Omahangano aNamibia e li 16 okwa holola ohokwe yokukufa ombinga metoto lehangano leedila lopashiwana laNamibia.
Eshi osha popiwa komupopiliko woministili yoilonga noyeendifo, Julius Ngweda.
“Oministili oya pandula neenghono enyamukulo lihokwifa nehalo loshiwana lokuvatela okutota ehangno lopashiwana lafimana. Oministili oya hala okulombwela oshiwana kutya okomitiye yoilonga ye litula mo oya totwa opo i kwatele komesho omulandu wokutota ehangano leedila lopashiwana. Okomitiye ei oi na ovanhu vamwe ve na owino nounongo moyeendifo yomombada, tava kwashilipaleke kutya omilandu adishe da pumbiwa oda landulwa moshinima omu,” Ngweda osho a ti ngaho.
Ehangano leedila lopashiwana laNamibia, Air Namibia, okwa li la patwa momudo 2021 nomafaneko okutota ehangano lipe lopashiwana leedila ngeno manga Desemba 2026 ina koya okwa li la shiivifwa kepangelo petameko lomudo ou.
Minista woilonga noyeendifo, Veiko Nekundi, omwedi wa dja ko okwa ti kutya ehangano lipe leedila otali ka weda neenghono keliko loshilongo.
“Air Namibia ita aluka. Itatu alula Air Namibia. Ohatu alula ehangano leedila lopashiwana ndee kashi fi Air Namibia. Oyo oinima ivali ya yooloka. Air Namibia okwa ya. Okwa dipawa kwaavo va hala oku mu dipaya ashike ehangano leedila lopashiwana omo li na okukala moNamibia,” Nekundi osho a ti ngaho.
Ngweda okwa lombwela oNampa Etitano kutya okomitiye oyo tai kwatele oilonga ei komesho oye litula mo mokuungaunga netoto lehangano leedila lopashiwana moule wefimbo olo la yandjwa.
“Oyoongalele ei oya fimana mokutota ehangano lopamufika lopashiwana olo tali ka yandje omauwa kuNamibia. Osha fimana okukondjifa kutya etoto lehangano leedila lopashiwana lipe oshikumungu shi na sha nouwa woshiwana. Oministili nokomitiye yoilonga ova panda lela ohokwe yoshiwana moshinima omu, mwa kwatelwa elongelokumwe nohokwe yokukufa ombinga,” Ngweda osho a weda po ngaho.
Okwa fatulula kutya nande oministili nokomitiye oya panda ekufombinga loshiwana, okomitiye otai ka ya moshiwanai i ka konge omayele nomayambidido opo a pumbiwa.
Okomitiye otai ka tameka oshinima eshi shokuya moshiwana pefimbo la wa pala kukwashilipalekwe kutya ekufombinga loshiwana ola kwatelwa mo nawa momafaneko nomayambulepo.
“Onghee nee inashi pumbiwa ohaandimwe ve uye keshe efiku,” Ngweda osho a ti ngaho
– NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
