Eshi ofikola tai tameke nena, ovakulunhufikola otava indile ovanafikola va alukile kofikola nomikalo dopovanhu, tava indile ovo va dja poima panyika nawa vah shinde ovo itava dulu okulanda omindja dofikola dipe.
Omukulunhufikola pofikola yedina Othika Combined School Anna Ankono okwa ti omalushindo meefikola otaa limbililike notaa kumu nai oilonga yofikola yoonakuningwa oihakanwa, osho tashi eta edopo.
Enkono okwa ti osha fimana opo ovadali va longe ounona vavo omikalo, ta ti ounona ovo va tekulwa nawa komaumbo itava ehameke vakwao, oku va dina ile okukanifa omikalo.
“Ehongo ohali tameke meumbo, onghee nee osha fimana opo ovadali va longe ounona vavo opo va kale ve shii eshi sha tambulwa ko moshiwana, osho shi li mondjila naasho shihe li mondjila,” osho a t ngaho.
Ankono okwa ti ofikola yaye oi na eemhango da kindja odo hadi leshelwa ovanafikola petameko lomudo keshe, ta weda po kutya ovanambelewa vopolifi noministili yefikopamwe lopaukakwashikekookanhu nonghalonawa younona ohava talele po ofikola opo va longe ounona kombinga yoilanduli yokuteya omilandu odo itadi popile omalushindo.
“Ounona vamwe otashi dulika nokuli va twe ofikola okati molwaashike oumbada wokushindwa,” osho a ti ngaho.
Omukulunhufikola pofikola yedina Garder Academy Fortune Simbarashe okwa ti ofikola yaye oi na omulandu ihau popile nande oludi lasha lolushindo novanafikola ovo hava shindi vakwao otava ka tulwa pedu ile nokuli va tewe mofikola.
Simbarashe okwa ti olushindo ohali eta ovo tave li ningilwa va kale ashike ve litongola.
“Nakuningwa oshihakanwa oha kala ashike e li kalela nomafimbo amwe otashi dulika a tule ehandu laye muvakwao,” osho a ti ngaho.
Okwa indila ovanafikola opo vaha kale alushe nokulwifa ovo tave va shindi, ta ti omafimbo amwe nava udafane ashike pambili, ile va fiye po ashike onhele oyo. Okwa indila yoo vali ovadali va longe ounona vavo omikalo komaumbo.
Omukulunhufikola pofikola yedina Mulongeni Primary School Jannus Haukongo okwa ti oihakanwa yomalushindo luhapu ohai tameke okukala i na oumbada wokukala oyo aike shaashi oi na oumbada kutya ngee ve li ovo aveke opo hava ponokelwa keemhote.
Okwa weda po kutya ofikola yaye ohai yandje omahandukilo keemhote ngaashi oku di kelela diha kufe ombinga momaudano, tava pewa oilonga yokukomba eengulu dofikola ile va kale nokuli inava ya pokafudo komusha.
“Ohatu yandje omahandukilo keemhote oku di kelela diha kufe ombinga moinyangadalwa yofikola opo di lihonge nokukala di shii kutya oda ninga oshinima shapuka,” osho a t ngaho.
Omuhongifikola kofikola yedina Delta, Elizabeth Iyambo okwa ti ofikola yavo ohai tula ounona modolongo ovo hava shindi vakwao, te va indile va fimaneke vakwao kutya nee otashi pula shike.
“Olushindo oshinima shakula osho hashi uya momikalo da yooloka nohashi eta ovanafikola va kale vehe na omukumo muvo vene. Ohatu yandje omahandukilo keemhoto noku di pa oilonga mofikola ngaashi okulima omwiidi,” osho a ti ngaho.
Okwa indila ovadali va londwele ounona vavo kombinga yokushinda vakwao noku livangeka okuyola vakwao, ta weda po kutya ounona vamwe ohava ula vakwao oinima ihe fi okupwilikinwa.
“Oshinima eshi ohashi ningwa ngee okaana kamwe ke na eenghaku da pomboka ile omundjalo wofikola wa kulupa. Ovadali nava honge ounona kutya okuninga oshinima shi li ngaho osha puka,” osho a ti ngaho.
Omupedu kulunhuwiliki woministili yehongo, omaduto oinima ipe, ovanyasha, omaudano, omaunghulungu nomifyuululwakalo Edda Bohn okwa ti okatendo kehongo lopetameko okakelela oimbuluma aishe yopalutu nopamadilaadilo, mwa kwatelwa omalushindo notaka pula evyulo li li pauyuki, eenghedi diwa domaliumbato nomudingonoko wofikola wa amenwa.
Okwa ti outeku wakeshe efimbo nohole ohai pitike ounona va kale ve na olukeno, va dule okuwilika nawa omaliudo avo nokufimaneka yoo vakwao, osho hashi va ningi va kale vehe fi eemhote.
“Ngee va kala itava tonatelwa, ounona otashi dulika va kale ve wete vehe li meameno nokupopya osho va shakeneka, osho tashi eta va kale inave lipaka mo, va kale va mwena ile va wililwe po komadilaadilo,” Bohn osho a ti ngaho.
Omilandu dimwe oda kwatela mo ehongo leewino donghalamwenyo, exungomwenyo nomayambidido opanghalafano, mwa kwatelwa okulopota nokukalela po oiningwanima ya mana mo taku dengele.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
