Omidimba 85 meekila depangelokonooli inadi ka talwa ko

Eekila depangelo moitopolwahoololo yokonooli ngaashi Ohangwena, Oshana nOshikoto odi na omidimba odo inadi ka talwa ko natango di li 85 adishe kumwe.

Omidimba edi di li 17 odi li mokila yoshipangelo shaNandjokwe, 23 omEngela, 39 okEenhana, 4 kOkongo nambali kOshakati.

Olopota oyo ya dja kOnandjokwe oyo kwa li ya yandjwa konima yoivike ivali ya pita, oya ti ovanhu vamwe ova fya odula ya dja ko ashike ovakwapata vavo inave ya natango va kufe mo omalutu avo.

Olopota oya ulika kutya omidimba dimwe oda kala mokila omo okudja odula ya dja ko muFebuluali.

Omidimba edi dimwe odo vakulunhu Ovanamibia nOvangola noshoyo ounona.

Omukulunhuwiliki wouhaku koshitopolwahoolo shaShikoto Josua Nghipangelwa okwa ti mOshikoto, omidimba nhano edi di li mo odovakulunhu, vavali Ovangola navatatu Ovanamibia, omanga di li 12 odounona.

Okwa ti omidimba nadi ka talwe ko kokila moule womafiku 14 nongee oda kala mo otashi dulika doole.

Nghipangelwe okwa ti omalutu amwe aa kala mo oule weedula nhee inaa kufwa mo ndee ngee okila oya handa ohava pula epitikilo opo epangelo li fudike omalutu aa.

Okwa pula eefamili odo di na oupyakadi woshimaliwa opo di lombwele ewiliko loundjolowele moshitopolwahoololo opo va dule okupewa omavatelo opo tashi dulika. Omunambelewa umwe wokoshipangelo shaShakati naye okwa koleka kutya opu na omidimba inadi ka talwa ko mokila yoshipangelo.

Omupopiliko wopolifi yaShana inspekta Thomas Aiyambo okwa ti mokila yavo yopolifi poshitaashi shopolifi shaShakati omu na omidimba mbali inadi ka talwa ko. Omidimba edi oda kala mokila omu okudja ngaa muNovemba wodula ya dja ko.

Natango, omukulunhuwiliki wouhaku koshitopolwahoololo shaHangwena George Jeremia okwa ti oshikumungu eshi shomidimba itadi ka talwa ko keekila doipangelo oshi li moitopolwahoololo ihapu.

Jeremia okwa ti opu na omidimba di li 43 inadi ka talwa ko keekila domoshitopolwahoololo shaHangwena, omanga dihapu odounona. Okwa ti ounona vahapu okwa li va dalwa inava kola.

“Monakudiwa, oveta okwa li ya yooloka, okwa li ya pitika opo di xwikwe po, ashike nee, paife oveta oya pitika ina e uye ndee tai nomudimba wokaana kaye opo e ke ufudike nombili.”

Jeremia natango okwa ti omidimba nhatu inadi ilwa ko odovakulunhu omanga 36 dounona di li koshipangelo shaEenhana.

“Koshipangelo shokEngela, otu na ko di li 23 inadi ilwa ko dounona, omanga kOkongo, otu na ko nhee.

Omidimba edi dounona inadi ilwa ko otadi mane po onhele shaashi oda kala mo unene. Vahapu okwa li va dalwa kovakwashiwana vaAngola,” Osho a ti ngaho.

Okwa ti nande ovadali vounona ava ohava shangifa omadina omikunda davo moNamibia, kave na apa tava hangika nande oshipangelo osha kendabala shi va konge.

Jeremia okwa ti ngee omidimba da kala mokila oule wefimbo, oipangelo ohai mono oufemba okudja komhangu nokoministli oyo tau pitike epangelo opo li fudike omidimba edi.

Jeremia okwa pula ovakwapata ovo ve na omidimba di li keekila inadi ka talwa ko opo va ye va ka tale ko omidimba dovanhu vavo.

“Keshe shimwe otashi lunduluka paife, okudja komwaalu wovanhu tava ningi vahapu, omafyo noinima ikwao ihapu.

Okukala tu na omidimba dihapu inadi ilwa ko nasho oupyakadi wakula ngee okila ya teka, shaashi otai dulu okuteka keshe efimbo ndee ihashi kala shipu okwiipangela. Ohatu pula nee ovakwapata opo ve uye ndee tava kufa mo omidimba dovanhu vavo opo ve ke di fudike“Eshi otashi yandje yoo nomhito komidimba odo opo tadi uya mo,nande ku na oshimaliwa shokuninga efudiko, ila ndee to tu lombwele opo tu ninge omalongekido,” Jeremia osho a ti ngaho.

Omukulunhuwiliki woministili youhaku nomayakulo opanghalafano Ben Nangombe okwa lombwela oThe Namibian oshivike sha dja ko kutya eefamili odo itadi dulu okufudika ovanhu vado otadi dulu okumona omavatelo koministli youkakwashikekookanhu, efikopamwe, okulwifa oluhepo nomayakulo onghalonawa.

“Ohandi ti opu na omavatelo oshimaliwa sha keshe umwe oo ita dulu okufudika omunhu waye, ashike eshi hatu ningi moministili ngee pu na omidimba inadi ilwa ko, opu na omilandu odo hadi landulwa, ohatu ningi omashiivifo moikundaneki kutya oukwatya womunhu oyou ndee ngee kapu na ou e ya moule wefimbo olo la yandjwa, epangelo otali dulu nee okufudika olutu olo,” Osho a ti ngaho.