Omikunda heyali dhi na owala omboola yimwe

Omikunda heyali tadhi adhika moshitopolwa shaShikoto ohadhi hupile ashike momboola yimwe okumona omeya goompumbwe dhawo nodhiimuna.

Shoka osha landula sho ya kala inaaya etelwa omeya uule woomwedhi omugoyi, ano lwa hugunina ye etelwa omeya omuJanuali numvo.

Mwene gwomukunda Otatashe, omusamane Samuel Kamati oshiwike sha zi ko okwa hokolola kutya omukunda gwawo osho wo omikunda dhopuushiinda oya yakula omuloka gwa nkundipala numvo, nonkalo oya nayipala molwashoka kaye na oopomba dhomeya komikunda dhawo omolwoshimoko sha nkundipala okupombela omeya komikunda dhawo, okuza kOmuthiya.

Shoka otashi ulike nee kutya aakalimo yomomikunda ngaashi Otatashe, Onelago No2, Oshana Shepandela, Omupupa, Osaataha, Oshikondiilongo, Akazulu, osho wo Onalushishi, Onakadilu nOnanyele otadhi dhengwa kenota.

“Omumvo nguka ogwa kukuta noonkondo. Epangelo olya ninga ngaa onkambadhala yoku tu ningila oomboola ntano, ashike omupya omunene oongoka kutya omeya ngoka oge na oshimongwa. NamWater ngoka kwa li he tu etele omeya ngashingeyi okwe shi hulithapo,” osho omusamane Kamati a popi ngaaka.

“Ngame okwa li nda fulu omboola yandje mwene mo2021. Elago enene oondyoka kutya oyi na omeya taga vulu okunuwa, ashike uupyakadhi owo mboka kutya oya humbata omutengi omudhigu molwashoka aakwashigwana ayehe yomukunda gwandje osho wo iimuna yawo omo haya hupile,” osho mwene gwomukunda a popi ngaaka.

Kamati okwa hokolola kutya okuza sho sha hulithwa po okwe etelwa omeya kuNamWater, ompumbwe yomeya ga yela oya yi pombanda.

“Oopomba dhetu odha kukuta omolwoshimoko shoka kaashi po. Ishewe omunino ngoka ogwa dhigupalelwa. Ngashingeyi otatu kanitha oongombe, nokuli paife otwa teka omukumo,” osho a popi ngaaka.

Mwene gwomukunda okwa hokolola kutya oongombe dhi li po500 dhomomukunda gwawo ohadhi nu omeya okuza momboola ye, esiku kehe.

“Nonande okwa li haye tu etele omeya, ololi yimwe yomeya kaya li hayi kala ya gwanena omukunda aguhe. Uuministili wUunamapya nUuniimuna, Omeya nEtendululo lyEvi okwa li wa ningi po omboola yimwe ya ya muule netegameno lyokumona omeya ge li nawa, ashike inashi kwatha sha,” osho omusamane Kamati a hokolola ngaaka.

“Katu na omeya gokwiiyoga nogokuyoga. Kehe esiku otandi yakula omanyenyeto okuza kaakwashigwana taya kanitha iimuna yawo kenota. Ompumbwe yomeya momukunda gwetu oya pumbwa okutalika ko ongompumbwe yomeendelelo.

Sho a pulwa, ngoloneya gwoshitopolwa shaShikoto, Penda ya Ndakolo okwa popi kutya aanamikunda mboka ya gumwa oya pumbwa okutseyithila ombelewa ye omakemo gawo.

“Ashike nando ongaaka, ombelewa yangoloneya kayi li le po naanaa okugandja omeya koshigwana, ashike oyi li po owala okukalelapo epangelo [miitopolwa],” osho ngoloneya a popi ngaaka.

Ya Ndakolo okwa popi kutya ota ka kwatathana nombelewa yiipambele yokugandja omeya komikunda, osho wo ehangano lyomeya lyaNamWater opo ya tale kutya omukundu ngoka otagu kandulwapo ngiini.

“Otatu ya kwathele . . . Aluhe ohatu kutha ko omanyenyeto gaantu yetu ongoshinima sha simana,” osho a popi ngaaka.
Omukalimo gwomomikunda dhimwe ndhoka dha gumwa okwa popi tati: “Otashi uvitha nayi okukala owala hatu li uulalelo uuna pu na omeya.”
EYAMUKULO OKUZA KUUMINISTILI

Omupopiliko guuministili wuunamapya nuuniimuna Jona Musheko okwa popi kutya ekaleko lyomeya opo ga kale ihaaga falwa we komukunda ngoka gwaTatashe, omolwetayela lyololi ndyoka kwa li lya topa, nonkene okwa li nee kuna okutulwa lilwe.

Okwa popi kutya uupyakadhi mboka owa potokononwa nuuministili otawu tameke mbala okufala omeya natango komukunda ngoka.

“Uupyakadhi oomboka kutya kapu na oshimoko shokupomba omeya mominino opo omeya ga thike komikunda ndhoka. Uupyakadhi mboka otuwu shi notwi ipyakidhila noku wu yapukila melongelokumwe naNamWater,” osho Musheko a popi ngaaka.

Okwa popi kutya mopaife, uuministili otawu tsikile nokukala tawu fala omeya komikunda sigo opethimbo ndyoka uupyakadhi woshimoko tawu kala wa kandulwapo.

“NamWater natango okwi ipyakidhila nokuhwepopeka eshina lyokudhinda omeya lyaShakati osho wo okulundulula ominino dhomeya ndhoka hadhi eta omeya koshitopolwa shaShikoto,” osho Musheko a popi ngaaka.

MONAKUZIWA

MuKotoba 2021, onzonkundaneki ndjika oya lopota kombinga yaakwashigwana yomomikunda odho tuu ndhoka, moshitopolwa shaShikoto, kwa li taya longitha opomba yimwe, nokwa li ya dhengwa kenota uule woomwedhi heyali sho omeya gopomba yawo ga pata.

Pethimbo ndyoka, aanamukunda mokwaana nkene okwa li ya tameke okulongitha omeya gomoomboola ngoka ge na oshimongwa, nonande okwa li sha tula uundjolowele wawo nowiimuna moshiponga.

Mboka ye na iihauto oya li haya ka teka omeya kokule ngaashi kOmuthiya osho wo kOshamakaka popepi nOmuthiya, omanga yamwe okwa li haya longitha oondoongi oku ka konga omeya.

Moonkundathana noThe Namibian, mwene gwomukunda pethimbo ndyoka, omusamane Paulus Hangula, okwa popi kutya aakalimo yamwe mboka ye na oomboola dhopaumwene oya li haya futitha oshimaliwa shi li pokati kooN$2 nooN$4 mendini lyomeya.

Okwa popi kutya momikunda dhawo omwa li oomboola ntano dhepangelo, ashike ihadhi longo.

“Oomboola ndhoka dhepangelo ihadhi longithwa molwashoka mboka ya li taye dhi fulu oya hulile ondjilakati sho ya dhimbulula kutya omeya ngoka kage shi omawanawa okulongithwa kaantu nokiimuna, konima ashike sho ya adha omeya gotango ngoka ge li uule woometa 100 okuya mevi,” osho Hangula a popi ngaaka.

Aakalimo yomikunda ndhoka okwa li yi indile epangelo li ya ningile oondama dhomeya opo dhi kale hadhi tegeke omeya pethimbo lyomvula go ga longithwe pethimbo ndika lyokwenye.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.