Omananathano goSwapo melelo lyondolopa yaNiipa

Elelo lyondolpa yaNiipa olya taalelwa komananathano giilyo yongundu yongundu yoSwapo tayi konndjithathana okuya mokomitiye yelelo, moka ngashingeyi mu na iilyo iyali yongundu yo-Independent Patriots for Change (IPC) osho wo oshilyo shimwe shongundu yoSwapo.

Elelo lyondolopa yaNiipa oli na ookansela yaheyali moka ye li yane ya thikamena po ongundu yoSwapo, omanga yatatu oyo IPC.

Mboka ye li mokomitiye yelelo oyo David Nghifikepunye naPetrus Nakanyala yongundu yoIPC omanga Hileni Iidhogela ogwongundu yoSwapo.

Okomitiye yongundu melelo lyoshitopolwa shaShikoto osho wo moshikandjo shaNiipa otaku hokololwa inaaya nyanyukilwa onkalo ndjoka kutya ongundu yoSwapo oyo yi na iipundi oyindji melelo lyondolopa ndjoka ashike onkene ookansela yawo keyamo mokomitiye yelelo.

Shoka okwa li nokuli she eta omukwatakanithi gwongundu moshitopolwa shaShikoto, Armas Amukwiyu a kuthe miilonga pakathimbo mayola gwaNiipa, Augustus Jafet, oshiwike sha zi ko, sho taku hokololwa a yambidhidha ongundu yompilameno momahogololo goonkatu dhaanapolitika mondolopa yaNiipa.

“Oto tseyithilwa ngeyi kutya okwa kuthwa iinyangadhalwa [iinakugwanithwa] ayihe yongundu momudhingoloko nenge pondje yomudhingoloko gwaNiipa, tashi tulwa miilonga mbala,” osho Amukwiyu a popi ngaaka montumwafo.

Amukwiyu okwa lombwele wo mayola kaakwatathane nElelo lyOndolopa yaNiipa, osho wo omukuluntuwiliki nenge ookansela dhoSwapo kombinga yekutho miilonga lye.

Jafet otaku hokololwa kuthwa miilonga pakathimbo sha landula sho u ulike iilyo yongundu yoIPC oyo yi ye mokomitiye yelelo nokwa tindi okukutha ombinga mokupopila ookansela yoSwapo mboka yu ulikwa opo ya ye mokomitiye yelelo pethimbo lyomahogololo gookansela melelo lyondolopa yaNiipa pehulilo lyomumvo gwa zi ko.

“Chief (Jafet) iha popi nookansela oonkwawo dhongundu yoSwapo melelo lyondolopa. Oya pumbwa okulongela kumwe nelalakano lyokuhumitha komeho ondolopa. Okuwete ongundu yoSwapo ya hala oku mu kutha onkatu yuumayola ashike hasho shi li ngaaka. Ongundu yoSwapo oya hala owala okukala mokomitiye yelelo,” osho onzonkundaneki okuza melelo lyondolopa ndjoka lya lombwele oThe Namibian ngaaka, mEtiyali.

Onzonkundaneki ndjika oya popi kutya ookansela yoSwapo oya li nethaneko lyokuninga oshigongi mOmaandaha, ashike Jafet koshigongi shoka inaya ko.

“Okwa popi kutya koshigongi shoka oteya ko owala ngele Amukwiyu a yamukula ombapila ye ndjoka e mu shangele mEtitatu lyoshiwike sha zi ko,” osho onzonkundaneki ya popi ngaaka.

Jafet oshiwike sha zi ko, okwa shangele Amukwiyu ombapila moka ta pula a lombwelwe omatompelo ngoka ge mu kuthitha miilonga pakathimbo nokwe mu ula wo kutya [Amukwiyu] otayi moshipala ehumokomeho mOniipa nomoshitopolwa shaShikoto.

Uunambo, ongundu yaakalimo yomOniipa oya ningi ehololomadhiladhilo taya indile opo Amukwiyu a shune Jafet miilonga.

“Tse, iilyo yoSwapo mOniipa inatu nyanyukilwa ekutho miilonga pakathimbo lya mayola gwondolopa yaNiipa, kansela Augustus Jafet (chief Nangolo),” osho aahololimadhiladhilo ya popi ngaaka momukandanyenyeto.

Aahololimadhiladhilo mboka oya popi kutya kansela gwoshikandjohogololo shaNiipa, Vilho Nuunyango oye tayi olunyala iikumungu yongundu yoSwapo mOniipa.

“Otatu indile eyelitho, kutya omolwashike to hwahwameke ookansela yamwe melelo lyondolopa ya kale ye li ompinge naJafet Augustus-chief Nangolo,” osho omukandanyenyeto gwa shangwa ngaaka.

Aahololimadhiladhilo oya popi kutya oya kanitha eineko nomukumo muNuunyango. Oye mu pe omasiku gaheyali giilonga a kale a yamukula omakemo gawo, nongele hasho ni ikuthe miilonga moompadhi oontalala.

Nuunyango okwa lombwele oThe Namibian uunambo kutya ye ke na sha nande nekutho miilonga pakathimbo lyaJafet.

“Otandi yamukula omukandanyenyeto gwawo ngaashi ya pula shi ningwe ashike ngame kandi na mo nande olunyala mekutho miilonga pakathimbo lyamayola,” osho Nuunyango a popi ngaaka.

Amukwiyu ina vula okumonika konzonkundaneki ndjika opo a tye ko sha.

Omukwatakanithi gwongundu yoSwapo moshikandjo shaNiipa, Paulus Shimakeleni okwa tindi okutya ko sha kekutho miilonga lyamayola, nokwa popi kutya iha kundathana iinima yongundu yawo kiikundaneki.