Ombwa onkwawo ya yakwa po nokudhipagwa

“Iipula owala wa kanitha kuume koye. Ombwa ndjoka kaya li owala kuume kandje, ashike oya li wo kuume kopothingo kokanona kandje, nokwa li aluhe hayi kala natse megumbo,” osho Josten Bauleth (32), mwene gwombwa ndjoka ya yakwa molugumbo lwegumbo lye mOtjomuise, oshiwike sha zi ko, a popi ngaaka.

Ombwa yaBauleth yedhina Coco, otaku hokololwa ya yakwa molugumbo lwegumbo lye mOtjomuise Station 5 mOvenduka, noya landithwapo kooN$150 nokuningwa po okapana.

Otaku hokololwa kutya ombwa ndjoka oya landwa po mEtitatu komukiintu gwontumba mOtjomuise ngoka ha landitha onyama.

Bauleth okwa hokolola kutya mesiku lyoshiningwanima, ethimbo lyomutenya manga e li kiilonga, okwa yakula okatumwalaka kongodhi kutya omweelo gwolugumbo lwe ogwa patuluka.

“Onda tondokele mbala kegumbo nedhiladhilo kutya egumbo lyandje oli na okukala lya teywa. Sho nda thiki kegumbo onda adha ayihe yi li nawa, ashike ombwa yandje kaya li mo. Kasha li nande she etele ndje omalimbililo molwashoka okwa li tandi ipula kutya Coco okuli owala puushiinda. Ashike sho pwa piti oowili onda kwatwa komalimbililo, nonda ningi etseyitho lya kwatelamo ethano lyoombwa yandje okutseyitha kutya onda kanitha ombwa naangoka teyi mono ota pewa okati koonyala kooN$1 000,” osho a hokolola ngaaka.

Ayihe oya lunduluka sho Bauleth a yakula ongodhi okuza konomola keeyishi kongulohi, nokwa tseyithilwa mpoka ombwa ye yi li.

“Onda dhengelwa komukiintu ngoka a mono sho ombwa yandje ya landithwa po kooN$150 komukiintu gulwe molukanda lwoombashu lwaAgstelaan, mOtjomuise. Sho ndayi ko nopolisi, ashihe osha longwa nale sha pwa. Omukiintu [a landa po ombwa yandje] okwe tu lombwele kutya okwa futu omuntu opo a dhipage ombwa ndjoka, nolwanima okwe yi ningi po okapana,” osho a popi ngaaka.

Bauleth okwa popi kutya shoka tashi mu ehama noonkondo okukala a tala omufekelwa ngoka a yaka po ombwa ye noku yi landithapo, okanona okashona, nongashingeyi okuli natango momapandaanda.

“Ando okwa li ngaa hashi vulika okumona kutya onda geya ngiini komutima. Iinima ayihe otayi tondoka owala momadhiladhilo gandje, okwa li nda lili sho nda dhiladhila nkene nda adha ombwa yandje ndjoka kwa li ndi hole noonkondo ya tulwa mepakete ya ningwa po okapana,” osho Bauleth a popi ngaaka.

Omupopiliko gwopolisi yoshitopolwa shaKhomas, Silas Shipandeni okwa koleke oshiningwanima shoka, nokwa popi kutya oshipotha sheyako lyombwa mOtjomuise osha patululwa nomakonakono ngashingeyi oge li metifa.

“Okwa li wo kwa gwedhwa iipotha yilwe yi na sha nombwa sho ya adhika ya ningwa po okapana. Omufekelwa [gweyako lyombwa] okanona, notwi ipyakidhila noshinima shoka,” osho a popi ngaaka.

Oomwedhi ne dha piti, omukalimo gwomoRehoboth, meme Mavourneen Busch, okwa tseyitha ombwa ye yedhina Dalton ndjoka kwa li ya kana ashike lwanima okwa li she mu uvitha nayi sho a dhimbulula kutya ombwa ye oya dhipagwa po nokuningwa po okapana.

Okwa hokolola kutya ongulohi yOlyomakaya momasiku 10 Juni, okwa li a piti pehala lyomalandithilo goombwa nokwa adha onyama yombwa ye ya yothwa yi li muuyaha, omanga omutse gwombwa ngoka ogwo a dhimbulula kutya ogwa Dalton, ogwa li pondhalate yokuyothela. “Dalton okwa li okanona kandje. Okwa li oshitopolwa shegumbo lyetu. Okwa adhika ta ka gwanitha oomvula hetatu natse omwedhi nguka,” osho Busch a popi ngaaka.

“Otwa putudha Dalton okuza sho a li okambwena lela ke na owala iiwike ihamano. Okwa li ha lala kombete yetu. Dalton okwa li ombwa onyanyukwi, omwiinekelwa, omunambili, e na ohole noyindjiyindji iiwanawa,” osho Busch a popi ngaaka.

Dalton otaku hokololwa a kana momasiku 8 Juni pethimbo lyoshitumbetango, omanga aakuluntu ye li kiilonga.

Okwa gwedha po kutya aanona omo ya li megumbo ethimbo ndyoka, ashike inaya uva sho ombwa yaandjawo ya yakwa mo.

Shoka okwa li she eta aafekelwa yaali, Ricardo Kastoor naTeodor Itembu, ya tulwe miipandeko taya tamanekelwa uufuthi nemonitho lyiihuna lyoshinamwenyo. Ehangano lya totwa po nelalakano lyokuhwahwameka opo okulya ombwa ku hulithwe po moshilongo lyedhina Justice for Animals Trust, olya tula omambolota omanene moondolopa ngaashi mOvenduka, mOndangwa osho wo mOngwediva ga thanekwa ombwa ndjoka yedhina Dalton netumwalaka lyi li ompinge nokulya oombwa.

Ashike nando ongaaka, konima owala yomasiku omashona sho oshiningwanima shaDalton shi ingaana miikundaneki, onzonkundaneki ndjika oya mono nkene omahala ogendji momatala gaMuthiya moshitopolwa shaShikoto osho wo momatala gaShakati moshitopolwa shaShana taga landithwa onyama yombwa.

Aalandithi momatala gopaali oya lombwele onzonkundaneki ndjika kutya onyama yombwa oyiholike noonkondo monooli yoshilongo, omanga mboka haya li onyama yombwa oya popi kutya kaye na esiku ya hulithepo oku yi lya.

Sylvia Breitenstein gwomehangano lyokugamenena iinamwenyo lyedhina Society for the Prevention of Cruelty to Animals (SPCA) okwa kondema oshiningwanima shoka nokwi indile Aanamibia ya shilipaleke kutya iinamwenyo yomomagumbo gawo oyi li megameno.

Okwi indile mboka taya itsu iinamwenyo yomomagumbo ya kana, kaaye yi landithe po nenge ye yi kaleke momagumbo gawo, ashike naya kwatathane nomalelo nenge noshikondo shoSPCA.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.