Okushuna kwaBallotti koilonga yaye ikulu okwa limbililika ovanhu

Euliko lokandidate yovanapaliamenet voSwapo Dino Ballotti kehangano ledina Namibia Investment Promotion and Development Board (NIPDB) otaku tiwa vati ola ningwa opo a pewe omhito a ninge oikonga yongudu tai pangele.

Ballotti okwa li ha longo koNIPDB okudja muMei 2021 fiyo omuAuguste 2024.

Okwa li a waimina oFNB Namibia momafiku 15 Auguste odula ei.

Ballotti okwa ninga omunapolitika wopambelewa wongudu tai pangele omwedi wa dja ko eshi kwa li a hoololwa komupedu pelesidente woSwapo Netumbo Nandi-Ndaitwah ongoumwe womeekandidate hetatu tadi ka kalela po Swapo mopaliamente.

Omunaambanga paife okwa shuna koNIPDB oule ashike weemwedi hamano omanga ina ya kopaliamente.

FNB Namibia ota monika a fa ina hala okukala novapolitika ngaashi Ballotti.

Okushuna koNIPDB okwa eta omalipulo ngee okwa li ngaa kwa landulwa omilandu adishe odo di na okulandulwa, netomeno kutya omolwashike omunapolitika kwa li ashike a tofwa mo opo a ka longe kehangano oko.

Eshi oshe ya konima yeemwedi nhatu eshi oikundaneki kwa li ya lopota ‘oilonga yookaume’ mehangano omo.

Omukulunhuwiliki woNIPDB Nangula Uaandja okwa lombwela ovanailonga Omaandaxa kutya Ballotti natango ota ka waimina ehangano okudja Omaandaxa.

Okwa lombwela ovanailonga kutya okukala kwaBallotti koFNB otaku dulu okumudjuupalela konima eshi a shiivifwa ongokandidate yopaliamente kongudu tai pangele.

Pefimbo opo kwa li ta yandje ouyelele kovanailonga, Uaandja okwa ti Ballotti okwe mu lombwela kutya okwa kendabala okulonga mo oinima noFNB, “ashike molwomalipyakidilo aye . . . paife, okwa pumbwa okukala ta tondauka, otashi monika sha fa itashi ka longa”.

Uaandja okwa ti okwaaluka kwaBallotti okwa li kwa kolekwa kewilikongudu lehangano. Okwa ti oNIPDB otai kongo omukulunhuwiliki, omo kwa tengenekwa omapulaapulo a ka ningwe muNovemba.

Uaandja okwa ti okwa li e na oinakuwanifa yakula i li inhe yaBallotti moule weemwedi hamano.

Oinima ei oya kwatela mo okuyandja omauyelele keengeshefa dishona nodopokati.

Shimwe vali, Ballotti ota ka pewa oilonga yokukwatela komesho oproyeka koSwakopmund, tai ningi omakonakono okutala opo ta pa dulu okuya omatala eengeshefa dishona nodopokati oku landifila oikulya yopamufyuululwakalo.

Eshi kwa li ta popi noThe Namibian Etivali, Ballotti okwa ti omapulo naa ukifwe koNIPDB.

“Ondi wete oshi li nawa ngee ehangano ola nyamukula. Ohandi tumine omapulo oye komupopiliko wopambelewa,” Osho a ti ngaho.

Omapulo oo kwa li a tuminwa koNIPDB Etitatu kakwa li a nyamukulwa.

Namibian Sun Etitatu okwa lopota kutya Ballotti okwa koleka okufiya po oFNB Namibia kwaye, nokwa ti okwa shuna kehangano oko a li nale.

“Eembaanga adishe ihadi longo nopolitika, FNB naye okwa fa ashike eembanga dikwao,” Osho a ti ngaho.

“Konima yeshiivifo ledina lange momusholondodo woSwapo, ewiliko lombaanga naame okwa li tu na eenghundafana opo kwa li twa udafana kutya ohandi kufwa mo mongeshefa opo ku kelelwe omaupyakadi , kombinga yoilonga yange aishe mongeshefa nomoshikondo sheembanga doshiwana,” Osho a ti ngaho.

“Konima yoivike ishona, onda tokola kutya okwa li shiwa keembinga adishe opo ndi xulife po oilonga. Ombaanga okwa li lela ya yambidida kombinga yeshiivifo lefiku lange laxuuninwa nonda pandula nghee ewiliko la ungaunga noinima aishe.

“Ondi na alushe oinima iwa okupopya kombinga yoFNB,” Ballotti osho a ti ngaho.

Natango okwa ti vali okwa li a fiya po oNIPDB nomikalo diwa, nota kala alushe omuyambididi nomukufimbinga woilonga oyo tai longwa kehangano.
“Konima nda lombwela [Uaandja] etokolo lange lokudja kombaanga, okwa pula ngee ohandi dulu okwaalukila kehangano ndi longe ouproyeka

vashona … Ohandi ka longa oilonga yopakafimbo yaNIPDB, nomilandu dayela,” Osho a ti ngaho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.