Epangelo oli na okudjuulula ko ngee ola hala okutwikila nonghendabala yokuinga etalululoindilo li li ominge netokolo omo omuwiliki mukulu koNational Petroleum Corporation of Namibia (Namcor) Cedric Willemse kwa li a pewa obooloha yoshimaliwa shi fike poN$200 000 muOktoba.
Eindilo omo epangelo tali pula li pitikwe li ninge etalululoindilo li li ominge neyandjo lobooloha kuWillemse (53) okwa li la kupulwashi momhangu yopombada yaVenduka Omaandaxa.
Mangha ta yandje elombwelo kutya eindilo lepangelo letalululoindilo ola kupulwashi komhangu, omupanguli Naomi Shivute okwa ti epangelo oli na okudjuulula ko ngee ola hala okutwikila nonghendabala yetalululoindilo li li ominge netokolo omo Willemse a pewa obooloha.
Omutamaneki wepangelo Basson Lilungwe okwa lombwela Shivute Omaandaxa kutya epangelo ola tumina omukanda komhangu tau pula li pewe efimbo la wedwa po li longekide omikanda dalo doihokolola kombinga yetalululoindilo.
Ashike nee, Shivute okwa lombwela Lilungwe kutya epangelo okwa li li na okutula mo eindilo lokuundulila oshinima eshi komesho pefimbo ngee okwa li la hala okupewa efimbo la wana li longekide oshipofa shalo.
Epangelo ola ninga eindilo letalululo komhangu yopombada konima mangestrata Olga Muharukua a yandja obooloha kuWillemse yoshimaliwa shi fike poN$200 000 momhangu yamangestrata mOvenduka lwopexulilo laOktoba odula ya dja ko.
Willemse okwa taalela oipofa i li 10 mekwatafano vati nekengelelo noulingilingi koNamcor, oko kwa li ha longo ongomuwiliki.
Oipofa oyo e na omwa kwatelwa ekengelelo, nokulongifa ombelewa papuko a tambule eembumbo, oimaliwa ihe na eedjo da yukilila nokudopa okufuta oishoshela.
Pefimbo loihokolola yobooloha komesho yomupanguli Muharukua, Willemse okwa ti oimaliwa oyo a futwa okwa li yonyama oyo a landifa okudja mofaalama yaye nosho yo omayakulo a yandjwa kehangano omo oye e li oshilyo.
Willemse natango okwa ti oku na oumbangi ngaashi oumbapila vomafutilo mokompiuta yaye yopeke oyo ita dulu okulongifa shaashi okwe i kufwa kokomisi yokulwifa oulingilingi, yee ita dulu okumona oumbangi ukwao opo a dule okupopila efatululo laye loifuta shaashi ou li moipakete kofaalama yaye kOkahandja.
Metokolo laye, Muharukua okwa ti pamaliudo aye Willemse okwa yandja efatululo li pandulifa kombinga yoimaliwa oyo a pewa naashi osha nghundipaleka oshipofa shepangelo shi li ominge naye.
Mangestrata okwa ti oumbangi oo a pewa okwa li wa dja momafeekelo nomakonakono, ashike kakwa li lela a udifwa ko nawa kutya Willemse ota dulu okulipopila nawa kombinga yoipofa ei, nokutya oipofa ei otai dulu oku mu fadukifa po ngee okwa pewa obooloha.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
