Ombaanga ABSA ya hala yaVenduka

OPENA ompito opo ombaanga ndjoka oyo ayike moshilongo yi li momake gaaNamibia yi kuthwe mo.

Ompito ndjika oya holoka po sho ehangano ndyoka olyo li na iipambuliko oyindji mombaanga ya Bank Windhoek , Capricorn Investment Holding [CIH] aniwa ta li dhiladhila okutokola ngele ota li landitha po iipambuliko yalyo kehangano lyombaanga ya South Africa yedhina ABSA.Oomvula ne dha piti Namibia okwa li a landa iipambuliko yooperesenda 34,4 ya ABSA, mbyoka ya li mehangano CIH, omolwaashoka aaniipambuliko aaNamibia kaya li ya hala oku gandja ewiliko lya CIH li ye miikaha yehangano nenge yooyene ye li pondje yoshilongo.Metitano ABSA na CIH oya pititha omushangwa ngoka tagu ulike kutya mbaka otaya kundatha kombinga yokutaambathana iipambuliko.’CIH okwa tseyitha euvathano itaa li dhengele ndyoka lya adhikwa pokati kaABSA naye, nelalakano kutya ongundu ya ABSA oya hala okumona iipambuliko oyindji mehangano lya Capricorn Investment Holding [CIH],’ pahapu dhomukuluntu wiliki gwa CIH, Gida Nakazibwe -Sekandi.Pethimbo ndino CIH oku na iipambuliko yooperesenda 72,9 mombaanga Ya Windhoek. Ehangano lyomapungulo lyaaniilonga Nam-mic Financial Service oli na iipambuliko yooperesenda 10,3 naaniilonga ya CIH oye na iipambuliko yooperesenda hamano.Kapena we omauyelele galwe ga gwedhwa ko kutya CIH na ABSA euvathano ota ye ke li koleka uunake nenge iikwashike ishewe ya kwatelwa mo.Omahangano ngaka gaali ogena euvathano lyokwaatya sha kombinga yiinima yago, onkene kapena we sha shoka taga popi kombinga yeuvathano lya tseyithwa, osho omushangwa ngoka Nakazibwe Sekandi a nyola gwa ti.Omumvo 2008 Absa okwa li a ningi eindilo a pewe ombapila yokulonga iilonga yopambaanga ,ndele okwa shunine monima ta ti omahupilo oga li kaage li nawa.ABSA okwa li a tokola a indile a pewe epitikilo opo a pewe ombapila a egulule ombelewa oshona ndjoka ta yi kala mekwatathano nombelewa onene koSouth Africa.Ombaanga onene ya Namibia oya li ya gandja ombapila ndjika ku ABSA, ndele osha li shi iikwatelela kiinima yontumba.Ombelewa ndjika oya indikwa opo kaa yi longe iilonga yopambaanga.Omahokololo kutya ABSA okwa hala okugalukila moshilongo ethimbo ndiyaka okupitila moMbaanga ya Windhoek , oga li ga tindwa kombaanga ya Venduka.MuApril 2009 Omukuluntu wiliki gwa Bank Windhoek , James Hill okwa lombwelele oThe Namibian kutya, ombaanga ye oya tala ko ABSA ongo ehangano ta li thigathanapo nolye, mokuhila aayakulwa. Okwa tile ‘Ota tu koleke kutya Ombaanga yaWindhoek ka yili moonkundathana na ABSA opo ando nguka a lande ombaanga ya Venduka. Absa okwa ka hulitha po elongelokumwe nombaanga ya Venduka konima sho pwa li pwa ningwa etseyitho kutya Absa ote ya moNamibia ongo ombaanga, oshoka oku za mpoka ndjika oya li ombaanga ta yi ka kondja naandjoka yaVenduka moku konga aayakulwa.Ombaanga ya Venduka oya kala yi na uuwanwa owindji uule woomvula ndhoka yo ya kala yi li momake gaaNamibia yoyene, okuyeleka noombaanga ndhoka dhi li miikaha yaaSouth Africa.Absa oyo ongundu hangano yiimaliwa moSouth Africa na oya kala uule woomvula odhindji yi na iipambuliko yooperesenda 34,4 mehangano lya Capricorn Invetment holdings.Aanamibia oya ka landa ko ooperesenda ndhoka naashika osha fala sigo oompoka kutya CIH nombaanga ya Venduka oya ningi omahangano ge niwe kaaNamibia yoyene.Sho ombaanga ya Barclays ya landa iipambuliko oyindji moABSA , CIH na Barclays Bank 2005, mbaka oya ningi aathigathani moshikondo shiimaliwa.Ngashingeyi pethimbo ndika ABSA a hala okulanda ko Bank Windhoek, aaNamibia oyendji ota ya indile opo oombaanga newiliko lyadho dhi tulwe miikaha yaaNamibia yoyene.Gumwe gwaamboka ya indile shika shiningwe oye amushangandjai gwaagundjuka ,Elijah Ngurare ngoka a tile kutya na pa totwe ompango ndjoka ta yi eta kutya oombaanga odha tulwa miikaha yaa punguli yamo.Okwa tile ye ita pula oombaanga dhi ninge po dhopashigwana ndele okwa hala okumona ewiliko nuumwene woombaanga wu li miikaha yaaNamibia yoyene.Ngurare okwa tile oombaanga ndhika kadhi na ekalelopo ta li holola omutungilo gwoshigwana sha Namibia ashihe.Ngele Absa okwa sindana okulanda iipambuliko oyindji mu CIH, nena ota ka kutha ko woo ombaanga ya Venduka noshowo ota ka kutha CIH mo Zambia na Botswana.