Ovapanguli vavali vokomhangu yopombada yaShakati ova ekelashi eehelo li nasha nehandukilo leedula 15 olo la pewa omunangeshefa wokOwambo konima eshi a monika ondjo moshibofa shekwatongonga.
Magestrata ou a yandja ehandukilo kuSindano Hango (41) pexulilo loshibofa shaye momhango yaShakati mu Febuluali 2022 okwa li a mona kutya kapu na nande omatomeno asha taa imbi a yandje ehandukilo leedula 15 modolongo, ngaashi tashi tongwa kokatendo kekwatongonga, omhupanguli Johanna Salionga, osho a ti ngaho pefimbo lomhangu yeehelo opo ehandukilo li talululwe Omaandaxa momhangu yopombada yaShakati.
Salionga okwa ti vali kutya ina mona mo nande epuko mepangulo lamagestrata eshi a tokola opo a yandje ehandukilo leedula 15 kuHango.
Okwa mona kutya Hango ke na nande etomeno lokuninga eindilo li li ngaha, ndee ta ekeleshi eehelo laye.
Omupanguli Duard Kesslau okwa twa kumwe netokolo laSalionga.
Hango okwa li ta tamanekelwa okukwata keenghono omukainhu komukunda wavo, osho sha ningwa muKotoba 2014.
Hango okwa ti ke na ondjo petameko loihokolola yaye muMarsa 2017.
Pefimbo loihokolola, Hango okwa lombwela omhangu kutya okwa li ashike va ya moixulo shi li paudafano, nokakwa li sha ningwa keenghono.
Metokolo olo la ningwa muFebuluali 2019, magestrata Leopold Hangalo, okwa mangulula Hango koshibofa shekwatongonga.
Epangelo ola ya komhangu yopombada, opo li ka kondjife etokolo olo, ndee muFebuluali 2021, ovapanguli vavali vokomhangu yopombada yaShakati tava ekeleshi etokolo olo ndee tava mono Hango ondjo moshibofa shekwatongonga.
Epangelo ola tuma oshibofa komhangu yamagestrata yaShakati opo Hango a ka pewe ehandukilo.
Hangalo okwe mu pa ehandukilo leedula 15 modolongo muFebuluali 2022. Meehelo laHango, omwa ulikwa kutya magestrata okwa ninga omapuko mahapu mokuyandja ehandukilo.
Mepangulo li nasha noshinima eshi, Salionga okwa ti omhangu oya mona kutya oibofa oyo Hango ta tamanekelwa okwa li ya kula neenghono noshiningwanima oshi na omawii mahapu kunakuningilwa omunyonena, okwa xulifa ta ti kakwa li pu na omatomeno a yele opo kehandukilo ku kufwe.
Ehandukilo leedula 15, okwa li lela la wapala pakutala koshiningwanima osho a ningila oshihakanwa, Salionga osho a ti ngaho.
Okwa weda po vali kutya kapu na nande oshinima shimwe osho tashi yandje etomeno kutya Hango oshike a ningila oshinima shi li ngaho opo ngeno a pewe ehandukilo li shona, li dulife olo magestrata kwa li a yandja. Hango okwa li a kalelwa po kuhaende Hettie Garbers-Kirsten, tava telwa kuMarcia Amupolo.
Omupedu tamanekindjai Lucious Matota okwa li a kalela po epangelo.Kind Regards,
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
