AANAMIBIA ota ya landithwa omalovu gowhisky nobrandy ngoka ga indikwa okulandithwa moSouth Africa, oshoka naku ga longa okwa li a indikwa a tsikile oku ga longa koshilongo hoka.
Omalovu ngaka geli kohi yedhina Sir Edwards Whisky no Royal Superior Brandy kageshi goshili ndele iifekela yaangoka golela, na ogendji otaga landithwa miilongo yomuumbugantu wAfrica.Omuwiliki gwehangano ndyoka lya li hali longo omalovu ngaka lyedhina Equator Beverages, Danie Strydom okwa ti yo oya li ya mwena okudhunga omalovu ngaka konima sho ya mono uupyakadhi na Sir Edwards gwa Scotland.Nonando omudhungi nguka okwa holola kutya shika osha ningwa, sho moongeshefa dhomalovu dha Namibia mwa konakonwa omwa adhika natango omalovu kohi yedhina Sir Edwards finest whisky yiifekela.Strydom sho a pulwa okwa ti shika oshi li ngaaka ngiika molwaashoka mboka oyena natango ostocka onkulu yoshikunwa shoka.Okwa ti omahangano ga Namibia ngoka ga li haga landa omalovu ngaka, ngaashi, Liquor na Tobacco World CC na Namica oya li ya tseyithilwa kutya omalovu ngaka itaga landithwa wee moSouth Africa.Inapa monika okomenda okuza ku Namica sho oshinyolwa shika sha nyanyangidhwa.Omanga omukalelipo landithi gwa Liquor na Tobacco World Cc okwa ti sigo oompaka oha ya landitha omalovu ngoka goludhi lwa Sir Edwards whisky na Royal Superior Brandy.Ooyene yongeshefa ndjika oya li ya geya sho ya pulwa kutya ohaya landitha omalovu ngoka giifekela,namwene gwongeshefa okwa yamukula a geya kutya ye iha landitha iifekela.Equator Beverages okwa hulitha okulonga owhisky ndjoka konima sho ooyene yedhina ye ya pula yeshi hulithe po, unene tuu sho ya li ya shanga kutya ndjoka owhisky yoshili nonando yo oye shishi kutya hasho.Ooyene yedhina oya li ya ningi omakonakono no ya mono kutya owhisky ndjoka kayi shi yoshili. Oya ti oya mono kutya oshinima kashi shi owhisky ndele aanwi yomalovu otaya landithwa oshinima shoka tashi hokololwa ongo owhisky.Omakonakono oga ulike ishewe kutya oalcoholi ndjoka taku tiwa oyi li ooperesenda 43 mekende ndjoka yi li mondjila oondjoka yooperesenda 39,81.Omalovu ngoka giifekela hago ageke kwiitaalwa haga landithwa moshilongo.Ota pa hokololwa kutya ngaka ohaga landithwa kondando yi li pevi okuyeleka naangoka goshili.
