‘Okuumbata oshikefa shaGeingob oshili efimano longhalamwenyo’ – Venaani

Pelesidente wongudu yomilameno yopambelewa oPopular Democratic Movement (PDM), McHenry Venaani, okwa ti okuumbata oshikefa shapelesidente Hage Geingob oshi li efimano longhalamwenyo.

Venaani, pamwe nominista i kulu younamapya nounaimuna Alpheus !Naruseb, omupedu prima minista John Mutorwa, komufala mu kulu wetanga leameno Martin Shalli, omonamati waGeingob ou a kula Mangaliso Fernandez nanakulwa mu kulu woSwapo Ben Amathila okwa li va pakwilwa oshinakuwanifa opo va umbate oshikefa shaGeingob poshivilodimbuluko nopepako laye. Eshi a nyamukula omapulo oo kwa li a pulwa koThe Namibian mOshoondaxa, Venaani okwa ti okupewa oshinakuwanifa shi li ngaho osha udifa omutima waye nawa. Okwa weda po ta ti okupewa efimaneko li li ngaho otashi holola ekwatafano olo a li e na naGeingob eedula dihapu, olo kwa li la kwatelwa po kefimaneko olo kwa li ve li nena.

“Ohashi pula shihapu ongudu tai lele nongudu yomilameno di kale di na ombili. Ashike nee, atushe otu na eudeko kutya, nande fye ohatu kondjifafana mopolotika ohatu kala alushe ovanhu hatu lwile oshilongo shimwe. Ondi wete kutya okukala omuumbati woshikefa omuwiliki pepako laye osha koleka eitavelo olo twa enda mulo, otwa enda muukumwe shi nasha naNamibia, omo kwa li twa itavela kutya oshilongo oshi na okuuya tete neengudu tadi ya olutivali,” Osho a ti ngaho.

Geingob, oo a ninga pelesidente waNamibia omutitatu mo2015, oye wotete ta file koshipundi mo04 Febuluali. Epako laye ola ningwa Oshoondaxa koHeroes Acre.