Omatompelo ngoka Amushelelo ta tindilwa oboloha

E na anuwa onkalondjigilile yokweendulula iikoya

OMUNANDJUNGU ngoka wo oshilyo shongundu yoNamibia Economic Freedom Fighters (NEFF) Michael Amushelelo okwa kala mondjeedhililo uule woomwedhi dha konda puntano, nahahende gwe, Kadhila Amoomo okwa kala ta kondjitha opo omuyakulwa gwe a mangululwe mo mongali ashike sigo oompaka ineshi pondola.

Amushelelo okwa tulwa miipandeko lwiikando oyindji unene tuu okuza omumvo gwa zi ko, noyindji yomuyo oye ya ongoshizemo shomahololomadhiladhilo ge na sha nokukwathela aakwashigwana mboka taya dhengelwa konankondongolo.

Lwoshikando sha hugunina, Amushelelo okwa dhengwa mokakuma momasiku 21 Maalitsa sho a kwatele komeho noku unganeka ehololomadhiladhilo kombinga yonkalo yi li pombanda yokwaana iilonga moNamibia, nonande okwa li ya tseyithilwa kondjayi yetanga lyopolisi moshilongo Joseph Shikongo opo ya konge esiku lilwe kaali shi mesiku lyetyapulo lyemanguluko – omolwomatompelo ge na sha negameno.

Aaunganeki yalwe mboka ya tulwa miipandeko esiku ndyoka opamwe naAmushelelo, omwa kwatelwa oshilyo shongundu yoPopular Democratic Movement megumbo lyopashigwana Inna Hengari, osho wo omunandjungu Dimbulukeni Nauyoma.

Ayehe yatatu oya tulwa miipandeko nokupatululilwa iipotha ya kwatela mo okwe eta evundakano moshigwana, okuyonagula omaliko gepangelo osho wo okukwahwameka evundakano moshigwana.
Lwanima Hengari naNauyoma oya pewa oboloha yooN$5 000 mu kehe gumwe.

Ashike nando ongaaka Amushelelo okwa tindilwa oboloha mompangu yamangestrata gwaVenduka moKatutura, lwanima hahende Amoomo okwa tokola opo oshipotha shoka eshi fale kOmpangu yoPombanda opo etindo lyokugandja oboloha li talululwe ashike natango eindilo lyokupewa oboloha olya tindwa.

Okuza mpoka Amushelelo okwa gandja elombwelo kuhahende gwe opo ya pule komeho, ya ye kOmpangu yaShigako, opo etindo lyoboloha koompangu mbali dha tumbulwa metetekelo li talululwe ko ku taliwe ngele ota pewa oboloha.

Ompangu yoPombanda hoka Amushelelo a hugunine okwa lombwelwa kutya omatompelo ngoka ga gandjwa kompangu yamangestrata sho ye mu tindile oboloha oye ga talulula muule ashike kaye wete pu na epuko lya sha nonkene oya tindi oku mu pa ompito yokwi ifutila mo.

MuApilili sho mangestrata Sally Salionga, a tindile Amushelelo ompito yokwi ifutila mo okwa popi kutya [Amushelelo] oku na onkalondjigilile yokwe endulula iikoya, nokwa gwedha po kutya ke wete we pu na oompango dhilwe ndhoka ta vulu okupewa a kale ti iyutha kudho ngele okwa mangululwa mo mongali opo dhi mu indike kaa kale we ta endulula iikoya mbyoka hayi mu fala mondholongo.

IIPOTHA A TAALELA

Salionga okwa popi kutya Amushelelo okwa mangululwa mo mondjeedhililo lwiikando itatu miipotha yilwe, moka iyali yomuyo ya faathana, naashoka otashi ulike kutya uuna a mangululwa mo ke na konasha oha shuna moshigwana nokutsikila naashoka a lombwelwa kaaninge we uuna a pewa oboloha.

Pehulilo lyaJanuali numvo Amushelelo okwa pewa oboloha mompangu yamangestrata gwaMbaye, konima sho a tulwa miipandeko a kwatela komeho ehololomadhiladhilo pomatungilo goositola mOmbaye.

Amushelelo okwa li a kwatela komeho ehololomadhiladhilo pomatungilo gedhina Metlife Plaza Mall, mpoka tapu adhika oShoprite moka kwa li hamu longo nakusa Fabiola Zondjembo (25), ngoka i ikutha omwenyo muJanuali, sho taku hokololwa kutya okwa kala ta monithwa iihuna komuhona gwe.

Mondholongo, Amushelelo okwa kala mo omasiku omashona nokwa mangululwa mo koboloha yooN$3 000 opamwe nomalombwelo kompangu kutya ina kutha we nande ombinga momahololomadhiladhilo kaage li paveta, nenge okuya momangundumano kaage li pamulandu.

Konima yiiwike iyali, natango Amushelelo okwa tulwa miityaka mOvenduka. Shoka osha landula sho kwa li a kwatele komeho ehololomadhiladhilo lyaayopaleki yomomapandaanda gaVenduka mboka kwa li taya kondjitha omagwedhelo nonkalo yi li nawa miilonga, naashoka okwa li nokuli she eta aayopaleki ya geye nokuhanagula mondingandinga yoshilandopangelo sho ya tameke okukutha mo iiyagaya momandoloma nokukakeka ondolopa.

Moshiningwanima shoka Amushelelo okwa li a patululilwa oshipotha sha kwatela mo okuhwahwameka evundakano moshigwana osho wo eyonagulo lyomaliko nokwa pewa oboloha yooN$3 000.

Amushelelo nakuume ke Gregory Cloete, oya taalela wo oshipotha shomapingakanitho giimaliwa naambyoka yopondje yoshilongo sha tseyika nawa Forex.

Amushelelo naCloete kumwe otaya tamenekelwa iiningwanima yi li 348, yekengelelo, uufuthi okupitila mokatoo, uukengeleledhi wopashimaliwa, okukutha aantu oshimaliwa nomukalo gwaali paveta, okuninga ongeshefa ya pamba ombaanga shaa li paveta – shoka shi li ompinge nOveta yOombaanga, uukengeleledhi wiifuta yokongulu, osho wo endopo lyokufuta iifuta yokongulu.

Epangelo otali tamaneke kutya, okuza muSeptemba 2018 sigo omuKotoba 2019, Amushelelo naCloete oya kala nongeshefa yuukengeleledhi mboka ya kala taya uvanekele aakwashigwana oshimaliwa sha kola uuna ya gandja iimaliwa yawo kuyo. Aanangeshefa moka oya kala nee taya taamba oshimaliwa okuza kaakwashigwana nokuya tseythila kutya otaye shi ngeshefa komapingakanitho noshimaliwa shopondje yoshilongo opo shi tane, naashoka oya kala taye shi ningi okupitila mongeshefa yawo tayi ithanwa Global Growth Investment Namibia.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.