nee, otwa pumbwa eetenda dihapu shaashi oshitopolwahoololo ashishe osha kumwa, yoo oikwatifo kai po ya wana.

Eemungulilo doikulya nado paife oda yela, kadi na eshi di na,” osho a ti ngaho.

She likolelela kouyelele womavalulo ovanhu nomaumbo omudo 2023, oshikandjohoololo shaKabbe North oshi na ovanhu ve li 12 253 nomaumbo e li 11 958.

Oshivike sha dja ko, omukulunhu wehongo moshitopolwahoololo, Alex Sikume okwa ti eefikola di li omuwoi odo da dengwa kefundja moKabbe South/North otadi ka tembulwa diva molwomatomeno eameno.

Paife, eefikola edi oda dingililwa komeva efundja, oo a ya nomeni leefikola, osho sha tula ovahongifikola novanafikola moshiponga ngaashi shomayoka, eengadu, eendjabameva nomakoko, nosho yo oshiponga shokufya omeva ngee tava longifa ouwato okuya kofikola.

EFUNDJA OLA TULA OIFITUKUTI MOSHIPONGA

Ominsitili yomidingonoko nomatalelepo oya tameka nale okukonga nokudidilika opo pu na oinamwenyo oyo ya tembulwa kefundja opo i amene oinamwenyo ei iha dipawe shihe li paveta.

Omunambelewa akula weameno moshitopolwahoololo, Moragan Saisai okwa lombwela oThe Namibian Omaandaxa kutya efundja ola kufa oifitukuti peenhele dayo opo hai kala, osho she i tula moshiponga shokudipawa shihe li paveta.

Okwa ti kutya omakonakono otaa vatele kumoniwe opo oinamwenyo ihapu i li, noikonga ya keshe efiku otai ka ningwa opo kukwashilipalekwe eameno layo.

“Efundja ola tula oifitukuti moshiponga. Oifitukuti imwe paife oi li peenhele opo hapa ningilwa oifitukuti oushada.

Onghee nee, omakonakono aa okwa pumbiwa opo tu mone kutya oi li peni nokunghonopeka omilandu di li ominge noukongo inau pitikwa,” osho a ti ngaho.

Saisai okwa ti oministili otai ka longifa oumbautu opo i tauluke omeva i dule okuya komesho nomakonakono ayo.

“Eenhele odo tu na okukonakona oda kula. Ashike nee, ohatu ningi osho hatu dulu opo tu mane ko eenhele adishe, unene ngaa odo da nyika oshiponga koifitukuti,” osho a ti ngaho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.