Omahangano gomahooli taga futithwa ku Namcor

NAMCOR ota ka pula omahangano gatano gomahooli ga fute oodola oomiliona 2,9 dhoskepa ndjoka ya li ya eta omahooli moWalvisbay omwedhi gwa yi.

Shika ote shi ningi molwashoka omahangano ngaka oga li ga tindi okutaamba omahooli gootona 10 000 omatiligane, aniwa oshoka ngaka ka ga li gongushu ndjoka yoshito.Ongushu yomahooli ngaka oya kolekwa kolabora yomakonakono moDurban sha South Africa, onkene omahangano ngoka oga zimine opo omahooli ngaka ga pombelwe mootenga dhago dhokupungula omahooli poWalvisbay.Omuwiliki gwokulipo , gwa Namcor, Obeth Mbui Kandjoze okwa koleke kutya kapena sha shapuka nomahooli ngoka yo ya mbesitele. Okwa ti ngaka oga li ga konakonwa omanga ina geetwa koWalvisbay, nomakonakono agehe oga ulike kutya omahooli ogongushu ngaashi shito.Ndele nando ongaaka , omahangano, lya BP, Total, Caltex, Shell Namibia na Engen oga li ga tindi okutaamba omahooli ngaka no ga ti oge na okukonakonwa kolabora ndjoka omahangano ga hogolola yili mo Durban.Omolwa omakonakono ngaka omahooli oga kala geli moskepa pondje yetulilo lyaWalvisbay. Oskepa ndjika sho ya kala ya thikama pondje inaa yi helula omahooli oya li yina okufutilwa oodola dha America omayovi 20 000 mesiku, Kandjoze okwa ti ehangano lye ita li ka futa iimaliwa mbika ndele ota li yi ukitha komahangano ngoka gomahooli.Okwa ti shika ota shi ningwa oshoka omahooli ngoka ogongushu ndjoka yoshito na ishewe oga etwa moWalvisbay pethimbo ngaashi naanaa ga li ga mbesitelwa komahangano ngaka, sha hala okutya Namcor ina teya euvathano.Kandjoze okwa lundile omahangano ngaka kutya oge na omadhiladhilo omawinayi. Oshoka oga li ga hala oku nikitha Namcor uugoya, nokumutula methano ewinayi.Oshikwawo omahangano oga ningi shika molwashoka Namcor kena omahala mpoka ha pungula omahooli , poWalvisbay.Oha longitha ootenga dhomahangano ngaka okupungula omahooli ngoka ha eta moshilongo gooperesenda 50.