Ombelewa yomupresitente ya tindi okugandja uumbangi wuutekete wondhila

OMBELEWA yomupresitente oya tindi okugandja uumbangi wuutekete wondhila waanona yomupresitente Hage Geingob osho wo omunyekadhi gwoshilongo Monica Geingos mboka ya yi pamwe nayo koDubai shaUnited Arab Emirates hoka taku ningilwa omutumba omuti-28 gwiilongo ya yooloka tagu ithanwa 28th Conference of the Parties (COP28). Omapulo guutekete oga holoka sha landula omanyenyeto moshigwana kutya otashi vulika aanona mboka ya futilwa kepangelo okuya koDubai nonande ombelewa yomupresitente shoka oye shi ikala nokupopya kutya oya futilwa kaavali yawo.

Aanona yomupresitente nomunyekadhi mboka taya popiwa ye li oshitopolwa sholweendo lwAanamibia ye li koDubai oyo Kayla Elago, Nino Kalondo, Dangos Geingos, Nangula Geingob osho wo Jackson Dukes. Oye li wo pamwe wo nomumwayina gwaGeingos, Salomo Kalondo. Osheendo shi li komutumba ngoka gu li koDubai osha thikama po mAanamibia ye li 142, naakwashigwana yamwe oya pula kutya oshinakugwanithwa shaanona mboka ya kwatelwa molweendo ndoka osha shike.

Sho a pulwa uumbangi kombinga yuutekete mboka, omupopiliko gwomupresitente Alfredo Hengari okwa lombwele onzonkundaneki ndjika tati:

“Opu na iinima ya simana mbyoka omutoolinkundana ta vulu okupula kombinga yomutumba nguka gwoCOP28. Otwe mu lombwela pambelewa kutya uutekete mboka owa futwa komupresitente nomunyekadhi gwoshilongo. Oshinima shoka [shokupula kombinga yaangoka a futila aanona mboka ya ye koDubai] nashi pite, itatu gandja we uuyelele wa sha wa gwedhwa po kombinga yoshinima shoka. Alikana, tala uuyelele mboka wu li momukanda gwiikundaneki ngoka gwa pitithwa [mOmaandaha],” osho a popi ngaaka.

Omukanda gwiikundaneki ngoka gwa pitithwa mOmaandaha, Ombelewa yOmupresitente oya yelitha kutya: “Aanamibia osho wo iikundaneki naya kale ya shilipalekwa kutya kapu na nande osenda yasha okuza moshiketha shepangelo ya longithwa maanona mboka . . . Ombelewa yOmupresitente oya hala wo okukwashilipaleka oshigwana shaNamibia kutya omusholondondo gwosheendo shoka ogwa kwatela mo omahangano goshikondo shopaumwene.” Ombelewa oya popi kutya mboka taya nyana nokupula kombinga yoyana yomupresitente nomunyekadhi gwoshilongo ye li koDubai, otaye shi ningi okunyateka edhina lyomupresitente notashi ningwa nomalalakano gopapolitika. Omutumba ngoka gwo-COP28, ogu na sha niikundathanwa ya pamba

elunduluko lyonkalo yombepo nogwa tameke momasiku 27 Novemba notagu hulu momasiku 10 Desemba.