Omhupanguli okwa ti opolitika oya pumbwa omunhu iha udu nai koinima yongaho

Oshiwana osha teelela ovanhu ovo ve li mopolitika va kale va kola shi dulife vakwao, omhupanguli womomhangu yopombada osho a ti nga pefimbo lepangulo omo kwa li aamena oshilyo shoSwapo Reinhold Shipwikineni moshibofa shokukakeka oukwatya womunhu osho kwa li a tulilwa mo koshilyo shimwe shongudu Charles Mubita.

“Ngee to longo novanapolitika nomapopyo opapolitika, ohashi kala shi djuu okutya edina loye otali kakekwa shaashi oshiwana osha teelela ovanapolitika va kale vehe na ko na sha noinima yongaho noto dulu okupopilwa oinima yopapolitika ya kula,” Omhupanguli Eileen Rakow osho a ti ngaho mepangulo laye olo a yandja momhangu yopombada mOvenduka Etitano.

Rakow okwa weda po: “Apa, ouwa woshiwana oo wa fimana nehalo lokupatana oinima ya pamba opolitika nokuninga omapopyo opapolitika.”

Okwa popya kutya Mubita “omunhu wepangelo nomunapolitika ndee omapopyo oo a ningwa ku [Shipwikineni] ee na sha noinima yopolitika noku li papolitika”.

Rakow okwa ekelashi oibofa aishe oyo Shipwikineni a tulilwa mo kuMubita muMarsa odula ya dja kombinga yokukakeka oukwatya waye.

Eshi osha hala kutya Shipwikineni ita ka teelelika a holoke komhangu e uye e lipopile, konima Rakow a mona kutya Mubita ina yandja oumbangi oo omhangu tai dulu okulongifa mokumona Shipwikineni ondjo moshibofa eshi shekakeko loukwatya waMubita.

Mubita oo e li oshilyo shongudumutima yoSwapo nonguduwiliki, nokwa teelelika a ka waimine oilyo yoSwapo momutumba wopashiwana momwedi tau ya, okwa li a hala okufutifa Shipwikineni oshimaliwa shi fike poN$370 000.

Okwa ti Shipwikineni okwe mu popila oinima ii okupitila mokakilipa oko kwa li ka tumwa momafiku 02 Marsa odula ya dja ko.

Metumwalaka, Shipwikineni okwa ya dja oushima kuMubita eshi ta yambidida Netumbo Nandi-Nadaitwah a ninge okandidate koSwapo momahoololo oupresidente omudo 2024, ndee ta holola elineekelo laye kutya ongudu oya pumbwa okuhoolola ominista ikulu yoCabinete Jerry Ekandjo oye a ninge okandidate yayo.

Omapopya aShipwikineni mokakilipa aa kwatela mo kutya Mubita, ongomukalelipo woilyo yovakwaita voPlana, okwa li ta longifwa a fa ombapila yokokandjuwo kovanhu ovo tava kengelele ekotamhango loSwapo neemhango nomalandufano omahoololo ongudu.

Hahende waShipwikineni, Norman Tjombe, okwa ninga eindilo opo oibofa oyo ya tulilwa mo omuyakulwa waye i ekelweshi konima yaMubita a ya dja ehokololo laye komesho yomhupanguli Rakow muNovemba odula ya dja ko.

Rakow okwa ti kutya Tjombe okwa ti kutya: “Ongomunhu a fimana moshiwana, [Mubita] na kale ta dulu okulidiinikila omasheko shi dulife omunhu ashike wongaho.”

Tjombe natango okwa ti kutya omapopyo aShipwikineni okwa pumbwa okuudika ko taku talika kutya okwa hala lyelye a shikule presidente Hage Geingob osho elelo loSwapo kwa li li na okuninga konima yefyo laGeingob odula ya dja ko.

Ponhele yaMubita, hahende waye, Sisa Namandje, okwa ti kutya omapopyo aShipwikineni kakwa li nande e li mondjila, nokwa li e shi kutya kee li mondjila, nelalakano linene lomapopyo aye okwa li okunyona ondjokonona nefimano laMubita nomatomeno opapolitika, Rakow osho a ti ngaho.

Rakow okwa ti okwa li sha yela nawa pakutala koumbangi oo a pewa kutya Mubita okwa li a handukifwa kwaashi Shipwikineni a popya nokwa hoolola oitya oyo a popilwa noinima oyo a ulwa.

Ashike nande ongaho okwa weda ko kutya oshiwana osha teelela ovanapolitika va kale ihava udu unene nai koinima yongaho ngaashi ovakwashiwana.

Omhupanguli okwa pula opo Mubita fute oimaliwa oyo Shipwikineni a longifa movakalelipo vopaveta moshikumungu omu.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.