Ngoloneya woshitopolwahoololo shaShikoto, Penda Ya Ndakolo, okwa ti inashi pumbiwa okutukula Oshitopolwahoololo shaShikoto moitopolwahoololo ivali, shaashi otashi ka ya exumokomesho moshipala notashi kapu la oshimaliwa shihapu.
Okwa lombwela oThe Namibian Omaandaxa kutya okwa li a kumwa nai eshi a uda kutya opu na ovanhu vamwe tava pula opo oshitopolwahoololo shaShikoto shi tukulwe moitopolwahoololo ivali.
“Kakwa li sha ningilwa omapulaapulo, mwa kwatelwa neekamusela doikandjohoololo. Ondi shi shi kutya oufemba wavo opo va pule oshitopolwahoololo shimwe, ashike ondi wete kutya okwa li ve na okutupula tete manga inava ninga eehelo loshinima shi li ngaho,” Ya Ndakolo osho a ti ngaho. “Kandi wete ashike nande omumbwe yokutopola oshitopolwahoololo moitopolwa ivali, shaashi otashi ka pula epangelo shihapu,” Osho a ti ngaho.
Ya Ndakola okwa ti yee okwa li ashike a pula opo ku totwe oshikandjohoololo shimwe, shaashi oikandjohoololo oyo i li po paife ngaashi Eengodi, Okankolo, Nehale Lya Mpingana nOmuthiya oi li komukunda, ohashi kala nee shidjuu okuya ko koikandjohoololo ei shaashi kapu na eepate nomakufikufi opamhepo kuningwe omakwatafano.
Okwa ti oshikandjohoololo shimwe otashi shi ningi shipu opo ovanhu ava ve li moikandjohoololo ei va kale tava dulu okumona omayakulo avo okudja keembelewa davo dopaikandjohoololo nokoikondo ikwao yepangelo noyopaumwene itava ende eendjila diledile opo va mone omayakulo.
“Okwa li nda pula oshinima shi li ngaho ponhele yovakalimo vomoshitopolwahoolo kehangano ledina Boundaries Delimitation and Demarcation Commission of Namibia olo hali ningi omatendululo oitopolwahoololo, ashike manga inandi ninga ngaho okwa li twa pula ovakalimo vomoshitopolwahoololo opo va yandje omadilaadilo avo. Okutota po oshitopolwahoololo shimwe otashi ka kala shi na ondilo shoo noho itashi ka vatela nokoshikumungu shokuhe na oilonga, shaashi oimaliwa aishe otai longifwa po mokutunga eembelewa dipe nokufuta ovanailonga, ponhele yokuukifa oshimaliwa osho kokuyambula po oikandjohoololo oyo i li nale moshitopolwahoololo. Itandi yambidida nande okweeta po oshitopolwahoololo shimwe oshili aaye,” Ya Ndakolo osho a ti ngaho.
Omunashipundi wongudu yovanyasha kOmuntele Uungulu Indileni, eshi a popya noThe Namibian okwa ti ita popile nande omadilaadilo a Ya Ndakolo, shaashi oshinima eshi shokupula opo ku totwe oshitopolwahoololo shimwe kashi shi ashike edilaadilao lomunhu umwe, ashike edilaadilo lovanhu vahapu.
“Omatokolo aa naa ningwe kovakwashiwana ndee haku ngoloneya ile kookamusela, shaashi ovo va dopa okuningila ovakwashiwana omapulaapulo.
Oshitopolwahoololo osha kula unene nosha pumbwa okutopolwa moitopolwahoololo ivali opo shi vatele okulonga noupu nomayambukepo yoo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
