Ovakalimo vomOtavi ova pulwa kopolifi opo vaha lande ombelela momapandaanda, sha landula eshi ovanhu ve li o26 va kwatelwa meembete konima eshi va lya ombelela yongolo.
Oshiningwanima eshi osha ningwa omutenya mEtine loshivike sha dja ko eshi ovanhu va lya ombelela ya ninga nai oyo va landa komulandifi womepandaanda. Eshi a popya noThe Namibian, omupopiliko wopolifi mOtjozondjupa Maureen Mbeha, okwa ti oindjemo yopetameko oya koleka kutya ongolo oye lifila nokape na nande oshibofa sha patululwa.
“Ombelela inai tulwa nande oudiyo komunhu ashike ongolo oye lifila novanhu ve li o26 ova lya ombelela oyo ya ninga nai osho sha eta va ye koshipangelo. Ovanhu aveshe ovo va lya ombelela oyo okwa li ve li meembete ashike aveshe ova dja mo paife nove li nawa,” osho a weda ko ngaho.
Mbeha okwa twikila nokulondwela oshiwana shiha lande ombelela oyo tai landifwa koohandimwe shaashi otava dulu okukala vehe shi kutya oshike sha eta efyo loshinamwenyo.
“Opo kukelelwe oshinima eshi, ovanhu nava xulife po okulanda ombelela momapandanda unene tuu ngeenge ina ombilixa unene shaashi otashi dulika mu kale mu na oshinima sha puka mombelela ile nakulandifa e na apa ei kufa shihe li paveta.”
Omafiku a dja ko ehangano lokwaandjakaneka omawi momhepo o-NBC oya lopota kutya ovalumenhu vatatu okwa li va monika tava landifa ombelela momundingonoko waSaamstaan. Natango otaku popiwa kutya konima eshi ovanhu va lya eedingu, odo ovanhu vahapu have di li ashike inadi telekwa, aveshe ova tameka okukala va hala okukunga.
Meenghundafana noNBC, kamsela woshikandjohoololo shaTavi, George !Garab, okwa ti mokati koihakanwa o26, vavali vomuvo okwa li ve liumbata.
“Omwa kwa telwa yoo ounona va shona ovo navo va lya onyama ei noshi li lela onghalo ya nika oshiponga,” !Garab osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
