… Kape na oumbangi ngee omahooli aa fika kovalandi
Opolifi otai ningi omakonaakono e na sha neeloli 69 domahooli odo da dja mehangano lomahooli lepangelo ledina National Petroleum Corporation of Namibia (Namcor) ashike otaku tiwa oda dopa okutwala omahooli kwaavo ve a landa.
Ongushu yomahooli oo a kana inai kolekwa natango, ashike eedjo di shi okulineekelwa moshibofa omu otadi tengeneke kutya ee na ongushu yeemiyona N$49.
Namcor Oshoondaxa okwalombwela oThe Namibia kutya ovatalululi vomavalulo oshimaliwa mehangano ova didilika omalandifo aa.
“Ovatalululi vomavalulo oshimaliwa mehangano kakwa li tava dulu okumona kutya eeloli 69 odo da dja mehangano lokutuvikila omahooli epangelo oda twala omahooli peni,” Omupopiliko woNamcor Utaara Hoveka osho a ti ngaho.
“Noitya imwe, eshi osha hala kutya okwa li pe na oumbangi kutya eeloli oda dja mo mehangano, ashike kapu na oumbangi kutya eeloli odo oda fikifa omahooli kovalandi.” Hoveka okwa ti Namcor okwe lipyakidila nokutalulula ouyelele ou.
“Oshinima eshi twe lipyakidila nasho osheshi kutya ohatu ningi omatalululo aa kombinga yaasho sha monika po kovavaluli. Natango otwe lipyakidila noshikumungu eshi. Ngee okwa didilikwa opo pu na eembululu, ohatu ka tula moilonga osho sha pumbiwa opo di fitikwe. Eembululu odo ngee oda monika odo tadi ufa osho sha pumbwa okutulwa moilonga,” Osho a ti ngaho.
Oshifokundaneki shoThe Namibian Etitano la dja ko okwa li sha kundaneka kutya ovanhu vanhe okwa li va mangwa po pokati kaFebuluali naMarsa shi na sha noumbudi womaaholi moNamcor ongushu yomiliyona imwe.
OMWAALU OTAU I KOMESHO
OThe Nimibian oya uda kutya eeloli da umbata eelita eemiliyona mbali oshinghwanyu heyali domahooli okwa li da didilikwa da londeka omahooli moNamcor kOmbaye, ashike kapu na nande opumbangi kutya eeloli edi oda fikifa ngaa omahooli ovalandi.
Kaku shiiveke kutya oshinima eshi osha ningwa lela oulefimbo u fike peni, ashike ouyelele owa holola kutya keshe ololi otai umbata eelita domahooli di li 40 000. Namcor oha landifa olita yomahooli koN$18 kovalandi vaye ovo hava lande momwaalu muhapu. Eshi osha eta opo omahooli aa a kana pongushu yeemiliyona N$49 ile i dule po.
Omukulunhu wopolifi koshitopolwa shErongo komufala, Nikolaus Kupembona, okwa koleka kutya otaku ningwa omakonaakono kombinga yoshikumungu eshi.
Eedjo oda ti, Namcor okwa ninga eenghendabala dokutala omaanda omahooli ngee pamwe opu na limwe ile amwe taa diya.
Natango vali, ehangano okwa li vali la tala ngee omunino ou hau kufa omaaholi modila wa ukifa momaanda omahooli ou na apa tau efa.
Lwaxuuninwa, ehangano ola pula ovanambelewa wokwaamena omaliko opo va kale tava tale omalinyengo eeloli mehangano. “Oidjemo yeenghendabala edi okwa li lela tai udifa nawa,” Odjo osho ya ti ngaho.
Odjo oya ti ondunge oya li ngaha: Konima eshi va kufa omaaholi momaanda, ololi otai shingwa fiyo opopepi nonhele yomulandi ya fa ngeno ye lilongekida okuyelula omahooli.
Ashike nee, ololi ei itai i mo monhele omo shili.
Ponhele yokuya mo, omanga ya fikama popepi, ololi imwe otai uya opo va kufe omaaholi mololi imwe va ukifa mwiikwao. Ololi ohai ya ndele tai fikama komesho, omanga oshikoto shaai ya dja nomahooli kehangano shi li popepi nonhele yomulandi, osho tashi ulike va fa ngeno tava yelula omaaholi ponhele opo, ashike omahooli otaa tulwa mololi imwe. Oshinima eshi sha piyaana osha kwatela mo nokuholeka ouyelele pokati kovanailonga vamwe vaNamcor, ovashingi vomaloli novamwe hava longele meni koshikondo shovalandi vomahooli mahapu.
Konima yaasho sha monika kovatalululi vomavalulo oshimaliwa vehangano, Namcor okwa tuma ongudu yovanhu kOmbaye opo va ka ungaunge nokulundulula omikalo odo hadi longifwa kehangano, omikalo dokulongifa eembapila mokudidilika oinima yavo, di ye komikalo dokulongifa eekompiuta.
ELONGELOKUMWE
Namcor okwa lombwela oThe Namibian kutya ove lilongekida okulongela kumwe nopolifi momakonaakono avo opo va xulife po oshikumungu eshi, voo ovo vakwatelwa mo va dule okushikalela po.
“Keshe omunailongo waNamcor ta ka monika kutya naye okwa kwatelwa mo moshinima omu, ohatu ku kwashilipaleke kutya otaku ka ningwa eenghatu da pumbiwa ngaashi omilandu neeveta tadi ti,” Omupopiliko woNamcor Paulo Coelho osho a ti ngaho.
The namibian Etitano okwa lopota kutya eeindjinia mbali nomunailomga umwe wokoshikondo shoimaliwa okwa li va ningilwa omapulaapulo kopolifi ashike inava mangwa po.
“Otwa hala vali okuyeleka kutya ovanailonga vetu kakwa li va ifwanwa opo va ningilwe omapulaapulo, ashike okwa li ashike va longela kumwe nopolifi mokuyandja omahokololo avo shi na sha nomalilongekido okupatulula oshibofa,” Coelho osho a ti ngaho. Namcor ina yeleka nande kombinga womahooli ongushu yeemiliyona N$49 oo taa popiwa a vakwa mehangano. “Kapu na nande oshimaliwa sha kana moNamcor ongoshidjemo shoumbudi womahooli. Otwe lipakama mo natango moilonga yetu,” Coelho osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
