Ombelewa yomuprima minista oya ti otai twikile nokuyambidida omaumbo oo a mona oixuna kefundja moshitopolwahoololo shaZambezi eemwedi nhatu komesho.
Oshitopolwahoololo shaZambezi osha dengwa kefundja neenghono neudo, molwodula ya kula oyo ya tembula ovakalimo nokuteyaula po oikunonwa yavo.
Eenghendabala edi oda tameka muMaalisa nokutembula omaumbo neefikola, unene ngaa moshikandjohoololo shaKabbe NorthnoKabbe South.
Eekamba di li lwopo20 oda ningwa moshitopolwahoololo, oko kwa tembulilwa ovanhu.
Oikandjohoololo ikwao oyo ya kumwa kefundja omwa kwatelwa Linyanti, Katima Urban, Katima Rural noJudea Lyamboloma.
Omupopiliko wombelewa yomuprima minista Rhingo Mutamba, okwa lombwela oThe Namibian Oshoondaxa kutya ovayandja nale omavatelo oikulya noipumbiwa ikwao, kovanhu ovo va tembulwa ve li meekamba.
“Epangelo natango ola tameka okulanda oikulya ya wanena eemwedi nhatu. Ohatu pula yoo vali oshikondo nomahangano opaumwe opo a shakeneke eenghendabala depangelo mokuyambidida omaumbo aa a dengwa kefundja,” osho a ti ngaho.
Omunambelewakunhu womafaneko, ewiliko nomayambulepo okomikunda moshitopolwa shaZambezi, Beaven Walubita, okwa lombwela oThe Namibian kutya otava ka kaleka ovakalimo meekamba omo va tembulilwa fiyo omeva a pwiinine filufilu.
Okwa weda po kutya oshitopolwahoololo kashi na vali oikulya nosha teelela shi pewe kombelewa yomuprima minista.
“Omikundu dakeshe efiku, ondjala, omumbwe youndjuwo ngaashi keekamba dokoLuhonono, Lusese noKabbe. Paife ngaha inatu teelela omeva a ye pombada shaashi otaa pwiinine taa endelele.
Ngee omeva a shuna pedu, keshe umwe okwa teelelika a shune keumbo.
Ashike nee, ovo va hala edu peenhele da londa ove na oku shi ninga tava pitile melelo lopamufyuululwakalo,” osho a ti ngaho.
