Elaka ohali kala po ashike fiyo okomapupi tae uya ngeenge tali tandavelekwa nokuamenenwa po kovapopi valo, unene pakupopya ile pakushanga.
Elaka opo li mone omufika muwa, ola pumbwa okweendela pamwe nefimbo. Opo sha pumbiwa otali lunduluka nefimbo, nande itashi ti li piyaanekwe komalunduluko.
Sho shimwe shomoinima tai dana onghandangala mounyuni aushe paife, outekinoloxi ngaashi wopaengodi neekombiuta, odo hatu dulu yo okulongifa opo tu ninge omapekapeko ile okupula ouyelele wonhumba.
Ashike ngeenge nee hatu kongo ouyelele wonhumba komalungula momapandja afimana ngaashi oGoogle, YouTube ile nande oFacebook ohatu longifa elaka lonhumba ngaashi Oshiingilisha ile Oshiputu nande okuli, nouyelele oo twa pula, oha u uya u li melaka olo twa longifa, ile u uye melaka limwe ndee hatu u tolokele melaka olo twa hala.
Ashike nee, omalaka etu Oshiafrika, ngaashi aa etu omoNamibia fiyo opaife inaa tulwa momalungula ngaashi sha ningilwa omalaka amwepo moAfrika ngaashi Swahili, Afrikaans, Fon, Kikongo ,Tswana nosho tuu.
Nonghee, kufye oshi li edidiliko kutya otwa fa itatu endele pamwe nefimbo, shaashi oilongo imwepo moAfrika oye shi pondola nale.
Ediladilo eli onde li etele yo poshitafula oshikando shotete mefiku eti-15 Shikuku 2024, kwa li nda shivwa onhomenawina ndi kufe ombinga moshinyangadalwa shakula sheuliko lembo londjokonona yaTatekulu Hifikepunye Pohamba, koshiputudilohongo HP kOngwediva, omo konima yasho nda li nda ongala pamwe novawiliki ovalongwa (students leaders) voituputudilo yaUNAM, omo nde va etela efanekondunge kutya nave lipyakidile okukonga ohokwe yokweendifa edilaadilo lokuduta opoloyeka yokutula momalungula omalaka etu Oshiafrika moNamibia ngaashi Oshiwambo eshi hashi popiwa yo nomoAngola, Otjiherero, Khoekhoegowab (Nama & Damara), Rukwangali, nosho tuu.
Eshi otashi ningwa melongelokumwe nepangelo noikondo imwe yopaumwe i na ohokwe moshinima sha tya ngaha. Nedilaadilo eli onda tile ve li fifike komalutuwiliki oiputudilo yavo opo li kundafanwe nawa.
Oshinima eshi otwa pumba oku shi tula moilonga nelitulemo, shaashi elaka li li momalungula otali kwafele ovapopi valo va mone omauwa mahapu, ngaashi okwoongela nokupungula omauyelele, ounongo neshiivo lavo moipambele yakwalukeshe komalungula.
Wo u shiivike keembinga dihapu dounyuni aushe.
Oilongo ihapu ohatu mono ya xuma komesho mokweeta po ounongononi moinima ihapu, ngashi omomanduluko omiti douhaku, shaashi oinima ohave i lilongele momalaka avo vene.
Ohashi kala shipu okukonga omauyelele moshinima osho tava nongonona shaashi ihapu oya pungulwa nale momalungula.
Otashi kwafa ovahongi, ovangonononi novapekapeki noshiwana ashishe ngeenge meteelelwafimbo otwa ka kala tu na omalaka etu momalungula, ashike ondjodi ei otai tu ashike ngeenge fyeni atusheni palongelokumwe nepangelo otwe litula mo neenghono.
Festus Hilifavali Hihalwa omunyasha e na ohokwe melaka lOshiwambo, noku li omuxwaxwameki weyambulepo lalo moNamibia nomoAngola.
Ota monika koiimaila ei: festushilifali@gmail.com
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
