Opolifi otai konakona oipofa ihamano yomateyo omaumbo ya didilikwa mexuliloshivike.
Ovatamanekwa vehe shiivike ova teya eumbo mOvenduka, ndee tava kufa mo oinima yongushu yoshimaliwa shi fike poN$90 800.
Omupopiliko wopolifi omupedu komisina Kauna Shikwambi, molopota yopolifi Oshoondaxa okwa ti oinima okwa li ya vakwa po Etine pokati kotundi 16H00 notundi 07H00 Etitano.
Shikwambi okwa ti oinima ei inai monika natango nokapu na nande omunhu a mangwa po. Omakonakono opolifi otaa twikile.
MoKhomasdal, ovatamanekwa ova ya meumbo va pitila mekende, ndee tava vake mo oinima yongushu yoshimaliwa shi fike poN$22 700.
Shikwambi okwa ti oinima inai monika natango nomakonakono opolifi otaa twikile.
Moshiningwanima sha faafana koSuiderhof mOvenduka kalyamupombo okwe liteyela meumbo lovanhu ndee ta teya osheifa yovanhu ta kufa mo oinima.
“Ongushu yoinima natango kai shiivike. Kapu na omunhu a mangwa po ile oshinima sha monika,” Shikwambi ta ti.
Okwa ti omakonakono opolifi otaa twikile. Natango kOutapi, ovatamanekwa ova teya okandingosho pOkaongo kaKaholongo momukunda Oshihwashaaluholo moshikandjohoololo shaUtapi.
Ovatamanekwa vati ova teta omuvelo va longifa oshinima shihe shiivike.
Ova kufa mo oimaliwa, oradio (jukebox), oilongifo yolusheno, ohaasha yeekilohalama nhatu nomalodu. Aishe kumwe oi na ongushu yoshimaliwa shi fike poN$17 967.
Oinima inai monika, nokapu na nande omunhu a mangwa po. Omakonakono opolifi otaa twikile.
Kolukanda ledina Ehangano kOutjo, ovatamanekwa ova teya po omakumba okandingosho va longifa oshinima shihe shiivike ndee tava teyaula eshina lokundombola Etitano.
Shikwambi okwa ti ovatamanekwa ova vaka mo oitenda i na ongushu yoshimaliwa shi fike poN$44 240 nokapu na nande oshinima sha monika po.
KoKatima Mulilo, omutamanekwa okwe liteyela monduda Olomakaya lwopotundi 00H15, ndee ta vake mo ongodi yoSamsung Glaxy A0s nokompiuta yopeke yoHP yongushu yoN$10 000.
“Kapu na osho sha monika po natango. Omakonakono opolifi otaa twikile,” osho a ti ngaho.
Shikwambi otai indile oovene vomaumbo nomatungo va kale va tonata.
Ndee tava kufa omilandu da pumbiwa dokukelela omateyo omaumbo. Oovene vomaumbo otava pulwa yoo vaha fiye momaumbo avo muhe na ovanhu.
“Natango inamu fiya oinima i na ongushu poluheela, oimaliwa meefitola ile moundingosho,” osho a ti ngaho.
Moshipofa sha yooloka, omutamanekwa (33) okwa li a mangwa po mOvenduka Etitano eshi vati a kupula omamanya ndee ta tatula oufano (CCTV) koKlein Windhoek lwopotundi 12H30.
Oufano ove na ongushu yoshimaliwa shi fike poN$32 191.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
