OMAHANGANO oomilongo 23 okuza koombinga adhihe dhuuyuni oga gandja omandilo gago ku Namibia ga hala oku pewa iilonga yokutunga ondama ya Neckatal komulonga gwa Fish moshitopolwa sha Karas. Shika oshikando oshitiyali epangelo lya indile opo omahangano go kutunga ga indile ga pewe iilonga yokutunga ondama ndjoka komulonga gwa Fish. Iilonga mbika oya li ya tulwa mevundakano molwaashoka pwa li ehilathano kombinga yehangano ndyoka li na oku pewa iilonga.
Pethimbo ndika Okomisi yokukondjitha uulingilingi oyi ipyakidhila woo oku konakona ngele opwa li uulingilingi washa megandjo lyotendela ndjoka kehangano lyoko Italia, lyedhina Impregilo SPA.Ehangano ekwawo ndyoka lya li lya hala okupewa otendela ndjika olyo China Henan International Corporation. Omolwa ehilathano ndika opwa li pwa tokolwa opo oteendela yiilonga mbika yi shununwemo. Mesiku lyahugunina lyokugandja omaindilo omolwa iilonga mbika, omahangano gahamano goko China oga ninga omaindilo, gatano ogo ko South Africa, gaali go ko Italia mwakwatelwa, Impregilo, gaali gaza koPutu, limwe lyaza koMorocco, ko Russia,no ko India. Ehangano ndyoka ta li ka sindana oku pewa iilonga mbyoka olya tegelelwa okulonga iilonga ayihe yokutunga ondama pehala mpoka, pamathaneko ngoka ge lipo.
