Olaata yopashiwana yovanyasha otai ningilwa omakonaakono kEpangelo

Epangelo ola tameka omakonaakono molaata yopashiwana yovanyasha yedina National Youth Council (NYC) shi na sha nomafeekelo oulingilingi, okukwata nai nokuhalandula eemhango nomalandulafano.

Omakonaakono aa tala unene komunashipundi omukulunhu, Sharonice Busch nomukulunhuwiliki, Calista Schwartz-Gowases, osho sha eta omakulukuto a kula mehangano, omukanda ou wa monika koThe Namibian osho tau ti ngaho.

Momukanda wa nyolwa muKotomba odula ya dja ko. Ominista yomaudano, ovanyasha nomayakulo opashiwana Agnes Tjongarero okwa pula Busch naSchwartz-Gawoses opo vehe likatukile onghatu manga fiyo ouministili otau kundafana kombinga youpyakadi wavo.

“. . . ouministili owa kufa ko oupyakadi oo u li pokati keni, ohatu kendabala opo tu mu pe enyamukulo diva,” Osho a ti ngaho.

Oihokolola yomakonaakona oyo ya tamekele momafiku 24 Januali, okwa li ya ningwa kokakomisi kowina ka hoololwa kouministili womaudano, ovanyasha nomayakulo opashiwana nouministili woimaliwa.

Mokangudu komakonaakono omu na omunashipundi Clement Daniel, Martha Domingos, Augustinus Nawaseb, Nicolars Tembwe, Ellencia Hanse naJohn Nguluwe.

Tjongarero omwedi wa dja ko okwa koleka omakonaakono.

“Ondi na oikumungu ihapu nehangano olo,” Osho a ti ngaho.

Momalundilo omwa kwatelwa kutya Schwartz-Gowases okwa kala ta longo okudja muDesemba 2021 ehe na eudafanoilonga osho tashi eta oupyakadi melelo nomoinakuwanifa pokati komunashipundi omukulunhu nomukulunhuwiliki, osho sha xulila mekondjelo lelelo.

Schwartz-Gowases okwa taalela omalundilo kutya okwe lidopa melando loinima, okwa endelelifa efuto loshimaliwa shi fike poN$300 000 shihe li paveta, osho a futa kehangano ledina Jeovani Properties shi na sha newapaleko lombelewa ya kula yoNYC.
Jeovani Properties okwe li kala kutya inapa ningwa nande oshinima sha puka.

Momukanda oo oThe Namibian ya mona, Schwartz-Gowases okwa nukila pomutenya kutya ina ninga sha nande sha puka, mwa kwatelwa omalundilo kutya ohe liumbatele ovanailonga nai.

Busch okwa kendabala okuninga oshoongalele ashike Tjongarero okweshi anya ta ti ouministili opo u koleke oshoongalele osho osha pumbwa okukala tashi tu kumwe nokatendo koNYC.

Ekondjelo leenghono melelo ola eta natango opo ehangano li dope olutivali okudja nghee la totelwe okuninga oshoongalele shovakalelipo odula ya dja ko.