Omukulunhu wongudu yopolotika yedina Popular Democratic Movement (PDM), McHenry Venaani, okwa holola eudo lonai laye kombinga yomidjalo dovahongifikola, okwa ti omidjalo dovahongifikola luhapu kadi li nawa.
Venaani eshi okwe shi popya mopaliamente Etitatu loshivike sha dja ko omanga kwa li ta ti ko sha kosheetwapo shoshilyo shongudu Hidipo Hamata kombinga yEpangelo la pumbwa okuyandja oikwafifohongo ya wana keefikola opo di kale tadi yandje elongo lopamufika ngaashi eefikola dopaumwene.
“Nena oto hange omuhongifikola a djala eeAll Star, nondjiina ya pama, nokambidja, notaye norasta momutwe e li koshipelende ta longo. Nande ngeno omudali ou kwa li wa tekulwa mounyuni woukoloni ngee owa i mo mongulu yofikola, oto dulu okupula kutya omuhongi oku li peni,” Venaani osho a ti ngaho.
Okwa ti ovahongi okwa li hava djala nawa nale nokwa li va fimanekwa.
“Omuhongifikola nena momukunda, ou li kofikola, ndee konima yofikola, oto nu vali eembiila nounona vofikola poukamba. Kapu na vali omhango.
Oupyakadi umwe omapaipi oo haa ifwanwa hubbly bubblies,” Venaani osho a ti ngaho. Okwa ti oshiwana okwa li sha deula ovahongifikola vawa nale nounona okwa li hava udu omalombwelo.
“Monale kakwa li to hale nokushakena nomuhongi woye momaxuliloshivike. Nande ongee we va hange mofitola, ou na okuteelela. Omuhongifilola okwa li edidiliko lelandulafano nomhango,” Venaani osho a ti ngaho.
Omutotiveta woSwapo noku li omupedu minista woyeendifo, Veiko Nekundi, okwa ti ota yandje ombedi kovadali shaashi inave litula mo mehongo lounona vavo.
Oshoondaxa okwa pula kutya ovadali vangapi veshi kutya omake ounona vavo ee li ngahelipi ngee va shanga, vangapi veshi kutya ounona vavo ohava mono shi fike peni moinyangadalwa yofikola, vangapi hava tale kutya omuhongi okwa nyola po shike pembo lokaana.
“Eshi osho oshinima shimwe osho hashi eta oidjemo yanghundipala. Oshinima shikwao okuhena omikalo ku li mounona.
Omuhongifikola ke na eshi ta ningi, shaashi ngee va hala okuvyula ounona ovadali otave ya kofikola nombele,” Osho a ti ngaho.
“Ngee owa lombwelwa oule weexwiki nofulukweva yoye . . . oho landula, ndee ngee ino hala, oto di mo. Meefikola dEpangelo oshike tashi ningwa, okaana oka djala ofulukweya nokahema keli wetikile. Oshikutu osha fa ashike omidjalo dokoshi,” Nekundi osho a ti ngaho.
Okwa ti eshi kwa li ovakulunhufikola hava tula ounoma pedu, ovadali vavo okwa li hava tula mo omakangha.
Ounona nava lombwelwe kutya omaufemba avo aa ngabekwa nove na oshinakuwanifa shokulesha nokufimaneka ovahongifikola vavo, osho a ti ngaho.
“Natu xulife po okulombwela ounona kutya ehandukiloputudo oli li eembinga mbali. Ngee owa lombwele okaana kutya oufemba wako oufike ashike pamwe naao vomudali wako, osha nyika oshiponga, ndee oko twa taalela oko ongaoshilongo,” Nekundi osho a ti ngaho.
Omutotiveta Elma Dienda okwa ti ounona novahongi aveshe kave na omikalo.
“Ekotamhango letu otali ti ounona inava pumbwa okudengwa ndee eshi oupyakadi walye? Kashi fi fyee, ovatotiveta, olye ta wapaleke oupyakadi ou twa tameka?” Dienda osho a pula ngaho.
“Ounona vetu kave na omikalo medina loufemba wavo. Ove na unene oufemba uhapu, osho sha eta meefikola mu kale muhe na elandulafano. Ovahongifikola kave na eshi tava dulu okuninga ounona vetu molwoufemba wavo,” Osho a ti ngaho.
Omutotiveta voSwapo Calle Schlettwein, nande ongao, okwa pataneka epopyo laDienda kombinga yokudenga ounona meefikola, okwa ti osha puka.
“Okudenga ounona meefikola ohaku eta oimbuluma. Ohatu patana oimbuluma yopaukakwashike kookanhu apa. Ounona ohava longwa okukandula po omaupyakadi inamu kwa twelwa omahepeko,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
