Petameko lodula ya dja koTheofelus Nghishidimbwa (12) namumwaina umwe okwa li vati va dja meumbo va konga oikuni omutenya wEtine.
Ashike Ngishidimbwa ina aluka ko vali. Ovakwapata vaye novaashinda okwa li va tameka okumukonga ndee tava mono eemadi daye di li pelambo ledu olo li li popepi neumbo lavo.
Efiku la landula, olutu laye okwa li la monika li li melambo ledu limwe lo nalenale momukunda Ondando moshikandjohoololo shaNiipa moshitopolwahoololo shaShikoto.
Omukunda okwa li wa fiwa wa uda nai neenghono koshinima eshi.
Efyo laNghishidimbwa olimwe lomomafyo akwao oo a eta opo omufitaongalo Elifas Hainghumbi noilyo imwe yomomudingonoko va shangele omukanda koministili yomidingonoko, omifitu nomatalelepo, Pohamba Shifeta, muFebuluali opo a kangheke ovanhu ovo tava fe omalambo va kufe mo edu va ka landife.
Ovanhu ovo hava fe omadu unene ngaashi okOniipa, ova kala tava popi kutya eengeshefa davo itadi eta nande oshiponga, tava ti ovo tava tanguna kombinga yado itava fimaneke elelo lopamufyuululwakalo waNdonga.
Ashike eengeshefa edi di li ngaha otadi pula eemwenyo dounona.
OKWA YA DIVA
Ina yaTeophelus, Aina Immanuel (27), okwa dimbulukwa nghee olutu laye kwa li la monika momafiku 31 Marsa odula ya dja ko. Konima yeemwedi, omunamukunda umwe, Maria Shikongo (20), naye okwa ka nifa omwenyo waye melambo.
Immanuel okwa ti Teophelus okwa li omunafikola e na omaano a li mondodo 6 pofikola yopedu yaNiipa. “Onghalamwenyo yaye okwa li i hadi eemangela. Okwa li he tu lombwele kutya okwa hala okuninga omushingi weedila, ashike ondjodi yaye ei inai ninga yoshili,” Osho a ti ngaho.
Immanuel okwa ti elambo olo la lya okamona hamungala natango la lya omunhu umwe, ashike okwa li e na elao linene shaashi okwa vatelwa diva.
Okwa ti omunhu ou ina popya vali konima yoshiningwanima eshi.
‘OSHA NYIKA OSHIPONGA’
MuFebuluali odula ei, omufitaongalo Elifas Hainghumbi wokOniipa okwa li a shangela omukanda kuShifeta, ta holola omaliudo aye kombinga yomalambo omadu oo e li momudingonoko waNiipa a nyika oshiponga.
Momukanda waye wa nyolwa momafiku 13 Febuluali odula ei, Hainghumbi okwa ti ounona ve li omulongo ova fila momalambo aa pokati komudo 2018-2023.
Hainghumbi okwa ti okufula omadu okwa nyika oshiponga neenghono ndee ta pula kutya ouministili nau ninge po sha kombinga yomalambo aa.
“Oku dja ashike momudo 2018, otwa ka nifa nale eemwenyo dounona va shona di dule omulongo ovo va wila momalambo oo inaa filwa oshisho,” Osho a ti ngaho.
Omufitaongalo okwa ti vali, eenhele domaulifilo momudingonoko woovene otau hepekwa.
Okwa pula ouministili opo u kwashilipaleke kutya ovanangeshefa vomadu otave liufa komalandulafano e na sha neameno noufemba vokufula omadu inau yandjwa omanga inaku ningwa omapekaapeko kutya oshinima eshi osha nyika oshiponga ngahelipi komudingonoko.
“Ongomufitaongalo onda uda nai koshinima eshi. Keshe odula ohandi i komafudiko ounona va fila momalambo aa,” Osho a ti ngaho.
OSHIWANA OTASHI LILI
“Otwa uda nai, nohatu ku lombwele kutya omalambo omadu momudingonoko waNiipa, unene ngaa oo e li kIiyale, Oniihandi nOndando, aa lya nale ovanhu vatatu. Eemwenyo di dule omulongo okwa li da ka nifwa nale moule weedula omulongo da pita,” Osho va nyola ngaho.
Ongudu yovakwashiwana ei otai pula nee opo ouministili u longele kumwe novakwashiwana opo ku tali ke kutya oshinima shi li ngaha otashi kandulwa po ngahelipi nokuyandja yoo ehongo noikwafifo opo ku kelelwe omafulo omadulu ehe li paveta.
“Ohatu pula nefimaneko linene kutya omufimanekwa minista, tu pa omhito opo tu kundafaneni oshinima eshi, fyee tu taleni kutya oshike shi na okuningwa po opo ku kelelwe oiponga yomafulo omadu e li paveta naao ehe li paveta,” Osho va shanga ngaho.
KAPU NA OSHIMALIWA
Omupopiliko wouministili, Romeo Muyunda, Etine okwa ti oministili oya mona eelopota dihapu tadi popi kombinga yomalambo oo inaa filwa oshisho noya uda omafyo moshitopolwa shaNiipa okudilila moikundaneki.
Okwa ti oministili oya talela po omalambo oo inaa filwa oshisho noya tula po omalandulafano taa pula opo okufula omadu ku mone exulilo.
“Oilonga yokufila oshisho omalambo amwe oya tameka nale, amwe aa pwa nalenale nokuli. Natango otwa uda omafyo noiponga kombinga yoshinima eshi okupitila moikundaneki,” Muyunda osho a ti ngaho.
Okwa ti oministili oya kaleka okukufa omadu momalambo ahapu.
“Otwa pula novanhu ovo va ninga po omalambo oo opo ve a file oshisho.
Nande omalambo a hapu okwa filwa oshisho paife, opu na natango amwe inaa filwa oshisho, unene ngaa oo a kulu naao ovo ve a ninga po vehe shiivike,” Osho a ti ngaho.
Muyunda okwa ti oupyakadi wa kula wokufila oshisho omalambo aa oshimaliwa osho shihe po.
Okwa ti epangelo otali kongo oshimaliwa opo li dule okulonga omalambo aa.
“Natango otwe lipyakidila nokukatuka ongahtu yopaveta, mwa kwa telwa okutula mo oibofa opo ovanhu ovo tava ningi ngaha va mangwe po voo va pewe ehandukilo.
“Oministili natango otai longo nomalelelo opamufyuululwakalo mokufila oshisho oshinima eshi shokufula omalambo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
