… Ovanhu ovo vehe na omalukalwa ova hala edu manga omahoololo inaa fika
Mario Gowaseb (22), umwe womwaavo vehe na omaumbo hava di pokapatele kaKhomasdal mOvenduka, okwa lombwela oThe Namibian kutya oule weedula dihapu ova kala nokupula epangelo li vatale, ashike kali na eshi la ninga po.
“Katu wete etomeno lokuhoolola omanga hatu nangala meetenda da talala di na eembululu nomoukumbafa vashona,” Osho a ti ngaho.
Gowaseb navakwao vamwe ovo ve li pokapale opo mOvenduka ova ti itava hoolola fiyo epangelo le va nyamukula.
Ova tokola opo va lwife okuhafilwa oshisho kwavo nokupula oufemba wavo omanga inava ka kufa ombinga momahoololo oo twa taalela.
Gowaseb okwa ti ovanhu vahapu ovo hava di pokapale opo, ova kala nokuhoolola nelineekelo kutya otape ya elunduluko, ashike ponhele yaasho onghalo yavo otai i ashike komesho.
Eedula dihapu, okapale oka kala nokwiidilila ovanhu vahapu ovo vehe na omalukalwa nomayambidido.
“Keshe efiku ohatu mono oixuna ponhele apa, shaashi kashi shi ashike kutya ohatu fi outalala, ashike ohatu nangele ondjala,” Osho a ti ngaho.
Paife eshi oshilongo sha teelela omahoololo, ovanhu ava otava anye okuhoolola fiyo oudjuu wavo wa udika neemumbwe davo da kandulwa po.
Gowaseb kwa ti nande nee ovapandula komakumbafa oo va kala nokupewa kepangelo konima yefimbo lile paife, ova kala nokupula ekandulepo loudjuu ou laalushe.
“Eetenda odo ve tu pa eedula da dja ko oda kulupa nai nodi na eembululu. Nande natango otwa hala omakumbafa shaashi okwa talala, natango otwa hala omalukalwa,” Osho a ti ngaho.
Okwa ti vali omalukalwa oshinima osho va kala va hala okudja momudo 2019.
“Atushe otwa tokola kutya itatu hoolola epangelo ngee inatu pewa edu. Ngee kapu na edu, kapu na okuhoolola ndee ngaho otwa popya twa mana,” Gowaseb osho a ti ngaho.
“Omakumbafa aa wana manga paife, natu tale vali koshinima shimwe osho tashi kalelele,” umwe oo naye e li ponhele opo, Leonardo Helmutbock (29) osho a ti ngaho.
Helmutbock okwa denga omufindo nghee ve udite vehe niwe navo, unene ngaa eshi vehe na noundjuwo, ovo va pumbiwa keshe fiku.
“Otava ti natu hoolole opo tu mone elunduluko. Otwa kala nokuhoololela elunduluko ashike fiyo opapa, katu na omaumbo, otwa fya ondjala noutalala. Ounona vetu ovo hava i kofikola nondjala otava ningwa ngahelipi? Otwa loloka shili,” Osho a ti ngaho.
Janien van Wyk (41) okwa ti onghalamwenyo yomunhu ehe na oilonga oidjuu, unene ngaa poutalala.
“Eli efimbo lidjuu lomudo, eeno otwa pumbwa oikulya, oikutu nomakumbafa, ashike paife ngaha, molwounona vetu, ohatu pula onhele yokudja.
Fiyo onaini hatu kala ashike hatu pula omakumbafa medina loutalala, ongahelipi mbela ngee paife otwa pewa oshinima tashi kalelele?” Osho a ti ngaho.
Van Wyk okwa pula omufiwonghenda opo e va pe oikutu youtalala noikulya.
“Ohatu pula keshe ou ta dulu okutuvatela opo e tu vatele. Ohatu mono ixuna neenghono, ohatu nangele ondjala shee ohatu fi outalala,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
